မြန်မာနိုင်ငံ၏ ရှေးပျူမြို့ဟောင်း ၃ မြို့ဖြစ်သော ဟန်လင်း၊ ဗိဿနိုး၊ သရေခေတ္တရာမြို့တို့အား ကမ္ဘာ့အမွေ အနှစ်စာရင်းဝင်အဖြစ် အတည်ပြုသတ်မှတ်ခဲ့သည်သတင်းကို ၂၅-၆-၂၀၁၄ ရက်နေ့ ထုတ် ကြေးမုံသတင်းစာတွင်တွေ့ရှိရပါကြောင်း၊ အဆိုပါသတင်း၏ စာပိုဒ်တစ်ပိုဒ်တွင် ပျူမြို့ဟောင်း ၃ မြို့တို့သည် ပုဂံခေတ်အား မြန်မာ့လက်ရာမြောက်မှုနှင့် ဘာသာသာသနာ ရိုးရာ ယဉ်ကျေးမှုဆိုင်ရာ အဆင့်အတန်းမြင့်မားမှုကျန်ရစ်အောင် မျိုးစေ့ချပေးနိုင်ခဲ့သည်ဟု ရေးသားထားခြင်းသည် မိမိ သိရှိ ထားသည့် အကြောင်းအရာ ဖြစ်စဉ်များတို့နှင့် ကွဲလွဲနေပါသဖြင့် တိကျခိုင်လုံသော အဖြေမှန်ကို သိရှိလိုပါကြောင်း၊  ပုဂံပြည်၏ ဗုဒ္ဓဘာသာ၊ သာသနာနှင့် ယဉ်ကျေးမှု ဓလေ့ထုံးစံ အမွေအနှစ် တို့သည် သုဝဏ္ဏဘူမိ သထုံပြည် မွန်တို့ဌာနီမှ ရရှိခဲ့သော ယဉ်ကျေးမှုအမွေအနှစ်များကို အခြေခံထား ရှိပြီးမှသာလျှင် ဖွံ့ဖြိုးတိုးတက်လာခြင်းကို ရှေးဟောင်း သမိုင်းမှတ်တမ်းများတွင် တွေ့ရှိထားပါ ကြောင်း၊ သို့ဖြစ်ပါ၍ အထက်ဖော်ပြပါ ကြေးမုံသတင်းအရ ပုဂံခေတ်ယဉ်ကျေးမှုသည် ပျူ သုံးမြို့မှ မျိုးစေ့ချခဲ့သည်ဟု ညွှန်းဆိုရေးသားထားပါသဖြင့် တင်ပြပါသမိုင်းတွေ့ရှိချက် အထောက် အထားများတို့နှင့် မတူကွဲပြားခြားနားမှုရှိကြပါ၍ အဆိုပါမတူညီသည့် အချက်နှစ်ချက်အနက် မည်သည့်အချက်က မှန်ကန်သည်ကို ဦးစွာ သိရှိလိုပါကြောင်း၊

ဒုတိယမေးခွန်းအနေဖြင့် ပုဂံပြည်ရှိ ဘာသာသာသနာနှင့်သက်ဆိုင်သည့် ရှေးဟောင်းစေတီပုထိုး အဆောက်အဦများ၊ ယဉ်ကျေးမှုအနုပညာလက်ရာအမွေအနှစ်များ၊ ကျောက်စာများတို့သည် ပျူမြို့ ဟောင်း ၃ မြို့မှ မျိုးစေ့ချခဲ့သော အမွေအနှစ်များဖြစ်သည်ဟုဆိုပါလျှင် မှန်ကန်ခြင်းရှိ/မရှိနှင့် အဆိုပါ ပုဂံပြည်ရှိ ရှေးဟောင်းစေတီပုထိုးကျောင်းများနှင့် ယဉ်ကျေးမှုအနုပညာလက်ရာ အမွေအနှစ်များ၊ ကျောက်စာများတို့သည် သုဝဏ္ဏဘူမိ သထုံပြည် မွန်တို့ယဉ်ကျေးမှုကို အခြေခံ၍ ရရှိလာသော ယဉ်ကျေးမှုအမွေအနှစ်များဖြစ်သည်ဟု ဆိုပါလျှင် မှန်ကန်ခြင်းရှိ/မရှိ၊ ပျူမြို့ဟောင်း ၃ မြို့တို့သည် ပုဂံခေတ်အား ဘာသာသာသ နာ ယဉ်ကျေးမှုဆိုင်ရာ အမွေအနှစ်များ အဆင့်အတန်းမြင့်မားမှု ကျန်ရစ်အောင် မျိုးစေ့ချခဲ့ခြင်း ဆိုသည့် ကိစ္စသည် မှန်ကန်မည်ဆိုပါက (က) ပုဂံခေတ်သည် ယဉ်ကျေးမှုအမွေအနှစ်များ အဆင့်မြင့် မားနေရန် လိုအပ်မည်ဖြစ်ပါသော်လည်း အနော်ရထာမင်းလက်ထက်အထိ ပုဂံပြည်ကို အရည်းကြီး ရဟန်းအယူဝါဒများ အဘယ်ကြောင့် လွှမ်းမိုးခြင်းခံနေရပါသနည်း။ (ခ) ပုဂံပြည့်ရှင် အနော်ရထာမင်း ကြီးသည် သထုံပြည်မှ ကြွရောက်လာသော အရှင်အရဟံအမည်ရှိ မွန်ရဟန်းတော်ထံမှ ဗုဒ္ဓဘာသာ အယူဝါဒအဆုံးအမများတို့ကို လက်ခံရယူရန် အဘယ်ကြောင့် လိုအပ်ပါဦးမည်နည်း။ (ဂ) ပုဂံပြည့်ရှင် အနော်ရထာမင်းကြီးသည် ပိဋကတ်တော် အစုံ ၃၀ နှင့် စာပေပရိယတ္တိများ၊ ယဉ်ကျေးမှုအနုပညာများ၊ ပန်း ၁၀ မျိုးပညာရှင်များ အစရှိသော အမွေအနှစ်များတို့ကို သထုံပြည့်ရှင် မနူဟာမင်းထံ တိုက်ခိုက် သိမ်းယူရန် အဘယ်ကြောင့်လိုအပ်ပါဦးမည်နည်း အစရှိသည်တို့ကို သိရှိလိုပါကြောင်း မေးမြန်းပါ သည်။