မိမိအနေဖြင့် လူဝင်မှုကြီးကြပ်ရေးနှင့်ပြည်သူ့အင်အား ဝန်ကြီးဌာနနှင့် ပတ်သက်သော ကာလကန့်သတ်ချက် မရှိဘဲ ထုတ်ပေးထားသည့် White Card ကိစ္စကိုလည်းကောင်း၊  အိမ်ထောင်စု လူဦးရေစာရင်းနှင့် သန်းခေါင်စာရင်းများ၊ နိုင်ငံသားလက်မှတ်များထုတ်ပေးသော ကိစ္စနှင့် စပ်လျဉ်းသည့် မေးခွန်းများကို လည်းကောင်း မေးမြန်းလိုပါကြောင်း၊  မိမိအနေဖြင့် ပထမ မေးခွန်းနှင့် ယခုမေးခွန်းများကို အဆိုအနေဖြင့် ၂၀၁၄ ခုနှစ်၊ ဒီဇင်ဘာလ ၃၁ ရက်နေ့တွင် မေးခွန်းအနေနှင့် ပြောင်းလဲမေးမြန်းခဲ့ခြင်းဖြစ်ပါကြောင်း၊ သမ္မတရုံးက ဖေဖော်ဝါရီလ ၁၁ ရက်နေ့တွင် White Card နှင့် ပတ်သက်ပြီး ထွက်ရှိလာသည့် ကြေညာချက်နှင့် ပတ်သက်၍လည်း  အသေးစိတ်ရှင်းလင်းပေးစေလိုပါကြောင်း၊  ဒုတိယမေးခွန်း အနေဖြင့် နိုင်ငံသားစိစစ်ရေး လက်မှတ်၊ အိမ်ထောင်စုလူဦးရေစာရင်းများနှင့် ပတ်သက်၍ နိုင်ငံတော်က  မိုးပွင့်(၁)မှ (၇)အထိ ဆောင်ရွက်ခဲ့ပြီးဖြစ်သည့်အပြင် ယနေ့ ဇန်နဝါရီလ ၁ ရက်နေ့မှ ဇွန်လ ၃၀ ရက်နေ့အထိ မိုးပွင့်အထူး စီမံချက်ကို ထပ်မံဆောင်ရွက်ဦးမည်ဖြစ်သည့်အပြင် ယင်းစီမံချက်အတွက် နိုင်ငံတော် ဘတ်ဂျက်မှ ကျပ်သန်းပေါင်း ၄၁၄.၃၃၁ သန်း သုံးစွဲသည်ဟုကြားသိရပါကြောင်း၊ မိမိအနေဖြင့် သိချင်သည်မှာ မိုးပွင့်အထူး စီမံကိန်းများဆောင်ရွက်ရာတွင် နိုင်ငံတော်ရှိ အိမ်ထောင်စုလူဦးရေစာရင်းနှင့်သန်းခေါင် စာရင်းမရှိသေးသော သူမျးအားလုံးကို ထုတ်ပေးနိုင်ခြင်းရှိ/မရှိ၊ မရှိပါက မည်သည့်အစီအစဉ်ဖြင့် ဆောင်ရွက်မည်ကို သိရှိလိုပါကြောင်း၊ မိုးပွင့်စီမံကိန်းများကို ရပ်ရွာများကို မိုးပွင့်အထူးစီမံကိန်းဟူ၍ တစ်နေ့လျှင် ၁၀ ယောက်ခန့်သာ ဆောင်ရွက်ပေးခဲ့ပြီး ကျန်သည့်ရက်များတွင် ရုံးများသို့ခေါ်ဆောင်ကာ အပေးအယူဖြင့် ဆောင်ရွက်နေကြခြင်း၊ လူကြီးများလာရောက်စစ်ဆေးသည့် နေ့ရက်များတွင်သာ  အခမ်းအနားနှင့် ဆောင်ရွက်၍ ကျန်သည့်ရက်များတွင် ပုံမှန်အတိုင်းသာဆောင်ရွက်ခြင်းများကို တွေ့ရှိရပါကြောင်း၊ ယနေ့ မိမိတို့နိုင်ငံတွင် အများဆုံး ကြုံတွေ့နေရသည်မှာ ကျူးကျော်ကိစ္စရပ်များဖြစ်၍ ယင်းနှင့် ပတ်သက်ပြီးလည်း  ၂၀၁၅  ရွေးကောက်ပွဲမီသည်ဖြစ်စေ နိုင်ငံတော်တွင် အစီအစဉ်တစ်ရပ်ရှိရန်လိုအပ်ပါကြောင်း၊    ထို့ကြောင့် အိမ်ထောင်စုလူဦးရေစာရင်းနှင့် သန်းခေါင်စာရင်းပေးရန် အခက်အခဲများကို ဖြေရှင်းပေးရန်လည်း လိုအပ်ပါကြောင်း၊ ယခု အဓိကကြုံတွေ့ရသည်မှာ နိုင်(၂)၊ ပုံစံ(၁၆)၊ မျိုးရိုးစဉ်ဆက်ဖြည့်ခြင်းစသည်များတွင် Fax အသုံးပြုခြင်း၊ ဖုန်းနှင့် ဆက်သွယ်ခြင်းများကို ဆောင်ရွက်မည်ဆိုပါက ပြည်သူကိုယ်တိုင်သွားရောက်ရန် မလိုသည့်အတွက် ပိုမိုအဆင်ပြေချော့မွေ့နိုင်မည်ဖြစ်ရာ မြို့နယ်ရုံးများသို့ ယခုခွင့်ပြုထားသော ဖုန်း အသုံးပြုငွေကိုလည်း တိုးမြှင့်ပေးရန်လိုအပ်သည့်အတွက် အထက်ပါမေးခွန်းများ ကို ဆောင်ရွက်ပေးနိုင် ခြင်းရှိ/မရှိ မေးမြန်းပါသည်။