ကျွန်တော် မေးမြန်းမယ့်မေးခွန်းကတော့ ယနေ့ နိုင်ငံတော်အတွင်းမှာ ပြည်သူများ အထူးသဖြင့် ပြည်နယ်များမှာရှိတဲ့တိုင်းရင်းသားများ စိတ်ဝင်စားနေတဲ့ သစ်ခုတ်လှဲထုတ် လုပ်စိုက်ပျိုးမှုကိစ္စ ဖြစ်ပါတယ်။ ဒီမေးခွန်းကို ၂၀၁၄ ခုနှစ် ဖေဖော်ဝါရီလမှာ မေးခဲ့တဲ့မေးခွန်းဖြစ်ပါ တယ်။ မေးခွန်းများအခန်းကဏ္ဍက ဒီမိုကရေစီနိုင်ငံထူထောင်ရာမှာ အဆိုများ၊ ဥပဒေများနှင့် ပုံစံချင်း မတူဘဲနဲ့ အုပ်ချုပ်ရေးအဖွဲ့ကသာ လိုအပ်ချက်ကို ထိထိမိမိလေးလေးနက်နက်ဖြေကြားနိုင်ခဲ့ရင် ပြည်သူ့ဆန္ဒကို အချိန်တိုအတွင်းမှာ ဖြည့်ဆည်းပေးနိုင်တဲ့အတွက်ကြောင့် ကျွန်တော်တို့ကိုယ်စားလှယ် များအနေနဲ့ အလွန်အလေးထားရတဲ့ အခန်းကဏ္ဍဖြစ်ကြောင်း ဦးစွာတင်ပြလိုပါတယ်။ သစ်ထုတ်လုပ်မှု နဲ့ပတ်သက်ပြီးတော့ ပြည်သူများအကြားမှာ ဖြစ်ပေါ်နေတဲ့အသံ အဓိကအချက်လေးချက်ရှိပါတယ်။ (၁) သစ်တွေကို အဆင်ပြေသလို စည်းကမ်းမဲ့စွာထုတ်လုပ်နေတာတွေ၊ (၂) သစ်ထုတ်လုပ်တဲ့ဒေသမှာ ရှိတဲ့ ဒေသခံတိုင်းရင်းသားပြည်သူတွေ အသုံးပြုခွင့်မရကြဘူး။ (၃) သစ်အမျိုးမျိုးကို မိမိနေအိမ် ဆောက်လုပ်ဖို့တောင် ဝယ်ယူဖို့အတွက်  ဘယ်ပုံဘယ်နည်းနဲ့မှ ဝယ်ယူခွင့်ရဖို့မလွယ်ဘူး။ (၄) ခုတ်ယူ ပြီးသစ်တောဧရိယာတွေကို စနစ်တကျနဲ့ ပြန်လည်စိုက်ပျိုးမှုမတွေ့ရဘူးဆိုတဲ့ လေးချက်ဟာ ပြည်သူ့ အသံဖြစ်ပါတယ်။ ဒါနဲ့ပတ်သက်လို့ ကျွန်တော်တို့အုပ်ချုပ်ရေးအဖွဲ့က တာဝန်ရှိတဲ့ ပတ်ဝန်းကျင် ထိန်းသိမ်းရေးနှင့် သစ်တောရေးရာဝန်ကြီးဌာနဘက်ကို ပြန်လည်လေ့လာတဲ့အခါမှာ ကျွန်တော်တို့ တင်ထားတဲ့ စီမံကိန်းပါအချက်များအရ ရှစ်ချက်တွေ့ရပါတယ်။ (၁) မြန်မာနိုင်ငံရဲ့ သစ်တောကို ထာဝစဉ်တည်တံ့စေတဲ့ သစ်တောအုပ်ချုပ်မှုစနစ် (Sustainable Forest Management) ဖြစ်တဲ့ မြန်မာ့ရွေးချယ်မှုစနစ် (Myanmar Selection System) နဲ့ အုပ်ချုပ်နေတဲ့အကြောင်း၊ (၂) သစ်ထုတ်လုပ်မှုကို နှစ်စဉ်တောထွက် (Annual Allowable Cut) လို့ခေါ်တဲ့ AAC ဘောင်အတွင်း ကနေ ထုတ်လုပ်နေတဲ့အကြောင်း၊ (၃) မြန်မာနိုင်ငံရဲ့ သစ်တောဖုံးလွှမ်းမှုအခြေအနေ Forest Resource Assessment FRA 2010  ရဲ့အနေအထားအရ နိုင်ငံဧရိယာရဲ့ ၄၆.