(ဃ)-မြေလွတ်၊ မြေရိုင်းလုပ်ကိုင်ခွင့်နှင့် အခွန်ပြေစာ လျှောက်ထားမှုလယ်မြေကို အခြားနည်းလမ်းအသုံးပြုခွင့် (၃၉) နှင့် ပုံစံ (၁၀၅) လျှောက်ထားမှု၊ ဥယျာဉ်ခြံမြေ၊ ဂရန်လျှောက်ထားမှုတို့ကို မြန်ဆန်အောင် မည်သို့ဆောင်ရွက်ပေးမည်ကို သိလိုသည်နှင့် စပ်လျဉ်းသည့်မေးခွန်း
(ဃ)-အောက်ခြေတောင်သူလယ်သမားများအတွက် မြေလွတ်၊ မြေရိုင်း လုပ်ကိုင်ခွင့်နှင့် အခွန်ပြေစာ လျှောက်ထားမှုလယ်မြေကို အခြားနည်းလမ်းအသုံးပြုခွင့် (၃၉) နှင့် ပုံစံ (၁၀၅) လျှောက်ထားမှု၊ ဥယျာဉ်ခြံမြေ၊ ဂရန်လျှောက်ထားမှုတို့ကို မြန်ဆန်အောင် မည်သို့ဆောင်ရွက်ပေးမည်ကို သိလိုသည်နှင့် စပ်လျဉ်းသည့်မေးခွန်း
လယ်ယာမြေ စိုက်ပျိုးရေးကိစ္စတွေဟာ ရာသီဥတုအပေါ်မှာ မူတည်ပြီးတော့မှ အဓိကလုပ်ဆောင်ကြရမှာ ဖြစ်ပါတယ်။ ဒီလိုလုပ်ဆောင်တဲ့နေရာမှာ အောက်ခြေ အုပ်ချုပ်ရေးဝန်ထမ်းနဲ့ ပြည်ထောင်စုဝန်ကြီးဌာနက အောက်ခြေဝန်ထမ်းများရဲ့ သုံးသပ်ဆုံးဖြတ်နိုင်မှု အတိုင်းအတာအရ ကြိုတင်ဆောင်ရွက်ခွင့်ပြုခြင်းကို ဥပဒေ၊ နည်းဥပဒေတွေနဲ့အညီ အတိုင်းအတာ တစ်ခုထိ၊ သက်ဆိုင်ရာ ဝန်ကြီးဌာနနဲ့ သက်ဆိုင်ရာ အုပ်ချုပ်ရေးဌာနတို့က ထိန်းကျောင်းသတ်မှတ်ပေး သင့်တယ်လို့ ကျွန်တော့်အတွေ့အကြုံအရ ယူဆတဲ့အတွက် ဒီမေးခွန်းကို မေးမြန်းရခြင်း ဖြစ်ပါတယ်။ ဒါဘာလည်းဆိုလို့ရှိရင် ကျွန်တော့်အတွေ့အကြုံတစ်ခုကတော့ ရန်ကုန်တိုင်းဒေသကြီးမှာ ပြီးခဲ့တဲ့ နွေရာသီမှာ သုံးခွမြို့နယ်မှာ ပင်လယ်ကမ်းခြေက ပင်လယ်ကမ်းကောတဲ့မြေတွေ ပေါ်ပေါက်လာတဲ့ အခါမှာ သက်ဆိုင်ရာအုပ်ချုပ်ရေး အကြီးအကဲ တိုင်းဒေသကြီးဝန်ကြီးချုပ် ဆီတင်ပြပြီးတော့မှ ဆောင်ရွက်ပေးတဲ့အတွက် တိုင်းဒေသကြီးဝန်ကြီးချုပ်ကလည်း လယ်မဲ့ယာမဲ့တွေကို အချိုးကျ ညီညီမျှမျှ ခွဲဝေဆောင်ရွက်ပေးခဲ့တာရှိပါတယ်။ အလားတူပဲ ထပ်မံပေါ်ပေါက်လာတဲ့ အခါမှာထပ်ပြီး တော့မှ ခွဲဝေပေးဖို့ တင်ပြတဲ့အခါမှာ အထက်အကြီးအကဲတွေကလည်း မူအတိုင်းခွဲပေးဖို့ သတ်မှတ် ပေမယ့် အောက်ခြေတာဝန်ရှိတဲ့ဝန်ထမ်းတွေက အမိန့်ရောက်မလာတဲ့အတွက် ဆင်းပြီးတော့ မလုပ်ရဘူး။ ဆင်းလုပ်ရင်ဥပဒေအရ အရေးယူမယ်ဆိုပြီးတော့ တားမြစ်တဲ့အတွက် ဒီတစ်မိုးတစ်ရာသီ မှာတော့ လွတ်သွားတဲ့ အနေအထားမျိုးရှိပါတယ်။ တကယ်လို့သာ မူဝါဒနဲ့အညီ၊ ဥပဒေနဲ့အညီ ကြိုတင်ဆောင်ရွက်ပေးခွင့်ကို အောက်ခြေဝန်ထမ်းတွေကို သတ်မှတ်ပေးထားမယ်ဆိုရင် ကြိုတင် ဆောင်ရွက်ခွင့်ကိုလည်း ထိန်းကျောင်းဖို့လိုပါတယ်။ ထိန်းကျောင်းသတ်မှတ် ပေးထားမယ်ဆိုရင် ဒီတစ်မိုးတစ်ရာသီအမီ ဒီလယ်မဲ့၊ ယာမဲ့တွေက လယ်စိုက်ခွင့်ရသွားမှာ ဖြစ်ပါတယ်။ အလားတူပဲ နောက်အတွေ့အကြုံတစ်ခုကတော့ တွံတေးမြို့နယ် ကံရွာမှာ လယ်သမား ၅ ယောက်က၊ မြေဧက ၂ဝကို လယ်စိုက်ကြပါတယ်။ စိုက်တဲ့အခါမှာ သက်ဆိုင်ရာဆည်မြောင်းလက်တံမြောင်းကနေပြီး တော့မှ မြောင်းဖောက်သွယ်ပြီးတော့မှ သူတို့လယ်ကို သူတို့ရေသွင်းပါတယ်။ ရေးသွင်းပြီးတော့ လယ်စိုက်တဲ့အခါမှာ သက်ဆိုင်ရာဌာနကနေပြီးတော့မှ သူတို့မြောင်းကို ပိတ်တယ်ဆိုပြီးတော့ တရားစွဲ ပါတယ်။ တကယ်လို့သာ တရားစွဲတဲ့အတွက် ဒီမြောင်းကို ပြန်ဖွင့်ပေးလိုက်ရပြီးတော့မှ သူတို့ ဖောက်ထားတဲ့ လက်တံများကို ပြန်ဖွင့်ပေးလိုက်ရပြီးတော့မှ ရေတွေဆုံးရှုံးသွားတဲ့အတွက် ဒီလယ်ဧက ၂ဝကလည်း အခုတော့ သေသွားပါပြီ။ တကယ်လို့သာ ဒီအောက်ခြေဝန်ထမ်းတွေအနေနဲ့ ဒီသဘာဝ ကျတဲ့လုပ်ငန်းကို ကြိုတင် ဆောင်ရွက်ခွင့်ပြုမိန့်ပေးပြီးတော့မှ ဆောင်ရွက်စေမယ်ဆိုရင် ဒီအမှုဖြစ်စရာ အကြောင်းမရှိပါဘူး။ လယ်သမား ၅ ယောက်ဟာ ၇လရှိပါပြီ။ တရားရင်ဆိုင်နေရတဲ့အတွက် လယ်လည်းဆုံးရှုံးသွားပါပြီ အခုထက်ထိတရားရင်ဆိုင်နေရတာလည်း မပြီးပြတ်သေးဘူး ဖြစ်ပါတယ်။ ဒီလိုအောက်ခြေ ဝန်ထမ်းတွေ ဥပဒေ၊ နည်းဥပဒေတွေနဲ့အညီ ကြိုတင်ဆောင်ရွက်ခွင့် ပြုခြင်းနဲ့ ပတ်သက်ပြီးတော့မှ ကျွန်တော်မေးချင်တာကတော့ လယ်ယာမြေဥပဒေထုတ်ပြန်ပြီး ဖြစ်ပေမယ့် အောက်ခြေတောင်သူ လယ်သမားများအနေနဲ့ ယခင်အတိုင်းကြုံတွေ့နေရဆဲပဲ ဖြစ်ပါတယ်။ အထူး သဖြင့် မြေလွတ်၊ မြေရိုင်းလုပ်ပိုင်ခွင့်နဲ့ အခွန်ပြေစာ လျှောက်ထားမှုလယ်မြေကို အခြားနည်း အသုံးပြုခွင့် လန (၃၉) နှင့် ပုံစံ (၁၀၅) လျှောက်ထားမှု ဥယျာဉ်ခြံမြေ ဂရန်လျှောက်ထားမှုတို့မှာ တချို့ ဒေသတွေမှာ ကြန့်ကြာနေဆဲဖြစ်တာကို တွေ့ရှိနေရတဲ့အတွက် အဲဒါတွေကို မြန်ဆန်အောင် မည်ကဲ့သို့ ဆောင်ရွက်ပေးမည်ဆိုသည်ကို သိရှိလိုပါကြောင်း မေးမြန်းပါသည်။