(ဃ)-ငပလီကမ်းခြေဒေသနှင့် မြောက်ဦးမြို့သို့ လာရောက် လည်ပတ်သည့် ကမ္ဘာလှည့် ခရီး သွားများအတွက် လုံခြုံရေးရဲတပ် ဖွဲ့ဖွဲ့စည်းပေး ရန်နှင့်ရေပြင် သက်စောင့်သက်ကယ်လုပ်ငန်း များမည်သို့ဆောင်ရွက်ပေးမည်ကိုသိလိုခြင်းနှင့် စပ်လျဉ်းသည့် မေးခွန်း
မိမိတို့ ငပလီကမ်းခြေဒေသသည် သာယာလှပသောကြောင့် တစ်ကမ္ဘာလုံးမှ နိုင်ငံခြားသားခရီးသည်များ လာရောက်လည်ပတ်လျက်ရှိပါကြောင်း၊ ထို့ကြောင့် ငပလီကမ်းခြေဒေသမှာရှိ လေယာဉ်ကွင်းသည်လည်း တစ်နှစ်ပတ်လုံး လာရောက်မှုများပြားလာသည့် အတွက်ကြောင့် ငပလီကမ်းခြေဒေသကို နိုင်ငံတော်မှ ဟိုတယ်ဇုန်အဖြစ် ကမ္ဘာလှည့်ခရီးသွားဟိုတယ်ဇုန်အဖြစ် သတ်မှတ်ထားပြီး မြို့အဖြစ်လည်း အဆင့်မြှင့်တင် ပေးထားပြီးဖြစ်ပါကြောင်း၊ ယခုလို ကမ္ဘာလှည့်ခရီးသည်များ လာရောက်မှုများပြားလာသည့် အတွက်ကြောင့် ကမ္ဘာလှည့်ခရီးသည်များ၏ လုံခြုံရေးကို စောင့်ရှောက်ပေးရန် လိုအပ်နေပါကြောင်း၊ မနှစ်က ကမ္ဘာလှည့်ခရီးသည် မတော်တဆထိခိုက်မှုနှင့် ပင်လယ်တွင်းရေနစ် သေဆုံးမမှုများဖြစ်ပွားခဲ့ပါကြောင်း၊ အခြားမှုခင်းများ ဖြစ်ပွားမှုမရှိစေရန်အတွက် ကြိုတင်ကာကွယ်ထားရန်လည်း လိုအပ်ပါကြောင်း၊ ထို့ကြောင့် နေပြည်တော်၊ ပုဂံ၊ မန္တလေး၊ ရန်ကုန်မြို့ကြီးများကဲ့သို့ ကမ္ဘာလှည့်ခရီးသွားလုပ်ငန်း လုံခြုံရေးရဲတပ်ဖွဲ့ ဖွဲ့စည်းပြီး ခရီးသည်များကို စောင့်ရှောက်ပေးနိုင်ခြင်းနှင့် အသက်အန္တရာယ်လုံခြုံရေးအတွက် ရေပြင်သက်ကယ်လုပ်ငန်းများ၊ ရေပြင်သက်စောင့်တပ် ဖွဲ့ဝင်များကိုလည်း ထားပေးခြင်းရှိပါက ပိုမိုသင့်လျော်မည်ဟု ယူဆမိပါကြောင်း၊ သံတွဲမြို့နယ်ရှိ ငပလီကမ်းခြေဒေသနည်းတူ ရခိုင်ပြည်နယ်မြောက်ဘက်မှာရှိ မြောက်ဦးမြို့တွင်လည်း ရှေးဟောင်းဘုရားဆင်းတု ပုထိုးများရှိသည့်အတွက်ကြောင့် ကမ္ဘာလှည့်ခရီးသည်များလည်း တစ်နှစ်ပတ်လုံး လာရောက်လေ့လာနေကြပါကြောင်း၊ ထို့ကြောင့် မြောက်ဦးမြို့နယ်တွင် ကမ္ဘာလှည့်ခရီးသွားလုပ်ငန်း လုံခြုံရေး၊ ရဲတပ်ဖွဲ့ ဖွဲ့စည်းပေးရန်အတွက်လည်း ဖွဲ့စည်းပေးနိုင်ခြင်းရှိ/မရှိ ဖွဲ့စည်းပေးနိုင်မည်ဆိုပါက မည်သည့်အချိန်တွင် ဖွဲ့စည်းပေးနိုင်ပါမည်နည်းနှင့် ကမ္ဘာလှည့်ခရီးသွားများအတွက် ရေပြင်သက်စောင့်၊ ရေပြင်သက်ကယ်လုပ်ငန်းကို မည်ကဲ့သို့ ဆောင်ရွက်ပေးနိုင်ပါမည်ကို သိရှိလိုပါကြောင်း မေးမြန်းပါသည်။