လမ်းပန်းဆက်သွယ်ရေးခက်ခဲပြီး စီးပွားရေးလုပ်ငန်းကြီးများမရှိဘဲ အဘက်ဘက်က  စီးပွားရေး နိမ့်ကျလျက် ရှိသော ငပုတောမြို့နယ်နှင့် အလားတူ အခြားမြို့နယ်များ၏ စည်ပင်သာယာရေး ရန်ပုံငွေများမှာ နည်းပါးလျက်ရှိပါကြောင်း၊ အဆိုပါနည်းပါးသည့် ရန်ပုံငွေဖြင့်ပင် ဝန်ထမ်းများလစာနှင့် အခြားအသုံးစရိတ်များ ခွဲဝေပြီး ကျန်ရှိရန်ပုံငွေဖြင့် သာ ဒေသဖွံ့ဖြိုးရေးလုပ်ငန်းများတွင် သုံးစွဲကြပါကြောင်း၊ ထိုသို့သုံးစွဲရာတွင် လမ်းတစ်လမ်း၊ တံတားတစ်စင်းနှင့်သာ ရန်ပုံငွေများ ကုန်သွားခဲ့ရပြီး မိမိတို့မှ ဒေသခံပြည်သူ များ အတွက် မေးခွန်းနှင့် အဆိုများတင်ပြမေးမြန်းရာတွင်လည်း ရန်ပုံငွေလျာထားချက်မရှိခြင်း၊ စည်ပင်သာယာရေး ရန်ပုံငွေမှခွဲဝေသုံးစွဲရန်၊ ရန်ပုံငွေတင်ပြတောင်းခံရရှိပါက ဆောင်ရွက်ပေးမည် စသည်ဖြင့်သာ  ပြန်လည်ဖြေကြား ပါကြောင်း၊ မြို့ပေါ်လမ်းများပျက်ခြင်း၊ တစ်ပိုင်းတစ် စဖြစ်နေခြင်းကြောင့် တာဝန်ရှိသူများကို မေးမြန်းရာတွင် ရန်ပုံ ငွေကုန်သွားခြင်း၊ အခြားလုပ်ငန်းများကို ခွဲပေးရခြင်း စသည့်ဖြင့် ပြန်လည်ဖြေကြားခြင်းတို့ကြောင့် မိမိတို့အနေဖြင့် မည်သည့်အချိန်တွင် ဒေသဖွံ့ဖြိုးရေးအတွက်တင်ပြပြီး ဘဏ္ဍာငွေကို  မည်သို့ ခွဲဝေသုံးစွဲနေကြသည့် လုပ်ငန်းစဉ်များကို သိရမည်ဆိုပါက ပိုမိုအဆင်ပြေနိုင်ပါကြောင်း။

ထို့ကြောင့် နံပါတ် (၁) စည်ပင်သာယာရေးရန်ပုံ ငွေနည်းပါးသော ငပုတောမြို့နယ်ကဲ့သို့ မြို့နယ်များ တွင် ကျေးလက်ဒေသ ဖွံ့ဖြိုးရေးလုပ်ငန်းလိုအပ်ချက်များကို စည်ပင်သာယာရေးရန်ပုံငွေ အစား ကျေး လက်ဒေသ ဖွံ့ဖြိုးရေးရန်ပုံငွေမှ တိုးမြှင့်ဆောင်ရွက် ပေးရန်အစီအစဉ်ရှိ/မရှိ။

နံပါတ်(၂) ကျေးလက်ဒေသဖွံ့ဖြိုးရေးဦးစီးဌာနမှ မြို့နယ်များသို့ ကျေးလက်ဒေသဖွံ့ဖြိုးရေးလုပ်ငန်းများအတွက် ရန်ပုံငွေများလျာထားသုံးစွဲရာတွင် မည်သည့် လုပ်ငန်းများကို ဆောင်ရွက်ပေးပြီး ဆောင်ရွက်သည့် ရန်ပုံငွေများ အား မြို့နယ်များသို့ နှစ်အလိုက်မည်ကဲ့သို့ ခွဲဝေ လျာထားပေးမည်တို့ကို သိရှိလိုပါကြောင်း မေးမြန်းပါသည်။