ပြည့်တန်ဆာဆိုသည်မှ ဗုဒ္ဓခေတ်ကတည်းကရှိခဲ့ပြီး၊ ဒီနေ့ခေတ်မှာလည်း ကမ္ဘာနိုင်ငံအသီးသီးတွင် ပြည့်တန်ဆာများ ရှိနေပါကြောင်း၊ ဘာသာရေး အထိန်းအကွပ်ကြောင့် ပြည့်တန်ဆာလုပ်ငန်း ဖွံ့ဖြိုးတဲ့နိုင်ငံနှင့် မဖွံ့ဖြိုးတဲ့နိုင်ငံသာလျှင် ကွာခြားလျှက် ရှိရာ ပြည့်တန်ဆာများနှင့် ပတ်သက်သော ဥပဒေတွေများကိုလည်း ကမ္ဘာနိုင်ငံအများစုတွင် ပြဋ္ဌာန်းထားကြပါကြောင်း၊ အာရှဒေသတွင် ဂျပန်၊ တရုတ်၊ ထိုင်း၊ စင်ကာပူနိုင်ငံတွင် ယင်းလုပ်ငန်းများကို တရားဝင်ဈေးကွက် အဖြစ်ကို သတ်မှတ်ပေးထားပါကြောင်း၊ ဤကိစ္စရပ်များမှာ မလွန်ဆန်နိုင်သော လူတန်းစားများအတွက် သီးခြား သတ်မှတ်ပေးထားခြင်းလည်းဖြစ်ပါကြောင်း၊ မည်သည့်နိုင်ငံတွင်မဆို ပြည့်တန်ဆာမှာ အနည်းနှင့် အများရှိနေကြပြီး၊ မြန်မာနိုင်ငံတွင်လည်း ပြည့်တန်ဆာ ဆိုသည်မှာ ခေတ်အဆက်ဆက်က ရှိခဲ့ပြီး ယခုအချိန်ထိ လျော့နည်းပပျောက်သွားခြင်း မရှိသေးပါကြောင်း၊ မိမိတို့နိုင်ငံ၏ ဆင်းရဲမွဲတေမှုပြဿနာနှင့် အလုပ်အကိုင် အခွင့်အလမ်း ရှားပါးမှုကြောင့် လည်းကောင်း၊ အလုပ်အကိုင် အခွင့်အလမ်းတွေရရှိသော်လည်း လုံလောက်မှု မရှိသည့် အမျိုးသမီးများရရှိသော လုပ်အားခများကြောင့် လည်းကောင်း တချို့သော အမျိုးသမီးများမှာ ဤဘဝကို ရောက်ရှိသွားခဲ့ရပါကြောင်း၊ ငွေကိုလွယ်လွယ်ရလိုမှု အလုပ်အကိုင်မရှိလို့ လုပ်ရာကနေ နစ်မွန်းသွားပြီး မထူးဇာတ် ခင်းကြသောသူများလည်း အများကြီးရှိသလို၊ ကောင်းရာ ကောင်းကြောင်းလုပ်ကိုင်ပြီး ဒီဘဝက ရုန်းထွက်ချင်သူများလည်း အများကြီးရှိပါကြောင်း။

၁၉၄၉ ခုနှစ်၊ ဧပြီလ ၂၁ ရက်နေ့တွင် အတည်ပြုခဲ့သော ပြည့်တန်ဆာ ပပျောက်ရေး ဥပဒေသည် တချို့နေရာများတွင် ဥပဒေကို လက်တစ်လုံးခြား ကျင့်သုံးနေသော တာဝန်ရှိသူ တချို့ကြောင့် ပြည့်တန်ဆာများ အနေဖြင့်လည်း ပိုမိုနစ်နာခဲ့ရပါကြောင်း၊ ဒီပြည့်တန်ဆာပပျောက်ရေးဥပဒေကို အလွဲသုံးသူတချို့ကိုလည်း ပြည့်တန်ဆာများအနေဖြင့် ရင်ဆိုင်နေကြပါကြောင်း၊ “စီမံချက်ရှိလို့ မကျေနပ်ရင် ကွန်ဒုံးဆောင်ထားလို့ဖမ်း၊ အဖမ်းခံ ရမှာစိုးလို့ ကွန်ဒုံးမဆောင် ဒါနဲ့ပဲ ကျွန်မတို့မြန်မာနိုင်ငံမှာ HIV ရောဂါသည်တွေ များပြားလာခဲ့ရပါတယ်။” အင်းစိန်ထောင်တွင် HIV ရောဂါသည်များမှာ ၂ ရက်ကို ၁ ယောက်နှုန်းဖြင့် သေဆုံးနေကြရသည်ကို မိမိ အနေဖြင့် သိမြင်ခဲ့ရပါကြောင်း၊ အခြေအနေဆိုးလို့ သေဆုံးခါနီးကျမှ ထောင်ကနေ တစ်ဆင့် ဆေးရုံကို တင်ကြရရာ ဆေးရုံရောက်မှ သေဆုံးသွားရသည့် သူများလည်းရှိပါကြောင်း၊ တချို့ထောင်ကိုရောက် လာပြီးမှ စစ်ဆေးလို့ HIV ရောဂါပိုးစစ်ဆေးတွေ့ရှိရသော လူများကို တွံတေးရှိ အမျိုးသမီး စောင်‌့ရှောက်ရေးစခန်းသို့ ပို့ထားသော်လည်း ရောဂါသည် အားလုံးမှာလည်း ဤနေရာသို့ မရောက်ရှိ နိုင်ပါကြောင်း၊ ဒါ့အပြင် ပြည့်တန်ဆာဥပဒေတွင် ကျူးလွန်တာချင်းအတူတူ အမျိုးသားများမှာ ၎င်းပြစ်မှုတွင် ဖက်စပ်ပါဝင်သည်လည်းဖြစ်ပြီး ပုဒ်မ ၁၄ အရ တရားသူကြီးရှေ့တွင် စုံလင်စွာ ဖော်ပြနိုင်ရင် ဤဥပဒေအရ ပြစ်ဒဏ်မှ ကင်းလွတ်စေရမည်ဟု ဖော်ပြထားချက်အရ လိင်အရောင်းအဝယ် လုပ်သူချင်း အတူတူ လိင်ကိုရောင်းစားသူ အမျိုးသမီးကတော့ ပြစ်မှုမြောက်ပြီး လိင်ကို ဝယ်ယူသူ အမျိုးသားမှာတော့ ပြစ်မှုမမြောက်ခြင်း ရှိသည်ကိုတွေ့ရှိရသည့်အတွက် ဤအချက်မှာ ပြန်လည်ပြုပြင်သင့်သော အချက်အဖြစ် ထင်မြင်မိပါကြောင်း၊ ထို့အတွက်ကြောင့် မိမိတို့အနေဖြင့် ပြည့်တန်ဆာများကို ထိန်းသိမ်းရန် စဉ်းစားရမည်ဖြစ်ပါကြောင်း၊ ယင်းအလုပ်လုပ်သူများကို ကျန်းမာရေးအရ စစ်ဆေးပြီး လိင်နဲ့ ပတ်သက်သော ရောဂါများ ကူးစက်ပြန့်ပွားမှု မရှိအောင် ကျန်းမာရေးစောင့်ရှောက်မှု များကို တရားဝင်ခွင်ပြုပေးမည်လား၊ သို့မဟုတ် ပြည့်တန်ဆာ ဆိုသော်လည်း နိုင်ငံသားတစ်ဦးဖြစ်သည့်အတွက် နိုင်ငံသားတစ်ဦး ရပိုင်ခွင်‌့ရှိသော တရား ဥပဒေနှင့် အခွင့်အရေးများကို ရနိုင်အောင်ဆောင်ရွက်ပေးနိုင်မည်လား၊ ထို့ပြင် ကလေးသူငယ်အရွယ်များ မုဒိမ်းကျင့်ခံရတာတွေ၊ မိကောင်းဖခင် အမျိုးသမီးလေးများအပေါ်တွင် ပစ်မှတ်ထားနိုင်သော အမျိုးသားများ၏ အန္တရာယ်မှ အတိုင်းအတာတစ်ခုအထိ လျော့ပါးသွားပြီး မုဒိမ်းမှု အန္တရာယ်ကိုလည်း အတိုင်းအတာတစ်ခုအထိ လျော့နိုင်မည်ဟု မိမိအနေဖြင့် ထင်မြင်ယူဆမိပါကြောင်း၊ ထို့အတွက်ကြောင့် အောက် ပါမေးခွန်း များကို မေးမြန်းလိုပါကြောင်း-

• ပြည်ထောင်စုသမ္မတမြန်မာ နိုင်ငံတော် အစိုးရလက်ထက်တွင် ၁၉၄၉ ခုနှစ် ပြည့်တန်ဆာနှိပ်ကွပ်ရေးဥပဒေအရ တစ်နှစ်လျှင် အရေးယူခဲ့သော မူခင်းအရေအတွက် မည်မျှရှိပါသနည်း။
• အဆိုပါ မူခင်းများဖြစ်ပွားရခြင်းမှာ နိုင်ငံတော်၏ ဆင်းရဲမွဲတေမှုပြဿနာနှင့် အလုပ်အကိုင်ရှားပါးမှု ပြဿနာတို့ကြောင့် ပြည့် တန်ဆာ မူခင်းအများစု ဖြစ်လာပြီး ဖမ်းဆီးပြစ်ဒဏ်ပေးရုံဖြင့် ပြည့်တန်ဆာလုပ်ငန်း၊ ပြည့်တန်ဆာအရေအတွက်တွေ များပြားလာ ခြင်းကို ဟန့်တားနိုင်မည်လား။
• ၁၉၄၉ ခုနှစ် ပြည့်တန်ဆာနှိပ်ကွပ်ရေးဥပဒေအရ အရေးယူခံရသော အမျိုး သမီးများမှာ အကျဉ်းထောင်အတွင်းမှာ HIV,AIDS ရောဂါ ပပျောက်ရေးအတွက်လည်းကောင်း၊ ဘဝသစ်ပြန်လည် ထူထောင်ရေး အတွက်လည်းကောင်း ကျန်းမာရေး၊ လူမှုရေးရှု ထောင့်မှရှုမြင်ပြီး ထောင်မှ ပြန်လည် လွတ်မြောက်လာသည့်အခါ မည်ကဲ့သို့ ကူညီထားပါသနည်း။
• အကျဉ်းထောင်မှ ပြန်လည်လွတ်မြောက်သောအခါ မူလပြည့်တန်ဆာလုပ်ငန်းကို ပြန်လည်မရောက်ရှိနိုင်ရေး အတွက် နိုင်ငံတော်မှ မည်ကဲ့သို့ စီမံထားရှိပါသနည်း။
• ၁၉၄၉ ခုနှစ် ပြည့်တန်ဆာနှိပ်ကွပ်ရေး အက်ဥပဒေအရ ယနေ့ခေတ် ကာလနှင့် လိုက်လျော်ညီထွေမှု မရှိသည့် အတွက် ပြန်လည်ပြင်ဆင်ရေးဆွဲရန် အစီအစဉ် ရှိ၊ မရှိ သိရှိလိုပါကြောင်း မေးမြန်းပါသည်။