(ခ)-ဟုမ္မလင်းမြို့နယ်တွင် မြေသားတစ်မိုင်ခန့်နှင့် နမ်ဖယ်ချောင်းဖြတ်သံကူကွန်ကရစ်တံတားတစ်စင်း လိုအပ်နေပါသဖြင့် ၂၀၁၆-၂၀၁၇ ဘဏ္ဍာရေးနှစ် တွင် ဆောင်ရွက်ပေးနိုင်ခြင်း ရှိ/ မရှိနှင့် စပ်လျဉ်း သည့်မေးခွန်း
၂၀၁၃-၂၀၁၄ ဘဏ္ဍာနှစ်က စစ်ကိုင်းတိုင်းဒေသကြီး၊ ဟုမ္မလင်းမြို့နယ်တွင် နယ်စပ်ရေးရာဝန်ကြီးဌာနက နမ်စကား-ခေါင်ငိုး-နမ်တော ကျေးရွာချင်းဆက်လမ်းကို သန်းပေါင်း ၆၀၀ ခွင့်ပြုထားပါကြောင်း၊ သို့သော် ၎င်းလုပ်ငန်းကို ၂၀၁၄-၂၀၁၅ တွင် မွေးမြူရေး၊ ရေလုပ်ငန်းနှင့် ကျေးလက်ဒေသဖွံ့ဖြိုးရေးဝန်ကြီးဌာနကို လွှဲပြောင်းပေးခဲ့ရာ တင်ဒါခေါ်ယူပြီး ကုမ္ပဏီများကို တာဝန်ယူစေပြီး သံကူကွန်ကရစ်တံတားနှင့် လမ်းမိုင် ၆ မိုင် ကို ဂရိတ်ရန်းကုမ္ပဏီက ဆောင်ရွက်ခဲ့ပါကြောင်း၊ ဂရိတ်ရမ်းကုမ္ပဏီက အင်ဂျင်နီယာအား မိမိအနေဖြင့် တွေ့ဆုံမေးမြန်းရာ တံတား တစ်စင်းမှ မဆောက်ဖူးသေးကြောင်း ပြောကြားသဖြင့် တံတားဆောက်လုပ်ရေးတွင် အတွေ့အကြုံနည်းပါးသဖြင့် အလုပ်လုပ်ချိန်တွင် အမှားအယွင်းများ ဖြစ်လာပြီး အချိန်မီ ပြီးစီးခြင်းမရှိပါကြောင်း၊ ငွေကြေးများလည်း မှားယွင်းပြီး ပြင်ဆင်ရသည့်အတွက် ငွေကြေးက မလုံလောက်မှုများ ဖြစ်လာပါကြောင်း၊ မြေသားလမ်း ၁ မိုင်နှင့် နမ်တော့ဝင်ရမည့် နမ်ဖယ်ချောင်းဖြတ်ကာ တံတားတစ်စင်း ကျန်ရှိနေရာ ၂၀၁၅-၂၀၁၆ ဘဏ္ဍာနှစ်တွင် ဆောင်ရွက်ဆဲလုပ်ငန်းဖြစ်သည့်အတွက် လျာထားပေးမည်ဟု ယူဆသော်လည်း BE တွင် ပါမလာခဲ့ပါကြောင်း၊ သို့ဖြစ်ပါ၍ ယင်းလမ်းနှင့် တံတားအတွက် မည်သို့ဆောင်ရွက်ပေးမည်နှင့် ၂၀၁၆- ၂၀၁၇ ဘဏ္ဍာနှစ်တွင် ဆောင်ရွက်ပေးနိုင်ခြင်း ရှိ/မရှိ သိရှိလိုကြောင်း မေးမြန်းပါသည်။