နိုင်ငံသားဖြစ်ခြင်း/မဖြစ်ခြင်း သက်သေခံလက်မှတ်ကို နိုင်ငံတော်က ၁၉၅၀ ခုနှစ် ပတ်ဝန်းကျင်မှသာ  စတင်လုပ်ကိုင်နိုင်ပြီး ယနေ့အချိန်ထိ တစ်နိုင်ငံလုံး ဆောင်ရွက်နိုင်ခြင်း မရှိသေးသည်ကို တွေ့ရှိရမည်ဖြစ်ပါကြောင်း၊ နိုင်ငံသားမှတ်ပုံတင်ထုတ်ပေးသည့် နေရာတွင် အဆင့်ဆင့် စစ်ဆေးထုတ်ပေးထားသည့် ဖခင်နိုင်ငံသား၊ မိခင်နိုင်ငံသားနှစ်ဦးမှ မွေးဖွားလာသောကလေးသည် သွေးနှောဖြစ်သည်ဆိုသော အကြောင်းပြချက်ဖြင့် နှစ်နှင့်ချီပြီး စိစစ်နေခြင်း ဖြစ်သင့်/မဖြစ်သင့် ပြန်လည်သုံးသပ်ပေးရန်နှင့် မူလသွေးနှောမိခင်၊ ဖခင်ကတည်းက နိုင်ငံသားဖြစ်သင့်ပါက နိုင်ငံသားကတ်ထုတ်ပေးရန် ငြင်းဆန်ရမည်ဖြစ်သော်လည်း သားသမီးကို ငြင်းဆန်သူ ဖြစ်သင့်/မဖြစ်သင့်နှင့် ၎င်းမိဘနှစ်ဦးမှမွေးဖွားသော သားသမီး ဟုတ်/မဟုတ်သာ စိစစ်သင့်ပါကြောင်းနှင့် သံသယရှိပါက ယနေ့ခေတ် DNA စစ်ဆေးသော နည်းအပါအဝင် နည်းပေါင်းစုံဖြင့် စစ်ဆေးနိုင်ပါကြောင်း။ သို့ဖြစ်ပါ၍ နိုင်ငံသားမိဘနှစ်ပါးမှ မွေးဖွားသော သားသမီးများကို နိုင်ငံသားကတ် ထုတ်ပေးရန် နှစ်ပေါင်းများစွာ ကြံ့ကြာနေပါသဖြင့် နိုင်ငံသားအဖြစ် ဆုံးရှုံးနေခြင်းသည် နိုင်ငံတော်ကို အယုံအကြည်ကင်းမဲ့နေပါသဖြင့် နိုင်ငံသားမိဘနှစ်ပါးမှ မွေးဖွားသူများကို အလွယ်တကူ နိုင်ငံသားကတ် ထုတ်ပေးနိုင်ခြင်းရှိ/မရှိ၊ မရှိပါက မည်သည့်အတွက်ကြောင့်ဖြစ်သည်နှင့် ရှိပါက မည်သည့်ပုံစံဖြင့် ထုတ်ပေးမည်ကို သိရှိလိုကြောင်း မေးမြန်းပါသည်။