ပြည်ထောင်စုလွှတ်တော်မှ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေကို    ၂၀၁၂ ခုနှစ် ပြည်ထောင်စုလွှတ်တော်ဥပဒေအမှတ် ၁ တွင် ၂၀၁၂ ခုနှစ်၊ ဖေဖော်ဝါရီလ ၂၄ ရက် နေ့တွင် ထုတ်ပြန်အာဏာတည်စေခဲ့ပြီး ဖြစ်ပါတယ်။ အဆိုပါ ဥပဒေမှာ ခေတ်နှင့်အညီ ပြည်သူတို့မှ ဆန္ဒအရှိဆုံးဖြစ်၍ ပြည်သူများအတွက် ခွင့်ပြုနိုင်စေရန် ဥပဒေပြုအာဏာအဖွဲ့ကြီးဖြစ်သည့် ပြည်ထောင်စုလွှတ်တော်ကြီးမှ ဥပဒေအမှတ် ၁ ဖြင့် ပထမဆုံးပြဋ္ဌာန်းပေးခဲ့ခြင်းဖြစ်ပါတယ်။ ဒါ့အပြင် ကောင်းမွန်သန့်ရှင်းသောအစိုးရ Good Governance and Clean Government ဖြစ်စေရန် တစ်စိတ်တပိုင်း အကောင်အထည်ဖော်မှုဖြစ်စေရေးနှင့် ထိုဥပဒေ၏နိဒါန်းပါ ပြည်ထောင်စုသမ္မတမြန်မာ နိုင်ငံတော်ဖွဲ့စည်းပုံအခြေခံဥပဒေပုဒ်မ ၁၈၉ နှင့်အညီ ခန့်အပ်တာဝန်ပေးပြီး ရပ်ကွက် သို့မဟုတ် ကျေးရွာအုပ်စု၏ အုပ်ချုပ်ရေးဆိုင်ရာလုပ်ငန်းများကို ထိရောက်စွာ အကောင်အထည်ဖော်ဆောင်ရွက် နိုင်ရန် ဤဥပဒေကို ပြဋ္ဌာန်းလိုက်ခြင်းဖြစ်ကြောင်း ပြဋ္ဌာန်းထားပါတယ်။ သို့သော် အဆိုပါဥပဒေ ပြဋ္ဌာန်းချိန်မှစ၍ အာဏာတည်ပြီးဖြစ်သော်လည်း ဥပဒေစည်းနှောင်မှုရှိစေရေးအတွက် အကောင် အထည်ဖော်ဆောင်ရွက်ပေးရန် လိုအပ်နေလျက်ရှိသည်ဟု ပြည်သူများမှ ယူဆနေလျက်ရှိကြပါတယ်။

အုပ်ချုပ်ရေးအဖွဲ့ကြီး၏ တာဝန် ဖြစ်သည့်ပြဋ္ဌာန်းပေးပြီးသော ဥပဒေများကို အကောင်အထည်ဖော်ထိန်းကျောင်းရန်နှင့် နေရာမရွေး၊ လူမျိုးမရွေးအာဏာသက်ရောက်စေရန် ဆောင်ရွက်ပေးမှသာ တရားဥပဒေစိုးမိုးရေး၏ အနှစ် သာရကိုဖော်ဆောင်ရာရောက်မည် ဖြစ်ပါတယ်။ ယခုအခါ ပေါက်မြို့နယ်အပါအဝင် မြန်မာ တစ်နိုင်ငံလုံးရှိ ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးမှူးများမှာ ယခင်အချိန်က အကြောင်း အမျိုးမျိုး၊ နည်းအစုံစုံဖြင့် ခန့်အပ်တာဝန်ပေးခဲ့သော အုပ်ချုပ်ရေးမှူးများသာဖြစ်ကြပြီး ယနေ့အချိန် အထိ သီးခြားအပြောင်းအလဲခန့်အပ်တာဝန်ပေးခြင်း မရှိဘဲ။ ပြည်သူများ တိုင်ကြားလာသည့် ရပ်/ကျေးအုပ်ချုပ်ရေးမှူးများထဲမှ အချို့ကိုသာ လုပ်နည်းလုပ်ဟန်အမျိုးမျိုးဖြင့် စစ်ဆေး၍ ပြေလည်မှုမရှိသော အုပ်ချုပ်ရေးမှူးအနည်းငယ်ကိုသာ ပြောင်းလဲခန့်အပ်တာဝန်ပေးလျက်ရှိနေသည် ကိုလေ့လာတွေ့ရှိရပါတယ်။

ပြည်သူများမှာ အထက်အဆင့်ဆင့်ရှိ အုပ်ချုပ်ရေးကဏ္ဍများ၏ ပြောင်းလဲတိုးတက်မှုများကို အားရကျေနပ်ဝမ်းမြောက်မိကြသော်လည်း ပြည်သူများ၏အလိုအပ်ဆုံးနှင့် အလိုချင်ဆုံးမှာ မိမိတို့နှင့် လက်ပွန်းတတီး အမြဲဆက်ဆံနေကြရသော အခြေခံအုပ်ချုပ်ရေးကဏ္ဍရှိ ရပ်/ကျေးအုပ်ချုပ်ရေးမှူးများကို ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဥပဒေသစ်နှင့်အညီ ပြောင်းလဲခန့်အပ်တာဝန်ပေးစေလိုခြင်း ဖြစ်ပါတယ်။ ယခုကဲ့သို့ ပြောင်းလဲပေးခြင်းမရှိသေးသည့်အပေါ် ပြည်သူများမှ အားမလိုအားမရဖြစ်နေကြရပြီး အမြန်ဆုံး ပြောင်းလဲခန့်အပ်တာဝန်ပေးစေလိုသည့် စိတ်ဆန္ဒများ ပြင်းပြနေလျက်ရှိကြပါတယ်။ ဒါကြောင့်    ၂၀၁၂ ခုနှစ်၊ ပြည်ထောင်စုလွှတ်တော်ဥပဒေအမှတ် ၁ ဖြင့် ပြဋ္ဌာန်းပေးပြီးဖြစ်သော ရပ်ကွက် သို့မဟုတ် ကျေးရွာအုပ်စုအုပ်ချုပ်ရေးဥပဒေကို ဥပဒေစည်းနှောင်မှုရှိစေရေးအတွက် မည်ကဲ့သို့ အကောင်အထည်ဖော်ဆောင်ရွက်ပေးမည်ကိုသိလို၍ ဖြေကြားပေးပါရန် ပြည်သူများ၏ကိုယ်စား လေးစားစွာ မေးမြန်းပါသည်။