အထက်ချင်းတွင်းဒေသ မော်လိုက်ခရိုင်၊ ခန္တီးခရိုင်၊ နာဂကိုယ်ပိုင် အုပ်ချုပ်ခွင့်ရဒေသများ၏ ကုန်စည်စီးဆင်းမှုသည် ချင်းတွင်းမြစ်ဖြစ်ပါကြောင်း၊ ကုန်စည်စီးဆင်းမှုလမ်းကြောင်းမှာ မုံရွာ- သက္ကယ်ကျင်း- ဖောင်းပြင်- ဟုမ္မလင်း- ခန္တီး မဟာဗျူဟာလမ်းကြောင်းဖြစ်ပါကြောင်း၊ ချင်းတွင်းမြစ်ရေသည် တစ်နှစ်ထက်တစ်နှစ် လျော့ပါးလာပြီး မုံရွာကနေ ပစ္စည်းတင်လိုက်သည့် ပစ္စည်းတစ်ခုကို ဆောင်းရာသီမှာ တင်မည်ဆိုပါက ၂၅ ရက်ကြာမှ ခန္တီးကိုရောက်ပါကြောင်း၊ နွေရာသီဆိုလျှင် ၃၅ ရက်ကြာမှ ခန္တီးကိုရောက်ပါကြောင်း၊ ထို့ကြောင့် အချိန်နှင့်တစ်ပြေးညီ တည်ဆောက်ရေး လုပ်ငန်းလုပ်သည့်အခါတွင် များစွာအခက်အခဲရှိနေခြင်းကို တွေ့ရပါကြောင်း၊ မုံရွာ- သက္ကယ်ကျင်း- ဖောင်းပြင်- ဟုမ္မလင်း- ခန္တီး မဟာဗျူဟာလမ်းကို ဆောက်လုပ်ရေးဝန်ကြီး ဌာနအနေဖြင့် အပိုင်းလိုက် ပြုပြင်နေသည်ကို လည်းတွေ့ရှိရသည့်အတွက်ကြောင့် ပြည်သူ လူထုကိုယ်စား ကျေးဇူးတင်အပ်ပါကြောင်း၊ ၎င်းလမ်းကို အမာခံကျောက်ခင်းလမ်း၊ အမာခံတံတားများ အပြီးအစီးမည်သည့် ဘဏ္ဍာရေးနှစ်တွင် ဆောင်ရွက်သွားမည်ကို သိရှိလိုပါကြောင်း မေးမြန်းပါသည်။