(က)-ဘူးသီးတောင်-မောင်တောလမ်းပေါ်ရှိလိုဏ်ဂူ ငယ်လမ်းအား ရှောင်ကွင်းလမ်း ဖောက်လုပ်ပေးရန် အစီအစဉ်ရှိ၊ မရှိ နှင့်စပ်လျဉ်းသည့် မေးခွန်း
ဘူးသီးတောင်-မောင်တောလမ်းသည် ၁၆ မိုင်ရှည် လျားပါပြီး လိုဏ်ဂူကြီးနှင့် လိုဏ်ဂူငယ်ဆိုပြီး လိုဏ်ဂူ ကွဲ နှစ်ခုကို ၁၉၁၈ ခုနှစ် မာတင်ကုမ္ပဏီမှ အင်္ဂလိပ်လက်ထက်တွင် တည်ဆောက်ခဲ့ပါကြောင်း၊ ၎င်း လိုဏ်ဂူ ကြီးကို မိမိတို့ ရခိုင်တိုင်းရင်သားများက တောင်ခေါင်းကြီး ဟုခေါ်ပြီး လိုဏ်ဂူငယ်ကို တောင်ခေါင်းရှည်ဟုခေါ်ခဲ့ ကြပါကြောင်း၊ ၎င်းလိုဏ်ဂူကြီးများသည် (၉၆)နှစ်ကျော်ကြာမြင့်နေပြီးဖြစ်သဖြင့် အတော်လေး ပျက်စီးနေသည် ကိုတွေ့ရှိရပါကြောင်း၊ ထို့ကြောင့် နိုင်ငံတော်အစိုးရမှ လိုဏ်ဂူကြီးလမ်းမှ မသွားဘဲ ရှောင်ကွင်းလမ်းအဖြစ်ကို ၂၀၁၃ ခုနှစ် ဒီဇင်ဘာလတွင် အောင်မြင်စွာဖွင့်လှစ်ပေးခဲ့ပြီး ဖြစ်ပါကြောင်း၊ ယခုလိုဏ်ဂူငယ်သည် ရခိုင်ပြည်နယ်ရှိ ပြည်သူများအတွက် စီးပွားရေး၊ လူမှုရေး၊ လုံခြုံရေးအတွက် အင်မတန်အရေးကြီးပါကြောင်း၊ ထို့ကြောင့် လိုဏ်ဂူငယ်ကိုလည်း ရှောင်ကွင်းလမ်းအဖြစ် အသုံးပြုရန် အထူးလိုအပ်လျက်ရှိနေပါကြောင်း၊ ၎င်း လိုဏ်ဂူငယ်လမ်းကို ရှောင်ကွင်းလမ်းအဖြစ် လုပ်ပေးရန် အစီအစဉ်ရှိ/မရှိနှင့် အစီအစဉ်ရှိပါက မည်သည့်အချိန်မှာပြုလုပ်ပေးမည်ကို သိရှိလိုပါကြောင်း မေးမြန်းပါသည်။