(က)-တရုတ်ပြည်မှတင်သွင်းလာသော ပဲပုတ်ဖတ် များတွင်မယ်လမင်းကဲ့သို့ဓာတုအဆိပ်အတောက် ဓာတ်များပါဝင်နေ၍ကျန်းမာရေးဆိုးကျိုးမဖြစ်အောင် ကာကွယ်ရန်နှင့် စပ်လျဉ်းသည့်မေးခွန်း
၁၇-၈-၂၀၁၃ ခုနှစ်ထုတ် Daily Eleven သတင်းစာတွင် တရုတ်နိုင်ငံမှ တင်သွင်းလာသော တိရစ္ဆာန် အစားအစာဖြစ်သည့် ပဲပုတ်ဖတ်များတွင် မယ်လမင်း ဓာတ်များ ပါဝင်နေသည်ဟု ဖတ်ရှုရသဖြင့် စားသုံးသူများကို ကျန်းမာရေးဆိုးကျိုး မဖြစ်စေရန် ကာကွယ်နိုင်ရေးအတွက် မေးမြန်းရပါကြောင်း၊ မြန်မာနိုင်ငံတွင် ပဲဆီ၊ နှမ်းဆီ၊ ပဲပုတ်ဆီများကို ပြည်တွင်း-ပြည်ပမှတင်သွင်းသော စားအုန်း ဆီဈေးနှုန်းနှင့်ယှဉ်၍ မရောင်းနိုင်သည့်အတွက် ဆီစက်များ၏ ၆၀၊ ၇၀ % ရပ်ဆိုင်းနေ ရခြင်းကြောင့် ပြည်တွင်း၌ ကြိတ်ဝါးထုတ်လုပ်သော တိရစ္ဆာန် အစားအစာဖြစ်သည့် ပဲဖတ်၊ နှမ်းဖတ်၊ ပဲပုတ်ဖတ်များ ရှားပါး လာ၍ ဈေးတက်လာ သည်ကို တွေ့ရှိရ ပါကြောင်း၊ သား၊ ငါး၊ ပုစွန်မွေးမြူသူများသည်လည်း တိရစ္ဆာန်အစာရှားပါးမှုကြောင့် အခက်အခဲများ ကြုံတွေ့နေရပြီး တချို့လုပ်ငန်းရှင်များ အရှုံးပေါ်၍ လုပ်ငန်းများ ရပ်ဆိုင်းထားပါကြောင်း၊ ထို့အပြင် သား၊ ငါး၊ ပုစွန်ဈေးနှုန်းများ ၃၀ ရာခိုင်နှုန်းခန့် ကြီးမြင့်လာခြင်းကြောင့် မိမိတို့အနေဖြင့် တိရစ္ဆာန်အစားအစာ ရှားပါးမှုကို ဖြည့်ဆည်းပေးရန် အတွက် လိုအပ်သော တိရစ္ဆာန် အစားအစာများကို အမေရိကန်၊ အာဂျင်တီးနား၊ အိန္ဒိယနှင့် တရုတ်နိုင်ငံတို့မှ စမ်းသပ်မှာယူ တင်သွင်းနေ သည်ကို တွေ့ရှိရပါကြောင်း၊ တရုတ်ပြည်မှ တင်သွင်းလာသော အဆိပ် အတောက်များပါဝင်နေသည့် တိရစ္ဆာန်အစားအစာများကြောင့် သား၊ ငါး၊ ပုစွန်တို့တွင် အဆိပ်အတောက်များ ပါဝင်နိုင်သည်ဟု ယူဆ မိသောကြောင့် စားသုံးသူတို့၏ ကျန်းမာရေးကို ဆိုးကျိုးများဖြစ်စေမည်ဟု သုံးသပ် တွေ့ရှိရပါကြောင်း၊ ထို့ကြောင့် စားသုံးသူများကို ကာကွယ်သောအားဖြင့် သက်ဆိုင်ရာဝန်ကြီးဌာနများမှ မည်သို့ ဆောင်ရွက်ထားသည်ကို သိလိုကြောင်း မေးမြန်းပါသည်။