လွှတ်တော်နှင့် အစိုးရ စတင်ချိန်မှစပြီး လယ်သမားများအကျိုးအတွက် လယ်ယာမြေဥပဒေ ၂၀၁၂ နှင့် တောင်သူလယ်သမားအခွင့်အရေး ကာကွယ်ရေးနှင့် အကျိုးစီးပွားမြှင့်တင်ရေးဥပဒေ၊ နည်းဥပဒေများကို ပြဋ္ဌာန်းပေးခဲ့သည့်အပြင် လယ်သမားများ နှစ်ပေါင်းများစွာ စုဆောင်းထားသော စုဆောင်းငွေများကိုလည်း ပြန်လည်ပေးအပ်ခဲ့ပါကြောင်း၊ ထို့အပြင် စိုက်ပျိုးစရိတ်ချေးငွေဖြင့် တစ်ဧကကို ယခင်က ကျပ် ၂၀၀၀၀ နှုန်း ချီးမြှင့်နေရာ ယခုအချိန်တွင် ငါးဆတိုးပြီး တစ်ဧကလျှင် ကျပ် ၁၀၀၀၀၀ နှုန်း တိုးမြှင့်ချေးပေးခဲ့သည့်အတွက် လယ်သမားများက များစွာကျေးဇူးတင်ရှိပါကြောင်း၊ ထို့အပြင် ယခင်က စိုက်ပျိုးစရိတ်ချေးငွေ ချေးယူရာတွင် ငွေ ၁၀၀ လျှင် အတိုးနှုန်းဖြင့် တစ်ကျပ်၊ ပြား ၈၀ ခန့်ယူရာမှ ယခုအခါ လေးဆခွဲခန့်လျှော့ပြီး ၄၂ ပြားနှုန်းအထိ လျှော့ချပေးခြင်းအတွက်လည်း လယ်သမားများ ကျေးဇူးတင်ရှိပါကြောင်း၊ သို့ရာတွင် အကြောင်းအမျိုးမျိုးကြောင့် ပြန်ဆပ်ရန်ကာလကျော်လွန်ပြီးမှ ပေးဆပ်နိုင်သည့် လယ်သမားများအတွက် ဒဏ်တိုးဖြင့် သတ်မှတ်ထားသည့်နှုန်းထားများမှာ ယခင်နှုန်းထား အတိုးနှုန်း တစ်ကျပ်၊ ပြား ၈၀ နှုန်းထားက ယူခဲ့သည့်အတိုင်း တစ်ဧကကို ငွေ ၁၀၀ ကို တစ်လကို တစ်ကျပ်နှုန်းဖြင့် သတ်မှတ်ပေးခဲ့ပါကြောင်း၊ ယခုအခါ အတိုးနှုန်း ၄၂ ပြားနှုန်း သတ်မှတ်ထားချိန်တွင် ငွေတစ်ရာကို တစ်လလျှင် ဒဏ်တိုးဖြင့် ၁ ကျပ်နှုန်း သတ်မှတ်ထားသည့်အတွက် အတိုးနှုန်း နှစ်ဆခွဲခန့်တိုးပြီး ကောက်ယူနေသကဲ့သို့ ဖြစ်နေသည့်အတွက် စိုက်ပျိုးစရိတ်ချေးငွေ ပေးဆပ်ရန်ခက်ခဲနေပြီး သတ်မှတ်ကာလထက်ကျော်လွန်သော လယ်သမားများအတွက် ဝန်ထုတ်ဝန်ပိုး ဖြစ်စေသည့်အတွက် လယ်သမားများ စိုက်ပျိုးစရိတ်ချေးငွေ ပြန်လည်ပေးဆပ်ရာတွင် သတ်မှတ်ကာလထက်ကျော်လွန်ပါက ပေးဆောင်သောဒဏ်တိုးကျသင်‌့ငွေကို ပယ်ဖျက်ပေးရန် သို့မဟုတ် နှုန်းထားပြင်ဆင်ပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။