ယခုအချိန်တွင် နိုင်ငံံံ့ဝန်ထမ်း ၁ သန်းခန့်နှင့် ၎င်းတို့မှီခိုနေရသော မိသားစု ၃ သန်းခန့်သည် တိုးမြှင့်ရရှိလာမည့်လစာကို မျှော်လင့်နေကြပါကြောင်း၊ နိုင်ငံ့ဝန်ထမ်းမဟုတ်သော ကျန်ရှိသည့် ပြည်သူ သန်း ၅၀ က လည်း နိုင်ငံ့ဝန်ထမ်းများ၏ လစာကို သင့်တင့်မျှတသော လစာသို့တိုးမြှင့်ပေးစေလိုကြပါကြောင်း၊ အကျိုးဆက်အဖြစ် ထွက်ပေါ်လာမည့် ဝန်ထမ်းမိသားစုများ၏ဘဝ သာယာချမ်းမြေ့ခြင်းနှင့်အတူ သန့်ရှင်းသောအစိုးရ၊ ကောင်းမွန်သော အုပ်ချုပ်ရေးကိုလည်း မျှော်လင့်တောင့်တ လိုလားကြပါကြောင်း။

နိုင်ငံ့ဝန်ထမ်းများ လစာတိုးလျှင် ကုန်ဈေးနှုန်းတက်မည်၊ ငွေကြေးဖောင်းပွမည်ဟူသော အစွဲအလမ်းသည် နိုင်ငံ့ဝန်ထမ်းများအပါအဝင် ပြည်သူအားလုံး၏ စိတ်တွင် ခြောက်လန့်နေပါကြောင်း၊ ထိုအစွဲအလမ်းကြောင့် နိုင်ငံ့ဝန်ထမ်းများ၏စိတ်တွင်လည်း မိမိတိုးရမည့်လစာ၊ တိုးရမည့်ကုန်ဈေးနှုန်းနှင့် ကာမိပါ့မည်လားဟု စိတ်ပျက်အားလျော့မှုများ ဖြစ်ပေါ်နေပါကြောင်း၊ နိုင်ငံ့ဝန်ထမ်းမဟုတ်ဘဲ ကျန်သော ပြည်သူသန်း ၅၀ ကလည်း ဝန်ထမ်းများအား လစာတိုးပေးပါက ကုန်ဈေးနှုန်းများ တက်လာလျှင် ဒုက္ခရောက်နိုင်သည်ဟု ဝန်ထမ်းများ၏ လက်ရှိနိမ့်ပါးနေသော လစာကို စာနာမိသော်လည်း မိမိတို့ကြုံတွေ့လာနိုင်မည့် အခက်အခဲကို ရင်မဆိုင်နိုင်သည့်အတွက် ဝန်ထမ်း ၁ သန်း၏ဘဝကို စာနာမပေးနိုင်တော့သည့်အတွေးများ ပေါ်ပေါက်နေရပါကြောင်း၊ ယင်းအစွဲအလမ်းများသည် အကြောင်းမဲ့ဖြစ်ပေါ်လာခြင်းမဟုတ်ဘဲ အစဉ်အလာရှိခဲ့သည်ကို တွေ့ရှိရပါကြောင်း၊ လစာတက်ပေးမည်ဟု သတင်းရသည်နှင့် ဆန်များကို မူလက တစ်အိတ်ချင်းဝယ်သူက ၃ အိတ်၊ ၅ အိတ်အထက် ဝယ်သည့်အတွက် သုံးစွဲမှုမတိုးသော်လည်း ဝယ်လိုအားတက်သွားသဖြင့် ရောင်းသည့်ကုန်သည်၊ တောင်သူများကလည်း မရောင်းတော့သဖြင့် ရောင်းလိုအားကျသွားပြီး ကုန်ဈေးနှုန်းများ တက်လာခြင်းဖြစ်ပါကြောင်း။

အထက်ပါဖြစ်စဉ်ကို သုံးသပ်ပါက ကုန်ဈေးနှုန်းတက်သွားရခြင်းသည် နိုင်ငံ့ဝန်ထမ်းများကို ပိုမို တိုးမြှင့်ပေးလိုက်သောငွေနှင့် ဝန်ထမ်းများက ပိုမိုသုံးစွဲ၍မဟုတ်ဘဲ အားလုံး၏ စိတ်ထဲတွင်ရှိနေသော၊ ယုံကြည်စွဲလမ်းနေ‌သော စိတ်အစွဲကြောင့်ဖြစ်သည်ကို တွေ့ရှိရပါကြောင်း၊ ထို့အတူ ကုန်ဈေးနှုန်းများ၏ ပင်မသော့ချက်ဖြစ်သည် ဈေးနှုန်း၊ နိုင်ငံခြားငွေလဲနှုန်းတွင်လည်း ထိုကဲ့သို့ အစွဲအလမ်းများကြောင့် ဝန်ထမ်းလစာတိုးသည်နှင့် ဒေါ်လာဈေးများတက်လာမည်ဟူသော အစွဲကြောင့် ဝယ်သူများက ပိုမိုဝယ်ယူစုဆောင်းမှုများကြောင့် ရောင်းသူများကလည်း ဈေးမြှင့်ပြီးမှ ရောင်းသည့်အတွက် ဒေါ်လာဈေးများ တက်လာပါကြောင်း၊ ဒေါ်လာဈေးများတက်လာသည်နှင့် ၎င်းနှင့်ဆက်စပ်နေသော သွင်းကုန်၊ ပို့ကုန် အားလုံးသည် စားအုန်းဆီမှ အပ စားသုံးကုန်ပစ္စည်းအားလုံး ဈေးတက်ပါသဖြင့် ဝန်ထမ်းလစာ တိုးမြှင့်ချိန်တွင် ကုန်ဈေးနှုန်းတက်ရခြင်းသည် အစွဲအလမ်းကြောင့် ဖြစ်ပေါ်နေသည်ကို တွေ့ရှိရပါကြောင်း၊ သို့ဖြစ်ပါ၍ နိုင်ငံ့ဝန်ထမ်းများလစာတိုးပေးချိန်တွင် ယုံကြည်ချက် အစွဲအလမ်းကြောင့် ဖြစ်ပေါ်လာနိုင်သော ကုန်ဈေးနှုန်းကြီးမြင့်မှုကို စီမံချက်ချ ဆောင်ရွက်ထားသင့်ပြီး ဆောင်ရွက်ထားသောစီမံချက်ကို ပြည်သူလူထုအား အသိပေးထားသင့်ပါကြောင်းနှင့် သက်ဆိုင်ရာအဖွဲ့အစည်းများ ဝန်ထမ်းလစာတိုးမြှင့်ချိန်တွင် ကုန်ဈေးနှုန်းကြီးမြင့်ခြင်း နောက်ဆက်တွဲဖြစ်ရပ် ဖြစ်ပေါ်မလာစေရန် စီမံချက်ချဆောင်ရွက်ထားရန်ရှိ/မရှိနှင့် ရှိပါက မည်သို့စီမံဆောင်ရွက်ထားသည်ကို သိရှိလိုကြောင်း မေးမြန်းပါသည်။