ဂွမြို့နယ်၏ ဧရိယာသည် ဧကအားဖြင့် ၅၆၆၄၆၉ ဧက၊ တောရိုင်း ၂၇၅၉၇၀ ဧက ရှိပြီး မြို့နယ်အကျယ်အဝန်း၏ ၄၈.၂၇၂ ရာခိုင်နှုန်းရှိပါကြောင်း၊   ကြိုးပြင် ကာကွယ်တောများအဖြစ် ၁၅၆၅၈၂ ဧကရှိသည့်အတွက်ကြောင့် ၂၇.၆၄ ရာခိုင်နှုန်းနှင့်  ဆင်ဘေးမဲ့တောများလည်းရှိပါကြောင်း၊ လွန်ခဲ့သော ငါးနှစ်ခန့်က ဂွမြို့နယ်သည် သစ်တောလွှမ်းဧရိယာ  ၇၆.၃၉ ရာခိုင်နှုန်း ရှိပြီး၊  ရခိုင်တောင်  တန်းကြီးနှင့်ကမ်းရိုးတန်းကြား မြေပြန့် အလွန် နည်းပါးသော ဒေသလေးဖြစ် ပါကြောင်း၊ သို့သော် လွန်ခဲ့သော ဆယ်နှစ်ခန့်ကစတင်ကာ လူတစ်ယောက် သယ်နိုင်ပြီး ဓာတ်ဆီအင်ဂျင်တပ်ဆင်ထားသည့် Chain Saw များ မြန်မာနိုင်ငံ အတွင်းကို ကျယ်ကျယ်ပြန့်ပြန့်ဝင်ရောက်လာပါကြောင်းနှင့် Chain Saw များ ဝင်ရောက်လာမှုသည် မြန်မာနိုင်ငံ၏ သစ်တောကဏ္ဍပြုန်းတီးမှုထဲတွင် ပါဝင်နေသည်ဟု ယူဆပါကြောင်း၊  ဂွမြို့နယ်တွင်လည်း Chain Sawများ အများအပြား ဝင်ရောက်လာပြီး နိုင်ငံတော်ကလည်း လိုင်စင် ထုတ်ပေးထားသည်ကို သိရပါကြောင်း၊  Chain Sawများသည် သစ်တရားမဝင်ခိုးထုတ်သောသူများ၏ လက်ဝယ်ရောက်ရှိသွားသည့်အခါ သစ်ခိုးထုတ်မှုအပိုင်း များပြားနေသည်ကို တွေ့ရပါ ကြောင်း၊  ဂွမြို့နယ်တွင် ၂၀၁၂ ခုနှစ်၊ စက်တင်ဘာလ ၁ ရက်၊ ၂ ရက်၊ ၃ ရက်တို့တွင် တရားမဝင်သစ် ၁၁၅ တန်နှင့် မီးသွေး ၄၅.၆ တန် ဖမ်းဆီးခဲ့ရပြီး ယင်းဖြစ်ပျက်မှုများသည် Chain Saw အမြောက်အများ ဝင်ရောက်လာခြင်းသည်လည်း အကြောင်းတစ်ရပ်ဖြစ်ပါသည်။ ထို့ကြောင့်  မြန်မာနိုင်ငံတွင် Chain Saw ကို အသုံးပြုခွင့်လိုင်စင်ထုတ်ပေး ထားခြင်းသည် မည်သည့်ဥပဒေ၊ နည်းဥပဒေအရ ထုတ်ပေးထားခြင်းဖြစ်သည်နှင့် စည်းကမ်းမလိုက်နာသော Chain Saw ပိုင်ရှင်များကို ဥပဒေအရ အရေးယူ နိုင်မှုအနေအထားနှင့် လိုင်စင်မရှိဘဲ Chain Saw ပိုင်ဆိုင်သူများကို မည်ကဲ့သို့အရေးယူနေပါ သနည်း။ လိုင်စင်မဲ့ Chain Saw ပိုင်ရှင်များရှိနေခြင်းသည် လစ်လျူရှူနေသော ဝန်ထမ်းများ၊ ဒေသ အုပ်ချုပ်ရေးအဖွဲ့အစည်းများကို နိုင်ငံတော်အနေနှင့် အရေးယူနိုင်သော ဥပဒေများရှိ/မရှိ၊  ယနေ့ နိုင်ငံတော်တစ်ဝန်းလုံးတွင် တရားမဝင် Chain Saw ကိုင်တွယ်သူများ ဦးရေမည်မျှကို အရေးယူမှု ပြုလုပ်ပေးသည်ဆိုသည်ကို သိရှိလိုကြောင်းမေးမြန်းပါသည်။