မဘိမ်းမြို့နယ်သည် ရှမ်းပြည်နယ်(မြောက်ပိုင်း)၊ မိုးမိတ်ခရိုင်တွင်တည်ရှိပါကြောင်း၊ အသစ်ဖွဲ့စည်းလိုက် သည့် မိုးမိတ်ခရိုင်တွင် မိုးမိတ်မြို့နှင့် မဘိမ်းမြို့ဟူ၍ မြို့နှစ်မြို့ရှိပါကြောင်း၊ အခုလက်ရှိအနေအထားတွင် မိုးမိတ်မြို့တွင် ၂၄ နာရီမီးလင်းနေပြီဖြစ်ပါကြောင်း၊  မဘိမ်းမြို့နှင့် မိုးမိတ်မြို့ သည် ၃၆ မိုင်ဝေးပါကြောင်း၊ မဘိမ်းမြို့ကို အိမ်ခြေ ၁၁၀၀ ၊ ရပ်ကွက်လေးရပ်ကွက်ဖြင့် ဖွဲ့စည်းထားပြီး အဓိကလယ်ယာလုပ်ငန်းနှင့် အသက်မွေးဝမ်းကျောင်းပြုပါကြောင်း၊  လမ်းပန်းဆက်သွယ်ရေးခက်ခဲပြီး ဖွံ့ဖြိုးမှုနောက်ကျပါကြောင်း၊ အခု လက်ရှိ ၃၀၀ ကေဗွီအေ ဒီဇယ်အင်ဂျင်နှင့် တစ်ညကို သုံးနာရီမီးပေးနေပါကြောင်း၊ ပူအိုက်သည့်ရာသီတွင် Overload ဖြစ်ပြီး ခံနိုင်ဝန်အားလည်း မရှိတော့ပါကြောင်း၊  ထို့ကြောင့် အလှည့်ကျမီးပေးရသည့်စနစ်ကို ကျင့်သုံးပါကြောင်း၊ အထက်ရွှေလီဘက် မှ တကောင်းနီကယ်လ်ကိုသွားသည့် ဓာတ်ကြိုးသည် မဘိမ်း မြို့နယ်ထဲမှ ဖြတ်သွားသော်လည်း  လျှပ်စစ်မီးမရရှိပါကြောင်း၊  အခုလက်ရှိတည်ဆောက်နေသည့် ရွှေလီ (၃)ရေအား လျှပ်စစ်စက်ရုံနှင့် ၁၈ မိုင်လောက်ဝေးပါကြောင်း၊ အခုအချိန်အထိ လျှပ်စစ်မီးရရှိရန် ခက်ခဲနေ ပါကြောင်း၊ ယခုမေးခွန်းကို ပထမအကြိမ်လွှတ်တော်တွင် အရင်ပြည်သူ့လွှတ်တော် ကိုယ်စားလှယ်မှမေးခဲ့ ဖူးသော်လည်း ယနေ့အချိန်အထိ အကောင်အထည်ဖော်ခြင်း မရှိသေးပါကြောင်း၊  အကယ်၍ ၂၄ နာရီ မီး ရရှိခဲ့မည်ဆိုပါက အိမ်ခြေပေါင်း ၂၁၉၇ အိမ်နှင့် လူဦးရေပေါင်း ၁၀၀၀၀ နီးပါးအတွက် လူမှုဘဝ ဖွံ့ဖြိုး တိုးတက်လာမည်ဖြစ်ပါကြောင်း၊ ထင်း၊ မီးသွေးကို အသုံးပြုနေရသဖြင့် သဘာဝပတ်ဝန်းကျင်လည်း ပျက်စီးပါကြောင်း၊  ထို့ကြောင့် မဘိမ်းမြို့နယ်တွင် ၂၄ နာရီလျှပ်စစ်မီးရရှိရေးအတွက် သက်ဆိုင်ရာဝန်ကြီး ဌာနမှ မည်ကဲ့သို့ဆောင်ရွက်ပေး၍ မည်သည့်အချိန်ကာလတွင် ရရှိနိုင်ပါမည်ကို သိလိုပါကြောင်းဖြင့် မေးမြန်းပါသည်။