နည်းပညာတက္ကသိုလ်၊ ဝိဇ္ဇာ၊ သိပ္ပံနှင့် အခြား တက္ကသိုလ်များတွင် မဟာဘွဲ့၊ ပါရဂူဘွဲ့ တက်ရောက်ဆဲ တက္ကသိုလ် ကျောင်းသူကျောင်းသား၊ သင်တန်းသူ သင်တန်းသားအချို့အနေဖြင့် သင်တန်းတက်ဆဲကာလတွင် အကြောင်းအမျိုးမျိုးကြောင့် ပြည်တွင်းပြည်ပလုပ်ငန်းများတွင် ဝင်ရောက်လုပ်ကိုင်ခဲ့ရသော်လည်း ယခုအချိန်တွင် မြန်မာနိုင်ငံ၌ နိုင်ငံရေးတည်ငြိမ်မှုရရှိလာပြီး စီးပွားရေးအခြေအနေများလည်း ကောင်းမွန်လာပြီ ဖြစ်သည့်အတွက် အဆိုပါကျောင်းသားများအနေဖြင့် မူလတက်ရောက်နေသော သင်တန်းများကို ဆက်လက် တက်ရောက်လိုသည့် ဆန္ဒများရှိပါကြောင်း။ ထို့ကြောင့် အကြောင်းအမျိုးမျိုးကြောင့် ကျောင်းရပ်နား ထားခဲ့ရသည့် မဟာဘွဲ့၊ ပါရဂူဘွဲ့ တက်ရောက်ဆဲ တက္ကသိုလ်ကျောင်းသားကျောင်းသူများ၊ သင်တန်းသူ သင်တန်းသားများကို ဆက်လက် ပညာဆည်းပူးခွင့်၊ တက်ရောက်ခွင့် ရှိ/မရှိနှင့် ပညာဆက်လက်ဆည်းပူး တက်ရောက်ခွင့်ရမည်ဆိုပါက မည်သို့စီစဉ်ဆောင်ရွက်ရမည်နှင့် အစီအစဉ်မရှိပါက မည်သည့်အတွက်ကြောင့် ဖြစ်သည်ကို သိရှိလိုပါကြောင်းမေးမြန်းလိုပါသည်။