မိမိမေးခွန်းကို နိုဝင်ဘာလအတွင်း မေးမြန်းခဲ့ခြင်းဖြစ်သည့်အတွက် ယခုအခါ တချို့သော သတင်းအချက်အလက်များ ထုတ်ပြန်ထားပြီးဖြစ်သည်ကို သိရှိရပါကြောင်း၊ ဥပမာအားဖြင့် မတ်လ ၆ ရက်နေ့တွင် ထုတ်ပြန်ချက်အရ ပြန်လည်လက်ခံရေးဆောင်ရွက်ရာတွင် ဘင်္ဂလားဒေ့ရှ်နိုင်ငံဘက်မှ ပေးပို့လာသော ပုံစံများမှာ နှစ်နိုင်ငံသဘောတူညီထားသည့် ပုံစံမျိုးမဟုတ်သည့်အတွက် ညှိနှိုင်းဆောင်ရွက်လျက်ရှိပါကြောင်း၊ ဘင်္ဂလားဒေ့ရှ်နိုင်ငံဘက်က နှစ်နိုင်ငံသဘောတူထားသည့် ပုံစံအတိုင်း မဖြည့်စွက်သည့်အတွက်ကြောင့် မြန်မာနိုင်ငံတွင် နေထိုင်ခဲ့ခြင်းရှိ/မရှိ စိစစ်ရာတွင် ခက်ခဲခြင်း၊ မိမိဆန္ဒအလျောက် ပြန်လည်ဝင်ရောက်လိုမှုဟုတ်/မဟုတ် မစိစစ်နိုင်ခြင်း၊ ပြည်ထောင်စုသမ္မတမြန်မာနိုင်ငံတော်၏ တည်ဆဲဥပဒေများကို လေးစားလိုက်နာပါမည်ဖြစ်ကြောင်း ဝန်ခံချက်မပါရှိခြင်း၊ အိမ်ထောင်စုများတွင် တစ်ဦးချင်း၏အဖ၊ အမိအမည်များ မပါရှိသကဲ့သို့ို သားသမီးများ၏ မွေးရပ်မြေများကို မဖော်ပြထားသဖြင့် အခြားသောသူများ ရောနှောပါဝင်နိုင်ခြင်း စသည်တို့ဖြစ်ပါကြောင်း၊ ထို့အတူ ဘင်္ဂလားဒေ့ရှ်နိုင်ငံမှ ပြန်လွှဲမည့်ဘင်္ဂါလီ ၈၀၀၀ ကျော်တွင် မြန်မာနိုင်ငံ၌ နေဖူးသူ ၃၀၀ ကျော်သာ စိစစ်တွေ့ရှိရသည်ဟူသည့် သတင်းများကို ဖတ်ရှိရသည့် အတွက်ကြောင့် တရားမဝင်ခိုးဝင်သူများ နိုင်ငံအတွင်းသို့ မဝင်ရောက်နိုင်ရေးကို နိုင်ငံတော်အစိုးရ အနေဖြင့် စနစ်တကျစိစစ်လက်ခံနေကြောင်း သိရှိရသဖြင့် ပြည်သူများ စိတ်သက်သာယာ ရရှိပါကြောင်း၊ သို့သော်လည်း ပြည်သူများအနေဖြင့် ပွင့်လင်းမြင်သာစွာ သိရှိရန်လိုနေသည့် အချက်များအနေဖြင့် (၁) ပြန်လည်လက်ခံရေးနှင့်ပတ်သက်သော နှစ်နိုင်ငံသဘောတူညီမှု၊ (၂) ပြန်လည်ဝင်ရောက်လာသူများ တွင် ARSA အကြမ်းဖက်အဖွဲ့ဝင်များနှင့် ပတ်သက်သူများအတွက် ဆောင်ရွက်ထားမှု၊ (၃) ဘင်္ဂါလီအတွက် သီးခြားနယ်မြေ Save Zone တောင်းဆိုမှုကိစ္စ၊ (၄) မူလထွက်ခွာသည့်နေရာတွင် ပြန်လည်နေရာချထားပေးမှုရှိ/မရှိ၊ (၅) လူမှုစာမျက်နှာများပေါ်တွင် ထွက်ခွာသွားစဉ်က အမျိုးသမီးထုများပြီး ပြန်လာသောအခါ အမျိုးသားထုများပြားနေကြောင်း ဖော်ပြထားမှုဟုတ်/မဟုတ် စသည့် နိုင်ငံတော်အစိုးရ၏ ကောင်းမွန်သော လက်ခံရေးအစီအစဉ်များနှင့် ပွင့်လင်းမြင်သာမှု ရှိစေရန်အတွက် မေးမြန်းရခြင်း ဖြစ်ပါသည်။