၉၆ ရှိပြီးတော့ နှစ်စဉ် သစ်တောပြုန်းတီးမှု ဧက ၉၀၀၀၀၀ ကျော် ကမ္ဘာ့သစ်တောပျက်စီးမှု ၁၀ နိုင်ငံမှာ အဆင့်ရှစ်မှာ ရောက်နေတဲ့အကြောင်း၊ (၄) နိုင်ငံရဲ့မြေဧရိယာဧက ၁၆၇ သန်းမှာ သစ်တောကြိုးဝိုင်းဧကက ၄၁ သန်း၊ တောလွှမ်းနေတဲ့ဧကက သန်း ၄၀၊ စိုက်ပျိုးမြေဧကက သန်း ၃၀၊ မြေကောနေတာက ၁၃ သန်း၊ အပမြေက လေးသန်းရှိပြီးတော့ သစ်တောပြန်လည်စိုက်ပျိုးမှုအနေနှင့် ရှေ့နှစ်ကာလအတွင်းမှာ ပုဂ္ဂလိကကျွန်းစိုက်ခင်းပေါင်း ၁၀၇၄၅၃ ဧက၊ သစ်မာဧကပေါင်း ၄၆၁၈၀၊ သစ်ထုတ်လုပ်တဲ့ကုမ္ပဏီ ၁၈ ခုကနေ လေးနှစ်အတွင်းမှာ ကျွန်းဧကပေါင်း ၁၃၀၀၀ စိုက်ပျိုးထားကြောင်း၊ (၅) ၂၀၁၄-၂၀၁၅ ဘဏ္ဍာနှစ်မှာ ကျွန်းကုဗတန် ၆၀၀၀၀၊ သစ်မာကုဗတန် ၁၅.၅ သန်း၊ ထင်း ၂၃၃၆၇ ကုဗတန်၊ မီးသွေး ၂၅၆ ကုဗတန် ထုတ်လုပ်ဖို့လျာထားတဲ့အကြောင်း၊ (၆) သစ်တောဖုံးလွှမ်းမှုကို ဧရိယာအားဖြင့် ၁၂၂၆၇၄ စတုရန်းမိုင်ရဲ့ ၅၇.၄၁ ဖြစ်အောင် စီးပွားရေးသစ်မာကို ၁၃၀၀ ဧက၊ ကျေးရွာစိုက်ခင်းတွေ ကို ၃၀၈၀ ဧက၊ ဒီရေတောစိုက်ခင်းတွေကို ဧက ၆၀၊ ရေဝေရေလဲဧက ၉၅၀၊ အရိပ်ရနေကာပင်တွေ ၁၃၅၀ ဧက စုစုပေါင်း ၇၂၈၀ ဧကနှင့် ကျွန်း ၅၈၀၀ ဧကပေါင်းလိုက်ရင် ဧကပေါင်း ၁၃၀၈၀ ပြန်စိုက်ပျိုးမယ်လို့ထားပါတယ်။ (၇) ၂၀၁၄ ခုနှစ်၊ ဧပြီလ ၁ ရက်နေ့မှာ လုံးတန်တွေကို တင်ပို့ခွင့် ရပ်ဆိုင်းလိုက်တယ်လို့ ကြားပါတယ်။ (၈) ၂၀၁၄-၂၀၁၅ ဘဏ္ဍာနှစ်မှာ ကျပ်သန်းပေါင်း ၁၁၀.