(က)-ဇီဝလောင်စာနှင့် ပတ်သက်ပြီး မိမိတို့ နိုင်ငံအနေဖြင့် ဆောင်ရွက်နေမှု၊ ထုတ်လုပ်မှု ရှေ့ဆက်လက် ဆောင်ရွက်သည့် အစီအမံ အလားအလာများနှင့်စပ်လျဉ်းသည့် မေးခွန်း
ယနေ့အချိန်ကာလတွင် စွမ်းအင်ကဏ္ဍ၌ ရေနံနှင့်သဘာဝဓာတ်ငွေ့ အရင်းအမြစ်များ တဖြည်းဖြည်းလျော့နည်းလာနေပြီဖြစ်ကြောင်း ကျွမ်းကျင်သူ ပညာရှင်များ သုံးသပ် တင်ပြချက်များအရ သိရှိရပါတယ်။ ယင်းသို့လျော့နည်းလာသည့် ရေနံနှင့် သဘာဝဓာတ်ငွေ့ အရင်း အမြစ်များအစား ပြန်လည်ပြည့်ဖြိုးမြဲစွမ်းအင်ဖြစ်တဲ့ နေစွမ်းအင်၊ လေစွမ်းအင်နှင့် ရေအားလျှပ်စစ်တို့ ကို ထုတ်ယူသုံးစွဲ၍ အစားထိုးသုံးစွဲနေရကြောင်းကိုလည်း တွေ့ရှိရပါတယ်။ ထို့နည်းတူစွာ ဇီဝစွမ်းအင် မှလည်း လောင်စာထုတ်လုပ်၍ လျော့နည်းသွားသော စွမ်းအင်များနေရာတွင် အစားထိုးသုံးစွဲနိုင်ရန် ဆောင်ရွက်လာခဲ့ကြောင်းကိုလည်း တွေ့ရှိရပါတယ်။ မြန်မာနိုင်ငံတွင်လည်း အလားတူ သုံးစွဲနေ ကြောင်း တွေ့ရှိရတဲ့အတွက် ဇီဝလောင်စာနှင့်စပ်လျဉ်းပြီး မေးခွန်း ၃ ခုအား မေးမြန်းလိုပါတယ် ခင်ဗျား။ (၁) ဇီဝလောင်စာနှင့်ပတ်သက်ပြီး မိမိတို့နိုင်ငံအနေနဲ့ မည်ကဲ့သို့ ဆောင်ရွက်နေပါသနည်း။ (၂) ဇီဝလောင်စာထုတ်လုပ်မှုအတွက် မည်သည့်အတိုင်းအတာအထိ အကောင်အထည်ဖော် ဆောင်ရွက် ပြီးစီးပြီးဖြစ်ပါသနည်း။ (၃) ဇီဝလောင်စာဆီနှင့်ပတ်သက်၍ ရှေ့ဆက်ဆောင်ရွက်သွားမည့် အစီအစဉ်များ၊ အလားအလာများ၊ အခြေအနေများကို သိရှိလိုပါကြောင်း မေးမြန်းပါသည်။