ရှမ်းပြည်နယ်မြောက်ပိုင်းမှ ကုန်သည်တို့သည် ပွဲရုံများ၊ ဒိုင်များ၊ ကုန်စည်ရုံများ ဖွင့်လှစ်ပြီး တောင်သူများ၏ ဒေသထွက်ကုန်များကို အကြွေးစနစ်ဖြင်‌့ ဝယ်ယူ၍ နယ်စပ်ဒေသ တရုတ်နိုင်ငံသို့ ရောင်းချပေးလျက်ရှိပါသည်။ ထိုသို့ ရောင်းချရာတွင် သက်ဆိုင်ရာ မြန်မာနိုင်ငံအစိုးရထံ ကျသင်‌့သော အခွန်အခများကို စနစ်တကျပေးသွင်းပြီး နယ်စပ်ဂိတ်များကို ဖြတ်ကျော်၍ တရားဝင်ရောင်း ချပေးနေကြ ပါကြောင်း။ ထိုကဲ့သို့ ရောင်းချရာတွင် တရုတ်သူဌေးများမှ ဆန်၊ ပြောင်းနှင့်အခြားကုန်များကို အကြွေးစနစ်ဖြင့် ဝယ်ယူခဲ့ကြပါကြောင်း၊ ယင်းကုန်များကို ရောင်းချပြီးမှ ပေးရမည့်ငွေများကိုမြန်မာနိုင်ငံမှပွဲရုံများ၊ ဒိုင်များ၊ ကုန်စည်ရုံများ၊ ကုန်သည်များမှတစ်ဆင့် တောင်သူလယ်သမားများထံသို့ ငွေများကိုအကျေပေးချေခဲ့ပါကြောင်း၊ ထိုစနစ်မျိုးကဲ့သို့ ကျင့်သုံးပြီး အရောင်းအဝယ်ပြုခဲ့သည်မှာ ၃၊ ၄၊ ၅ နှစ် ခန့် ရှိပြီး ပြဿနာတစ်စုံတစ်ရာမှ မရှိခဲ့ပါ။ မြန်မာနိုင်ငံမှ ကုန်သည်များနှင့် တောင်သူဦးကြီးများသည်လည်း အဆင်ပြေစွာဖြင့် တရုတ်ကုန်သည်တို့နှင့် အပြန်အလှန်ကူးသန်း ရောင်းဝယ်ခဲ့ကြပါကြောင်း၊၂၀၁၄ ခုနှစ်၊ သြဂုတ်လလဆန်းပိုင်းမှစတင်ပြီး တရုတ်နိုင်ငံအစိုးရသည် ထိုတရုတ်ကုန်သည်များကို အကြောင်းကြောင်းကြောင်‌့ ဖမ်းဆီးခြင်း၊ ဖမ်းမိခြင်းမခံရသော ကုန်သည်များမှာ ကြောက်လန့်သဖြင့် ထွက်ပြေးခြင်း၊ ကုန်သည်၏ မိသားစုဝင်များကို ဖမ်းဆီးခြင်းနှင့် ဆန်၊ ပြောင်းကုန်များကို ဖမ်းဆီးထိန်းသိမ်းခြင်းများ ပြုလုပ်ခဲ့ကြပါကြောင်း၊ ထို့ကြောင့် မြန်မာနိုင်ငံမှ ကုန်သည်များသည် အကြွေးများပြန်လည်ရရှိရန် အခက်အခဲများစွာ ဖြစ်နေရပါကြောင်း၊ ရရှိရန်အကြွေးများသည် တစ်သန်း၊ နှစ်သိန်းမဟုတ်ဘဲ မြန်မာကျပ်ငွေ သိန်းထောင်ချီခန့်ရှိပြီး ဆုံးရှုံးနစ်နာမှုအင်မတန် ကြီးမားပါကြောင်း၊ ထို့ကြောင့် မြန်မာနိုင်ငံမှ ကုန်သည်များသည်လည်း တောင်သူများကိုပေးရန် အခက်အခဲများစွာကြုံတွေ့နေရပါကြောင်း၊ ဖွဲ့စည်းပုံအခြေခံဥပဒေအရ ပုဒ်မ ၂၂(ဂ) တွင် နိုင်ငံတော်သည် တိုးတက်မှုနည်းပါးနေသော တိုင်းရင်းသားများ၏ ပညာရေး၊ ကျန်းမာရေး၊ စီးပွားရေးနှင့် လမ်းပန်းဆက်သွယ်ရေးစသည် တို့ပါဝင်သော လူမှုစီးပွားရေးတိုးတက်ဖွံ့ဖြိုးရေးအတွက် ကူညီဆောင်ရွက်ပါမည်။ ပုဒ်မ ၃၆ အရ နိုင်ငံတော်သည် အများပြည်သူတို့၏ နေထိုင်မှု အဆင့်အတန်းမြှင့်တင်ရေးနှင့် အထွေထွေအရင်းအနှီးများတိုးတက်ဖွံ့ဖြိုးရေးကို ရှေးရှုဆောင်ရွက်မည်ဟူ၍ ပြဋ္ဌာန်းထားပါကြောင်း၊ ရှမ်းပြည်နယ်မြောက်ပိုင်း သိန္နီမြို့နယ်မှ ကုန်သည်များနှင့် တောင်သူများ၏ အခက်အခဲများကို နိုင်ငံတော်မှကူညီဖြေရှင်းပေးရန် အစီအစဉ်ရှိ/မရှိနှင့် အစီအစဉ်မရှိပါက မည်သည့် အတွက်ကြောင့်နည်း၊ အစီအစဉ်ရှိပါက မည်သည့် အချိန်ကာလတွင် နိုင်ငံတော်မှ ကူညီဆောင်ရွက် ပေးမည်ကို သိရှိလိုပါကြောင်းမေးမြန်းပါသည်။

---