ရခိုင်ပြည်နယ်အတွင်းရှိ ယာယီသက်သေခံ လက်မှတ်ကိုင်ဆောင်ထားသူများကို ၎င်းတို့ နေထိုင်လျက်ရှိသည့် နယ်မြေများမှ အခြားသော နေရာဒေသများသို့ သွားလာခွင့်မပြုရန် မည်သည့်ဥပဒေအရ ကန့်သတ်တားမြစ်ထားပါသနည်း၊ ထိုသို့ခွင့်မပြုခြင်းသည် လူ့အခွင့်အရေးချိုးဖောက်နေခြင်း ဟုတ်/မဟုတ် သိလိုခြင်းနှင့် စပ်လျဉ်းသည့် မေးခွန်း

ရခိုင်ပြည်နယ် မြို့နယ်အချို့တွင် ရခိုင်လူမျိုးအချို့နှင့်ဘင်္ဂါလီလူမျိုးအချို့တို့ကို လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက ယာယီသက်သေခံလက်မှတ်များထုတ်ပေးပြီး ကိုင်ဆောင်ခွင့်ပြုထားပါကြောင်း၊ ယာယီသက်သေခံ လက်မှတ်ကိုင်ဆောင်ထားသူများကို နိုင်ငံတော်၏အချုပ်အခြာအာဏာနှင့်သက်ဆိုင်သည့် ဆန္ဒခံယူပွဲ၊ အဆင့်ဆင့်သောရွေးကောက်ပွဲတို့တွင် မဲပေးခွင့်ပြုထားခြင်းသည် နိုင်ငံသားများသာလျှင် ရနိုင်သည့် အခွင့်အရေးများကို ဥပဒေအရခွင့်ပြုထားခြင်းဖြစ်သည့်အတွက် ထိုသူများကို ဒေသတစ်ခုအတွင်း၌ လှောင် ပိတ်ထားခြင်းသည် ဥပဒေနှင့်မညီသည့်အပြင် လူ့အခွင့်အရေးများကိုလည်း ချိုးဖောက်ခြင်းဖြစ်သည် ဟုသုံးသပ်မိပါကြောင်း၊  

ထို့ကြောင့် (၁) ရခိုင်ပြည်နယ်အတွင်းရှိ ယာယီသက်သေခံလက်မှတ် ကိုင်ဆောင်ထားသူများကို ၎င်းတို့ နေထိုင်လျက်ရှိသည့် နယ်မြေများမှ အခြားနေရာဒေသများသို့ သွားလာခွင့်မပြုရန် မည်သည့်ဥပဒေအရ တားမြစ်ကန့်သတ်ထားသည်နှင့် အဘယ်ကြောင့် ထိုသို့ ကန့်သတ်ထားသည်ကိုလည်းကောင်း၊ (၂) ၂၀၀၈ ခုနှစ်၊ ဖွဲ့စည်းပုံအခြေခံဥပဒေပုဒ်မ ၃၅၅ တွင် နိုင်ငံသားတိုင်းသည် ပြည်ထောင်စုသမ္မတမြန်မာနိုင်ငံတော် အတွင်း မည်သည့်အရပ်ဒေသ၌မဆို အခြေချစိုက်နေထိုင်ခွင့်ရှိသည်ဟူသော ပြဋ္ဌာန်းချက်ကို ယာယီသက်သေခံ လက်မှတ် ကိုင်ဆောင်ထားသူများအား မည်သည့်အတွက် ခွင့်မပြုသည်ကိုလည်းကောင်း၊ (၃) ရာဇဝတ်မှု တစ်ခုခုဖြင့် အရေးယူခံထားရခြင်းမရှိသည့် ယာယီသက်သေခံလက်မှတ် ကိုင်ဆောင်ထား သူများကို ကန့်သတ်ထားသည့်ဒေသမှ ပြင်ပသို့ သွားရောက်နေထိုင်ခွင့်မပြုခြင်းသည် ၎င်းတို့အပေါ်၌ လူ့အခွင့်အရေးများ ချိုးဖောက်နေခြင်းဖြစ်ခြင်း ဟုတ်/မဟုတ်ဆိုသည်ကို သိရှိလိုကြောင်း မေးမြန်းပါသည်။