ငပုတောမြို့နယ်၊ ငရုတ်ကောင်းမြို့နယ်ခွဲနှင့် ဟိုင်းကြီးကျွန်းမြို့နယ်ခွဲတွင် ငရုတ်ကောင်းမြို့နယ်ခွဲ၊ အုန်းကျွန်းကြီးတွင် ဒေသခံ ပန်းမောဒေသက တောင်သူများသည် သူတို့၏ ရေရှည်အကျိုးစီးပွားအတွက် သက်သက်နေမည်ဆို၍ အုန်းပင်တို့၊ ကွမ်းသီးပင်နှင့် အခြားရာသီပေါ်သီးနှံများ စိုက်ပျိုးထားပါကြောင်း၊ ပင်လယ်ပြင်လုံခြုံရေးအရဆို၍ အမှတ်(၂၇၁)တပ်ရင်းမှ အုန်းကျွန်းကို သိမ်းယူပြီး ဒေသခံတောင်သူများမှာ မည်သည့်အကျိုးခံစားခွင့်မှ မရရှိဘဲ ဆင်းရဲဒုက္ခခံစားနေရပါကြောင်း၊ ထို့အပြင် ဟိုင်းကြီးကျွန်းမြို့နယ်ခွဲ ဒီးဒူးကုန်းကျေးရွာအုပ် ထိပ်စွန်းတပ်စခန်းတွင် တပ်စခန်းချရန် အမှတ်(၂၇၁) တပ်ရင်းကပဲ စခန်းတစ်ခု ပြုလုပ်ထားသဖြင့် တောင်သူများပိုင်ဆိုင်သော အိုးအိမ်၊ ခြံမြေနှင့် လယ်ယာမြေများစွာ ပါဝင်သွားပါကြောင်း၊ တပ်ခြံအပြင်ဘက်တွင် ကျန်နေသောလယ်မြေ ၁၂ ဧကကိုလည်း ဒေသခံတောင်သူများက ပြန်လည်လုပ်ကိုင်လိုကြောင်း မိမိတို့ တင်ပြသော်လည်း ယနေ့အထိ အကြောင်းတစ်စုံတရာ ပြန်ကြားခြင်းမရှိပါကြောင်း။

ထို့နောက် မြောင်းမြမြို့နယ် ပျဉ်ပုံကျေးရွာအုပ်စု ညောင်းချောင်းလေးကျေးရွာအုပ်စုတွင် အမှတ်(၂၇) တပ်ရင်း (မအူပင်)၊ အမှတ်(၉၈) တပ်ရင်း (ဖျာပုံ)၊ အမှတ်(၆၃) တပ်ရင်း (အိမ်မဲ)၊ အမှတ်(၅၃၄) တပ်ရင်း (မော်လမြိုင်ကျွန်း)၊ အမှတ်(၉၃) တပ်ရင်း (မြောင်းမြ) စသည့်တပ် ၅ တပ်မှ တပ်ရင်းတစ်ရင်းကို ဧက ၁၀၀ စီ ရော်ဘာစိုက်ရန် သိမ်းယူထားပါကြောင်း၊ မိမိတို့ လယ်ယာမြေကော်မရှင်များ သွားရောက်ပြီး အစီရင်ခံရာတွင် တပ်နှင့်တစ်ဆက်တစ်စပ်တည်း မရှိသည့်အတွက် ပြန်လည်ပေးရန် တင်ပြထားပါကြောင်း၊ သို့သော် ယနေ့အထိ ပြန်လည်မရရှိသည့်အပြင် အမှတ်(၂၇)တပ်ရင်း (မအူပင်)မှ ၃ ဦး၊ နှင့် အမှတ် (၉၈)တပ်ရင်း (ဖျာပုံ)တပ်ရင်းမှ ၉ ဦးကို တရားစွဲဆိုထားသည့်အတွက် တိုင်းတရားရုံးတွင် တရားရင်ဆိုင်နေကြရပါကြောင်း၊ တပ်မတော် တပ်ရင်းတပ်ဖွဲ့များ သိမ်းဆည်းထားသောမြေများနှင့်ပတ်သက်၍ မည်ကဲ့သို့ ပြန်လည်ဆောင်ရွက်ပေးမည်ကို သိရှိလိုကြောင်း မေးမြန်းပါသည်။