မိမိအနေဖြင့် ပြည်ထောင်စုလွှတ်တော်၏ ဖွံ့ဖြိုးရေးရန်ပုံငွေများသုံးစွဲရာတွင် ပင်ရင်းမှ ဖြတ်တောက်ပေးသွင်းရမည့်အခွန် (Tax) ကိစ္စနှင့် ပတ်သက်၍ မေးမြန်းလိုပါကြောင်း၊ ပင်ရင်းဖြတ်တောက်ပေးသွင်းရမည့် အခွန် (Withholding Tax) သည် ၁၉၇၄ ခုနှစ်  ဝင်ငွေခွန်ဥပဒေပုဒ်မ ၁၆(င)အရ ထုတ်ပြန်ခဲ့သော ဘဏ္ဍာရေးနှင့် အခွန်ဝန်ကြီးဌာန အမိန့်ကြော်ငြာစာအမှတ်(၄၁/၂၀၁၀) တွင်ပါရှိသည့်အတိုင်း ကန်ထရိုက်စာချုပ် သို့မဟုတ် သဘောတူစာချုပ် သို့မဟုတ် သဘောတူညီချက်တစ်ရပ်ရပ်ဖြင့် နိုင်ငံတော် အဖွဲ့အစည်းများ၊ စည်ပင်သာယာရေး အဖွဲ့အစည်းများ၊ သမဝါယမအသင်းများ တည်ဆဲဥပဒေတစ်ရပ်ရပ်အရ အဖွဲ့အစည်းမှတ်ပုံတင်ထားသော အစုစပ်လုပ်ငန်းများ၊ အဖွဲ့အစည်းများက ဝယ်ယူခြင်းနှင့် လုပ်ငန်းဆောင်ရွက်ပေးခြင်းအတွက် ပေးချေငွေများအပေါ်တွင် ကြိုတင်ဝင်ငွေခွန်အဖြစ် ကောက်ယူခြင်းဟု သိရှိရပါကြောင်း၊ ၂၀၁၃-၂၀၁၄ ဘဏ္ဍာရေးနှစ်တွင် ဖွံ့ဖြိုးရေးရန်ပုံငွေကို မြို့နယ်တစ်ခုလျှင် ကျပ်သိန်း ၁၀၀၀ ဖြင့် ဖွံ့ဖြိုးရေးလုပ်ငန်းဆောင်ရွသောလုပ်ငန်းများသည် ဒေသခံများမှ လုပ်အားစိုက်ထုတ်၍ ဆောင်ရွက်ခဲ့ကြခြင်းဖြစ်ပါကြောင်း၊ သို့သော် အချို့သော အုပ်ချုပ်ရေးအာဏာပိုင်များမှ အထက်အမိန့်အရဟုဆိုကာ လုပ်ငန်းဆောင်ရွက်ပြီးသော ကျေးရွာများသို့ ၂ ရာခိုင်နှုန်း အခွန်ငွေများလိုက်လံကောက်ခံ လျက် ရှိကြောင်းကြားသိရပါကြောင်း။

သို့ဖြစ်ပါ၍ ယင်းလုပ်ငန်းများနှင့်ပတ်သက်၍ ပင်ရင်းမှ ဖြတ်တောက်ပေးသွင်းရမည့်အခွန် (Withholding Tax)   ပေးဆောင်ရန် လို/မလိုသိရှိလိုပါကြောင်း၊ ဝင်ငွေခွန်(Income Tax)ကို  ကြိုတင်ပြီး ကောက်ခံခြင်းဖြစ်ပါကြောင်း၊ လူတစ်ဦး၏ လုပ်ငန်း အရှုံး၊ အမြတ်များ ပေါင်းပြီးမှ အမြတ်အပေါ် စည်းကြပ်သော ဝင်ငွေခွန်ကို ကောက်ခံခြင်း ဖြစ်ပါကြောင်း၊ မိမိတို့သည် လုပ်ငန်းလုပ်ကိုင်ခြင်းမဟုတ်သောကြောင့် သိန်း ၁၀၀၀ အနက်မှ သိန်း ၂၀ ကို Tax ပြပါက မှားယွင်းပါကြောင်း၊ ထိုသို့ ကောက်ခံရာတွင်လည်း အစိုးရအဖွဲ့အစည်းများကသာ ကောက်ခံရမည်ဖြစ်ပြီး လွှတ်တော်ကိုယ်စားလှယ်များက ကောက်ခံ၍ မရပါကြောင်း၊ သက်ဆိုင်ရာ အခွန်ဦးစီးဌာနကသာ ကောက်ခံရမည် ဖြစ်ပါကြောင်း၊ ယခုအခါ ရွာများအထိဆင်း၍ ရွာကလုပ်သောလုပ်ငန်းများကို လိုက်ခံကောက်ခံ နေခြင်းကြောင့် မိမိတို့မှ ပြည်သူများ အဆင်ပြေရန် ဆောင်ရွက်ပေးသောလုပ်ငန်းများသည်  ပြည်သူများအတွက် စိတ်ညစ်စရာကိစ္စရပ်များ ဖြစ်သွားနိုင်ပါကြောင်း၊ ထို့ကြောင့် ယင်းကိစ္စနှင့်စပ်လျဉ်း၍ မိမိအမြင်သည် မိမိတို့မှ  မကောက်မိပါကလည်း ကောက်ရန် မလိုအပ်ပါကြောင်းနှင့် ယင်းကိစ္စကို သက်ဆိုင်ရာ ပြည်တွင်းအခွန်ကကောက်ရမည့် အလုပ်သာဖြစ်ခြင်းကြောင့် ယင်းကိစ္စများနှင့်စပ်လျဉ်း၍ သိလိုပါကြောင်း မေးမြန်းပါသည်။