နိုင်ငံတော်အနေနဲ့ လမ်းပန်းဆက်သွယ်‌မှု ကွန်ယက် ဖြန့်ကျက်လွှမ်းမိုးမှုဟာ အရှေ့၊ အနောက်၊ တောင်၊ မြောက်ကို နိုင်ငံတော်အစိုးရက တည်ဆောက်ပေးခဲ့တဲ့ အတွက် ဒေသခံတိုင်းရင်းသားပြည်သူများဟာ ဝမ်းမြောက်ဝမ်းသာ ဖြစ်ခဲ့ကြရ ပါတယ်။ အဲဒီအနက် ကျွန်တော်တို့ မန္တလေး-ရွှေဘို-မြစ်ကြီးနား ပြည်ထောင်စု ကားလမ်းမကြီးကို ဖောက်လုပ်ပေးခဲ့တဲ့ အတွက်လည်း ကျွန်တော်တို့ ကချင်ပြည်နယ်အပါအဝင် စစ်ကိုင်းတိုင်းဒေသကြီး၊ မန္တလေးတိုင်းဒေသကြီးမှ ဒေသခံတိုင်းရင်းသား ပြည်သူများက ဝမ်းမြောက်ကျေးဇူးတင်လျက် ရှိပါတယ်။ သို့သော်ငြားလည်း မန္တလေး-ရွှေဘို-မြစ်ကြီးနား ပြည်ထောင်စုကားလမ်းမကြီး စတင် ဖောက်လုပ်စဉ်က ကျွန်တော်တို့ ကချင်ပြည်နယ်နဲ့ မန္တလေးမြို့ကို အချိန်တိုအတွင်း ခရီးသည်နှင့် ကုန်စည်ပို့ဆောင်မှုလုပ်ငန်းများကို ဆောင်ရွက်နိုင်ခဲ့ပါတယ်။ ဒါပေမယ့် ယခုအခါ လမ်းပိုင်းများစွာ ပျက်စီးနေခြင်း၊ အထူးသဖြင့် မိုးရာသီကာလမှာ လမ်းနဲ့တံတားများ ပျက်စီးနေခြင်းဖြစ်တဲ့အတွက် ကြောင့်မို့လို့ ကျွန်တော်တို့ ကချင်ပြည်နယ် ဒေသခံတိုင်းရင်းသား ပြည်သူများအနေနဲ့ အားကိုး အားထားပြုလောက်တဲ့ မန္တလေး-ရွှေဘို-မြစ်ကြီးနား ကားလမ်းမကြီးမှာ သွားလာမှု ကြန့်ကြာနေမှုများ ဖြစ်ထွန်းလျက်ရှိပါတယ်။ ဒါကြောင့်မို့ ပြည်ထောင်စုအစိုးရအဖွဲ့ဝင်များ အနေနဲ့ ကျွန်တော်တို့ ကချင်ပြည်နယ်၊ စစ်ကိုင်းတိုင်းဒေသကြီးနဲ့ မန္တလေးတိုင်းဒေသကြီးကို ဆက်သွယ် ဖောက်လုပ်ထားတဲ့ မန္တလေး-ရွှေဘို-မြစ်ကြီးနား ကားလမ်းမကြီး ပြုပြင်ထိန်းသိမ်းခြင်းနဲ့ အဆင့်မြှင့် တင်ခြင်းလုပ်ငန်းကို မည်ကဲ့သို့ ဆောင်ရွက်ပေးနိုင်မည်ကို မဲဆန္ဒရှင် ပြည်သူများ သိရှိလိုတဲ့ အတွက် မေးမြန်းပါသည်။