၉၇၆ ဘီလီယံထုတ်လုပ်ဖို့ လျာထားတဲ့အကြောင်းနဲ့ ပြည်တွင်းသစ်တွေလုံလောက်အောင် ဖြည့်ဆည်းပေး မယ်လို့ပါပါတယ်။ သို့သော် နှစ်ဘက်က ပြည်သူရဲ့အသံနှင့် အစိုးရအဖွဲ့ရဲ့လုပ်ဆောင်မှုနှင့်ယှဉ်ပြီး တော့ ကြည့်တဲ့အခါမှာ လက်ရှိ ရှိတဲ့အနေအထားကတော့ အခုကျွန်တော် ဒီမှာ ပုံမှာတင်ပြတဲ့အတိုင်းပဲ ၂၀၁၄ ခုနှစ်၊ ဧပြီလ ၁ ရက်နေ့မှာ နိုင်ငံတစ်ဝှမ်းလုံး သစ်ထုတ်လုပ်မှုဟာ အဆပေါင်းများစွာ ထုတ်လုပ် လာတာတွေ့ရမှာ ဖြစ်ပါတယ်။ ကျွန်းကို သုံးနှစ်ဆက်တိုက် သင်းသတ်ပြီးမှ ထုတ်လုပ်ရပေမယ့်လို့ မလိုက်နာမှုတွေကိုလည်း တွေ့မြင်နေရပါတယ်။ ခွဲသားတွေတင်ပို့မှုကို ပိတ်ပင်လိုက်တဲ့အတွက်ကြောင့် ပြည်တွင်းမှာမလိုလားအပ်ဘဲနဲ့ တရားမဝင်သစ်မှောင်ခိုမှုတွေ သစ်သယ်ဆောင်မှုတွေကို တွေ့ရပါ တယ်။ ဥပမာတင်ပြရရင် ၂၀၁၃ ခုနှစ်၊ မတ်လ ၂၈ ရက်နေ့က ရန်ကုန်-မန္တလေး ပြည်ထောင်စုလမ်းမ ကြီးအတွင်း မိုင်တိုင်အမှတ်(၁၈၈)မှာ တန်ဖိုးပေါင်း သိန်းပေါင်း ၈၉၀ ကို ပိုင်ရှင်မဲ့ဖမ်းဆီးရမိတဲ့ ဖြစ်စဉ်တွေ၊ ဒီ့အပြင် သစ်ထုတ်လုပ်တဲ့ သစ်ပင်တွေနေရာမှာ  အစားထိုးပြန်စိုက်တာကို ပြည်သူတွေက ထင်သာမြင်သာသိအောင်ပြဖို့အတွက် နည်းလမ်းများစွာရှိသော်ငြားလည်း တင်ပြမှုအားနည်းနေတာကို တွေ့ရပါတယ်။ နိုင်ငံတော်ရဲ့ကဏ္ဍအသီးသီးဟာ ယနေ့ သုံးနှစ်တာကာလ ရောက်ရှိလာတဲ့အခါမှာ အတိုင်းအတာအရ တိုးတက်မှုတွေဖြစ်နေတာ တွေ့ရပါမယ်။ ဒီအချိန်မှာ အောက်ခြေဝန်ထမ်းများ၊ အထက်ကတာဝန်ရှိတဲ့သူများ ပေါ့ဆမှုကြောင့်၊ တာဝန်ယူမှုနှင့် တာဝန်ခံမှုအားနည်းခြင်းကြောင့်          နိုင်ငံတော်၏ စီးပွားရေးနှင့် သဘာဝပတ်ဝန်းကျင်ထိန်းသိမ်းရေး မထိခိုက်စေဖို့အတွက် စာတွေ့ မဟုတ်ဘဲနဲ့ လက်တွေ့ကျကျ ထိထိရောက်ရောက် ဆောင်ရွက်ဖို့ နိုင်ငံတော်ရဲ့သစ်ထုတ်လုပ်မှု လုပ်ငန်းများ၊ သစ်တောများ ထုတ်လုပ်ရောင်းချမှု၊ နိုင်ငံတော်အကျိုးစီးပွားအတွက် များစွာထိခိုက် နစ်နာမည်ဖြစ်၍ ထိထိရောက်ရောက် မည်သို့ကာကွယ်တားဆီးဆောင်ရွက်နေသည်ကို သိရှိလိုပါ၍ ဥက္ကဋ္ဌကြီးမှတစ်ဆင့် ဖြေကြားပေးနိုင်ဖို့ မေးမြန်းတင်ပြပါသည်။