ကော့မှူးမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဒေါ်အောင်ဆန်းစုကြည်က ရန်ကုန်ဝိဇ္ဇာသိပ္ပံ တက္ကသိုလ်အား အဆင့်မီတက္ကသိုလ်တစ်ခု ဖြစ်မြောက်ရေးအတွက် ပညာရေးဝန်ကြီးဌာနမှ တာဝန်ရှိသူများ၊ လွှတ်တော်ရေးရာကော်မတီ၊ ကော်မရှင်အဖွဲ့ဝင်များ၊ ဘာသာရပ်ဆိုင်ရာကျွမ်းကျင်သူ အသိပညာရှင်၊ အတတ်ပညာရှင်များ ပါဝင်သော ကြီးကြပ်ကွပ်ကဲရေးအဖွဲ့ ဖွဲ့စည်းပေးပါရန် ပြည်ထောင်စုအစိုးရသို့ တိုက်တွန်းကြောင်းအဆိုကို တင်သွင်းခဲ့ပါသည်။ ထိုသို့ ဖွဲ့စည်းဆောင်ရွက်ရန် ပံ့ပိုးမည်ဆိုပြီး ကတိကဝတ် ခံထားပြီးသော အဖွဲ့အစည်းများ၊ တိုင်းပြည်များ၊ ပုဂ္ဂိုလ်များရှိသည်ဟု ရှင်းလင်းတင်ပြသွားပါကြောင်း၊ လွှတ်တော်ကိုယ်စားလှယ်တစ်ဦးက ထောက်ခံ၍ လွှတ်တော်ကိုယ်စားလှယ်အားလုံးက သဘောတူသည့်အတွက် အဆိုကို အတည်ပြု၍ ကော်မတီတွေလည်း ဖွဲ့စည်းဆောင်ရွက်နေသည်ဟု သိရှိရပါကြောင်း၊ ကော်မတီများ ဖွဲ့စည်းဆောင်ရွက်သည်မှာ ၂ နှစ်တာကြာမြင့်ပြီးဖြစ်၍ ၎င်းတိုက်တွန်းကြောင်း အဆိုနှင့်ပတ်သက်ပြီး မည်သို့ဆောင်ရွက်နေသည်ကို ပြည်ထောင်စုအစိုးရအဖွဲ့က လာရောက်ရှင်းလင်းမှုများ မရှိသေးပါကြောင်း၊ ရန်ကုန်ဝိဇ္ဇာသိပ္ပံတက္ကသိုလ် အဆင့်မြှင့်တင်ရာတွင် ကမ္ဘာအကောင်းဆုံး၊ အဆင့်အမြင့်ဆုံး တက္ကသိုလ်များကလည်း မည်သို့ဝိုင်းဝန်းကူညီနေသည်နှင့် နိုင်ငံတော်ပိုင်ပစ္စည်းကို ပြုပြင်ရာတွင် အစိုးရအဖွဲ့အစည်းများနှင့် ပေါင်းစပ်ညှိနှိုင်းဆောင်ရွက်မည်ဖြစ်သည့်အတွက် ဘဏ္ဍာရေးလုပ်ထုံးလုပ်နည်း၊ စည်းမျဉ်းစည်းကမ်းနှင့်အညီ မည်သို့ဆောင်ရွက်နေသည်ကို သိရှိလိုကြောင်း မေးမြန်းပါသည်။