ကျွန်တော်တို့ ဒေသအပါအဝင် တချို့သော တိုင်းဒေသကြီးနဲ့ ပြည်နယ်များမှာ အာဝါဒေးခေါ်တဲ့ အမည်သစ်တစ်ခုနဲ့ လောင်းကစားပွဲ တွေပေါ်ပေါက်နေပါတယ်။ ဒေသက ရိုးရာယဉ်ကျေးမှုပွဲတွေ၊ ဘာသာရေးပွဲတွေကို အမှီပြုပြီး အာဝါဒေးလောင်းကစားပွဲကို ပြုလုပ်နေကြခြင်းဖြစ်ပါတယ်။ လောင်းကစားပွဲမှာ အနီတောင်၊ လေးကောင်ဂျင်၊ ဖဲဝိုင်းအစရှိသော ကစားမျိုးပေါင်း များစွာပါဝင်ပါတယ်။ ပွဲမဖြစ်ခင်တစ်လ ဒါမှမဟုတ် နှစ်လအထိ ကြိုတင်ပြီး လောင်းကစားပွဲကို ပြုလုပ်သလို ပွဲပြီးသော်လည်း တစ်လ၊ နှစ်လတိုင်သည် ဆက်လက်ပြုလုပ်ထားတာ တွေ့ရှိပါတယ်။ ဝိသမလောဘသမားတွေရဲ့ တည်ခင်း ထားတဲ့ ဒီလောင်းကစားပွဲမှာ မူလတန်းအရွယ် ကလေးသူငယ်များကအစ အသက် ၇၀၊ ၈၀ အဆုံး ကြီးကြီးငယ်ငယ်၊ ကျားကျားမမ ပိုးဖလံမျိုး မီးကိုတိုးသလို ကြိတ်ကြိတ်တိုး ပါဝင်ပြီး လောင်းကစားတာ တွေ့မြင်ရပါတယ်။ ဒါကြောင့် ဒီ အာဝါဒေးလောင်းကစားမှုဟာ အသိမကြွယ်သေးတဲ့ စာသင်သား ကလေးသူငယ်တွေကို ဖျက်ဆီးသလို ကျေးရွာသူ၊ ရွာသားများရဲ့ ရိုးသားတဲ့စိတ်ဓာတ်၊ ဖြူစင်တဲ့ စာရိတ္တနဲ့တကွ မိမိတို့ရဲ့ စည်းစိမ်ဥစ္စာတွေကို စိစိညက်ညက် ကြေမွပျက်စီးအောင် ပြုလုပ်နေပါတယ်။ ဒါ့အပြင် ဒေသခံ ရွာသားများဟာ ဒီ အာဝါဒေးလောင်းကစားကြောင့် အိမ်ပေါင်၊ ယာပေါင်၊ ပစ္စည်းတွေပေါင်နှံပြီး လောင်းကစားမှုပြုတာကြောင့် ပြည်သူတွေရဲ့ဘဝကို ဆိုးသထက်ဆိုးအောင် ပြုလုပ်နေရာ ရောက်ပါတယ်။ စာသင်သားကလေးသူငယ်များရဲ့ ပညာရေးကိုလည်း များစွာ အနှောင့်အယှက်ဖြစ်စေပါတယ်။ ဒါကြောင့် ဒီအာဝါဒေးဟူသော လောင်းကစားမှုအတွက် နိုင်ငံတော်မှ ပြည်သူများရဲ့ အကျိုးစီးပွားကို ကာကွယ်သောအားဖြင့် မည်သို့ ဆောင်ရွက်ပေးနိုင်မည် ဆိုတာကို အထူးသိလိုတဲ့အတွက် မေးမြန်းခြင်းဖြစ်ပါတယ်။ မေးခွန်းကို တစ်ဆက်တစ်စပ်တည်း မေးမြန်းဖို့ လိုအပ်တဲ့အတွက် ထပ်ဆင့်မေးခွန်းနဲ့ မေးမြန်းထားပါတယ်။ ပြည်သူတွေရဲ့ စိတ်ဓာတ်၊ စာရိတ္တနှင့် ပစ္စည်းဥစ္စာများကို ထိခိုက်နစ်နာဆုံးရှုံးစေသော အာဝါဒေးကဲ့သို့ လောင်းကစားမှုကို နိုင်ငံတော် ဒေသတစ်ချို့တွင် တရားဝင်ပြုလုပ်နေသည်ကို အစိုးရကသိပါသလား။ မသိလျှင် စုံစမ်း၍ အရေးယူ ဆောင်ရွက်ပေးမည်လား။ မဆောင်ရွက်ပေးနိုင်ပါလျှင်အဘယ်ကြောင့်နည်း ဆိုသည်ကို မေးမြန်းပါသည်။