မိမိတို့နိုင်ငံတွင် စက်မှုဝန်ကြီးဌာနအောက်က လတ်တလောရပ်ဆိုင်းထားသော စီမံကိန်းနှစ်ခုအပါအဝင် တည်ဆောက်ပြီးလည်ပတ်လျက်ရှိသော စက်ရုံ ၂၄ ခု ရှိသည့်အနက် အိုဟောင်း၍၊ ခေတ်နှင့်မညီတော့၍ ပိတ်သိမ်းသင့်သော စက်ရုံများပါဝင်သကဲ့သို့ ရပ်ဆိုင်းထားပါက တိုင်းပြည်အတွက် လွန်စွာထိခိုက်နေသော စီမံကိန်းများလည်း ပါဝင်နေပြီး အမှတ် (၁) သံမဏိစက်ရုံ(မြင်းခြံ) တိုးချဲ့စီမံကိန်းလည်း ပါဝင်နေပါကြောင်း၊

ယင်းစီမံကိန်းတွင် Phase-II  သုံးခုပါဝင်ပြီး CDB ဘဏ်မှ အတိုးနှုန်း ၄.၅ ရာခိုင်နှုန်းဖြင့် ချေးယူ ဆောင်ရွက်ထားပါကြောင်း၊ Phase-II ပါလုပ်ငန်းများကို အနည်းငယ်ထပ်မံရင်းနှီးမြှုပ်နှံပြီး လုပ်ကိုင်မည် ဆိုပါက ထုတ်ကုန်များရရှိမည်ဖြစ်သော်လည်း ရပ်ဆိုင်းထားသည့်အတွက် ပြီးစီးမှုများ တန်ဖိုးမရှိ ဖြစ်နေပါကြောင်း၊ တိုးချဲ့စီမံကိန်းထဲတွင်ပါဝင်သော Phase-II (A) သည် ငါးရာခိုင်နှုန်းအတိုးဖြင့် ချေးငွေ ယူပြီးဆောင်ရွက်ထားပါကြောင်း၊ တိုးချဲ့စီမံကိန်း Phase-III ကို ငါးရာခိုင်နှုန်းအတိုးဖြင့် ချေးငွေ ယူပြီးဆောင်ရွက်ထားပါကြောင်း၊ Phase-II(A)နှင့် Phase-III တို့သည် မြေပြင်တွင်မဆောင်ရွက် ရသေးခြင်းများ၊ မပြီးစီးသေးခြင်းများ ရှိနေပါကြောင်း၊ ယင်းလုပ်ငန်းများကို မပြီးစီးသေးသည့်အတွက် ဆက်လက်မလုပ်ဆောင်ပါက ဆိုင်းငံ့ကာလကျော်လွန်နေပြီဖြစ်သည့်အတွက် ချေးငွေနှင့် အတိုး အရင်း တို့ကို ပြန်လည်ပေးဆပ်နေရပြီဟု သိရှိရပါကြောင်း၊

မိမိ၏လေ့လာချက်အရ တွေ့ရှိထားသော အဆိုပါစီမံကိန်းဆက်လက်ဆောင်ရွက်သင့်သည့် များစွာသော အကြောင်းတရားများ ဖြစ်ပါကြောင်း၊ ၎င်းဖော်ပြချက်သည် တိုင်းပြည်အတွက် ပဂတိရင်ဆိုင်ဖြေရှင်း နေရသည့် အခြေအနေမှန်များ ဖြစ်ပါကြောင်း၊ အထက်ဖော်ပြပါ တိုးချဲ့စီမံကိန်းသုံးခုစလုံးအတွက် ချေးငွေများကို အတိုးဖြင့်ဆောင်ရွက်ထားကြောင်း၊ ၂၀၃၂ ခုနှစ်ထိ အနှစ် ၂၀ အတွင်း ပေးဆပ်ရမည့် အတိုးများသည်လည်း ချေးငွေ ၁.၀၄၂ ယူရိုဘီလီယံအတွက် အတိုးယူရို ၅၈၂ သန်း ပေးဆပ်နေရခြင်း ဖြစ်ကြောင်းတို့ကို မြင်တွေ့သိရှိနိုင်ပါကြောင်း၊ ယခုရပ်ဆိုင်းထားသော်လည်း ချေးငွေနှင့်အတိုးများကို ပေးဆပ်နေရသည်ဟု  သိရှိရပါကြောင်း၊

အဆိုပါစီမံကိန်းကိုသုံးသပ်ကြည့်ပါက နိုင်ငံပိုင်ငွေဖြင့်တည်ဆောက်ခဲ့ခြင်းမဟုတ်ဘဲ အတိုးနှုန်း ၄.၅ ရာခိုင်နှုန်းဖြင့် နိုင်ငံခြားချေးငွေယူကာ ဆောင်ရွက်ခဲ့ခြင်းဖြစ်ပါကြောင်း၊ ထို့ကြောင့် စီမံကိန်း၏ တည်ဆောက်ဆဲလုပ်ငန်းများကို လျင်မြန်စွာ လက်စသတ်တည်ဆောက်ပေးပြီး ကုန်ချောအဆင့် ထုတ်လုပ်နိုင်မှသာ နှစ်စဉ်ပြန်လည်ပေးဆပ်ရမည့် နိုင်ငံခြားကြွေးမြီအတိုးအရင်းတို့ကို ပေးဆပ်နိုင်မည် ဖြစ်ပါကြောင်း၊ စီမံကိန်းကိုရှုံး၍ ရပ်ဆိုင်းထားပါက ဝယ်ယူထားပြီးဖြစ်သော စက်ပစ္စည်းများ၊ ရင်းနှီးမြှုပ်နှံ ပြီးသော တည်ဆောက်ဆဲ၊ တည်ဆောက်ပြီး အလုပ်ရုံများမှာလည်း ပျက်စီးဆုံးရှုံးနိုင်သကဲ့သို့ နှစ်စဉ် ပေးဆပ်ရမည့် နိုင်ငံခြားကြွေးမြီများအတွက်လည်း ပြည်သူ့ဘဏ္ဍာမှလည်း ကျခံရမည်ဖြစ်ပြီး နိုင်ငံတော် အတွက် လွန်စွာထိခိုက်နေသည့်အတွက် (၁) လတ်တလော ရပ်ဆိုင်းထားသော အမှတ်(၁)သံမဏိ စက်ရုံ(မြင်းခြံ) တိုးချဲ့စီမံကိန်းအား ဆောင်ရွက်နိုင်ရန် အစီအမံများရေးဆွဲထားခြင်းရှိ/မရှိ၊ (၂) အကယ်၍ စီမံကိန်းပြန်လည်ဆောင်ရွက်ခွင့်ရရှိပါက နိုင်ငံတော်အတွက် မည်သို့သောအကျိုးကျေးဇူးများ ရရှိနိုင်ပါ မည်နည်းတို့ကို သိရှိလိုပါကြောင်း မေးမြန်းပါသည်။