(ဃ)-ထားဝယ်ပြည်သူ့ဆေးရုံကြီးကို လက်ရှိခုတင် (၂၀၀) အဆင့်မှ ခုတင် (၅၀၀) အဆင့်ရှိ ဆေးရုံအဖြစ် တိုးချဲ့ ခွင့်ပြု ဖွင့်လှစ်ရန် အစီအစဉ်ရှိ/မရှိနှင့် စပ်လျဉ်းသည့် မေးခွန်းဆံ့မှ
တနင်္သာရီတိုင်းဒေသကြီးတွင် မြို့နယ်ပေါင်း ၁၀ မြို့နယ်ရှိပါကြောင်း၊ လူဦးရေအားဖြင့် ၂၀၁၇ ခုနှစ် ဒီဇင်ဘာလကုန်အထိ ၁၃၄၁၀၇၄ ဦးရှိပါကြောင်း၊ ခရိုင် သုံးခု၊ ခရိုင်လူဦးရေ လေးသိန်းကျော်ရှိသည့်အတွက် ထားဝယ်မြို့နယ်တစ်ခုတည်းတွင် ၁၂၆၀၀၀ ကျော်ရှိပါကြောင်း၊ တိုင်းဒေသကြီးမြို့တော်သည် ထားဝယ်ဖြစ်ပြီး တိုင်းအစိုးရရုံးစိုက်ရာမြို့လည်းဖြစ်ပါကြောင်း၊
ထားဝယ်ပြည်သူ့ဆေးရုံကြီးကို မြေဧရိယာ ၁၂.၃၂ ဧကပေါ်တွင် ၁၉၀၉ ခုနှစ်ကတည်းက ပထမအကြိမ် ပြင်ပလူနာဆေးကုခန်းအဖြစ်စတင်ခဲ့ပါကြောင်း၊ ထို့နောက် ၁၉၃၈ ခုနှစ်တွင် Governor of Burma ဘုရင်ခံချုပ်ကြီးက ဆာအာချီရာဒေါ့ခရက်ကိုရီး ဟူသည့်ပုဂ္ဂိုလ်က အုတ်မြစ် ချခဲ့ပါကြောင်း၊ ၁၉၃၉ ခုနှစ်တွင် ခုတင်(၁၀၀)အဆင့်(၁) ဆေးရုံကြီးအဖြစ်လည်းကောင်း၊ ၁၉၄၅ ခုနှစ်တွင် ခရိုင်ဆေးရုံအဖြစ်လည်းကောင်း၊ ၁၉၉၇ ခုနှစ်တွင် အထူးကုဆေးရုံကြီးအဖြစ် လည်းကောင်း၊ ၁၉၉၁ ခုနှစ်တွင် ခုတင်(၂၀၀) အဆင့်ဆေးရုံကြီးအဖြစ် လည်းကောင်း၊ ၂၀၁၂ ခုနှစ်တွင် စံမီခုတင်(၂၀၀) ဆေးရုံကြီးအဖြစ်လည်းကောင်းတိုးမြှင့်၍ စဉ်ဆက်မပြတ်လူနာများကို ကုသပေးလျက်ရှိပါကြောင်း၊ ထားဝယ်မြို့ပြည်သူ့ဆေးရုံကြီးတွင် တက်ရောက်ကုသသော လူနာအရေအတွက်မှာ ၂၀၁၆ ခုနှစ်တွင် တစ်နေ့လျှင် ပျမ်းမျှပြင်ပလူနာ ၂၀၁ ဦး၊ အတွင်းလူနာ အဖြစ် ပျမ်းမျှ ၂၉၀ ဦးရှိပါကြောင်း၊ ယခုအခါ ခုတင်(၂၀၀) အဆင့်သာသတ်မှတ်ထားဆဲဖြစ်သည့် အတွက် တစ်ခါတရံ အတွင်းတွင်လူနာများထားရန် နေရာမရှိသည့်အခါ အပြင်ကော်ရစ်တာတွင် လူနာများပြည့်ကျပ်နေသည်ကိုတွေ့ရှိရပါကြောင်း၊ သို့သော် တာဝန်ကျဆရာ/မများ၊ သက်ဆိုင်ရာ သူနာပြုများက စိတ်ရှည်လက်ရှည် ကုသပေးလျက်ရှိပါကြောင်း၊ ၁၉၉၉ ခုနှစ်ကတည်းက နှစ်ထပ်အဆောက်အဦတစ်ခုထားရှိ၍ ကုသရသော်လည်း နှစ်ထပ်အဆောက်အဦ နှစ်ခုကို ဖွင့်လှစ်ပြီး ယခုအခါ ငါးထပ်အဆောက်အဦတစ်ခုကို ဆောက်လုပ်နေပါကြောင်း၊ တနင်္သာရီတိုင်း ဒေသကြီးအတွင်းရှိ နှလုံး၊ ဦးနှောက်နှင့်အာရုံကြော၊ စိတ်ရောဂါ၊ မှုခင်းဆိုင်ရာမေ့ဆေး၊ ကျောက်ကပ်၊ အစာအိမ်နှင့်အူလမ်းကြောင်းဆိုင်ရာ ဆေးကုဌာနများ မရှိသည့်အတွက် လူနာများသည် အနီးဆုံးမိုင် ၄၀၀ ကျော်ဝေးကွာသော ရန်ကုန်ဆေးရုံကြီးကို သွားရောက် ကုသနေရသည့် အခက်အခဲများစွာရှိကြပါကြောင်း၊
သို့ဖြစ်ပါ၍ အမှန်တကယ် ခုတင်(၅၀၀)အဆင့်ရှိ ဆေးရုံကြီးတစ်ခုလိုအပ်နေပြီး မြို့နယ်အသီးသီးမှ ရောဂါဝေဒနာရှင်များအတွက် အနီးဆုံးတက်ရောက်ကုသနိုင်သည့်ဆေးရုံအဖြစ် ထားဝယ်မြို့ ပြည်သူ့ဆေးရုံကြီးကို ခုတင် (၅၀၀)အဆင့်သို့ တိုးချဲ့ဖွင့်လှစ်ခွင့်ပြုပေးနိုင်ရန်အစီအစဉ်ရှိ/မရှိ၊နှင့် ရှိပါက မည်သည့်အချိန်တွင် လည်းကောင်း၊ မရှိပါက မည်သည့်အတွက်ဖြစ်သည်ကို သိရှိလို ပါကြောင်း မေးမြန်းပါသည်။