(စ)-ချင်းတွင်းမြစ်ကြောင်း အန္တရာယ်ကင်းရှင်း၍ လွယ်ကူချောမွေ့စွာသွားလာနိုင်ရေးအတွက် နှစ်စဉ်မည်သို့ ဆောင်ရွက်ပေးမည်ကို သိလိုခြင်းနှင့် စပ်လျဉ်းသည့်မေးခွန်း
စစ်ကိုင်းတိုင်းဒေသကြီး၊ မုံရွာမြို့မှ ကနီ၊ မင်းကင်း၊ ကလေးဝ၊ ကလေးမြို့၊ တမူး၊ မော်လိုက်၊ ဖောင်းပြင်၊ ဟုမ္မလင်း၊ ခန္တီးနှင့် နာဂကိုယ်ပိုင်အုပ်ချုပ်ခွင့်ရဒေသတစ်ခုလုံးသာမက ချင်းပြည်နယ် မြောက်ပိုင်းဒေသများသို့ ကုန်စည်ပို့ဆောင်ရာတွင် အများဆုံးအသုံးပြုသော ချင်းတွင်းမြစ်ကြောင်း လမ်းသည် ဇွန်လမှ စက်တင်ဘာလအထိသာ သွားရေး၊ လာရေးလွယ်ကူ ချောမွေ့ပြီး အောက်တိုဘာလစတင်၍ ရေတိမ်လာခြင်း၊ ရေကြောင်းကျဉ်းလာခြင်းတို့ကြောင့် တချို့နေရာများ တွင် ရေယာဉ်များ ခက်ခဲစွာသွားလာနေတာကို တွေ့ရှိရပါကြောင်း၊
ရေကြောင်းကျပ်တည်းခြင်းရ၏ အကျိုးဆက်အဖြစ် နွေရာသီကာလများတွင် ကုန်တင် ယာဉ်သည် ကုန်တန်ချိန်ကိုလျှော့ပြီး တင်ကြရသည့်အပြင် ခရီးအဆုံးရောက်သည်အထိ ရက်ကြာ ရှည်သည့်အတွက် စက်သုံးဆီပိုမိုကုန်ကျခြင်းကြောင့် ကုန်ကျစရိတ်များ ပိုမိုကုန်ကျလာပြီး ကုန် ဈေးနှုန်းကြီးမြင့်သည့်ဒဏ်ကို ခံစားကြရပါကြောင်း၊ သက်ဆိုင်ရာဦးစီးဌာနများက ရေကြောင်း အသုံးပြုခကိုသာ ကောက်ခံသော်လည်း ရေလမ်းကြောင်းကောင်းမွန်အောင် ဆောင်ရွက်ပေးခြင်း မရှိကြောင်းကို ပုဂ္ဂလိကရေယာဉ်လုပ်ငန်းရှင်များဘက်မှ ပြောဆိုနေသည်များကိုလည်း ကြားသိနေရပါကြောင်း၊ ထို့ကြောင့် ချင်းတွင်းမြစ်ကြောင်း အန္တရာယ်ကင်းရှင်း၍ လွယ်ကူချောမွေ့စွာ သွားလာနိုင်ရေးအတွက် နှစ်စဉ်မည်သို့ဆောင်ရွက်ပေးမည်ကို သိရှိလိုပါကြောင်း မေးမြန်းပါသည်။