ယခင်အစည်းဝေးများတွင် “တရားမဝင် မှတ်ပုံတင်မရှိဘဲ စာချုပ်အလွတ်ယူပြီး ငွေချေးငှားမှု များကြောင့် ဆင်းရဲသည့်လူများ လိမ်လည် တရားစွဲခံနေရသည့်ကိစ္စ” ကို သာကေတ  မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမောင်မောင်စိုးက မေးမြန်းခဲ့ရာဘဏ္ဍာရေး ဝန်ကြီးဌာန ဒုတိယဝန်ကြီး ဦးဝင်းစိန် က ယင်းကိစ္စများနှင့် ပတ်သက်ပြီး တည်ဆဲ ဥပဒေများအရ the Money-Lenders Act (၁၉၄၅)၊ အသေးစားငွေချေးလုပ်ငန်းဥပဒေ များနှင့် အရေးယူမည်ဖြစ်ကြောင်း လွှတ်တော်တွင် ဖြေကြားထားခဲ့သော်လည်း ယခုမိမိထံ ရောက်ရှိ နေသော စာများအရ အောက်ပါ မေးခွန်းများကို ကျွန်တော်မေးမြန်းလိုပါကြောင်း၊

• ရန်ကုန်တိုင်းဒေသကြီး၊ ရန်ကင်းမြို့နယ်၊ ဒေါပုံမြို့နယ်၊ ဒလမြို့နယ်၊ ရွှေပြည်သာမြို့နယ်၊ သင်ဃန်းကျွန်းမြို့နယ်၊ သုံးခွမြို့နယ် အပါအဝင် မြို့နယ်များနှင့် မြန်မာနိုင်ငံ မြို့နယ် တော်တော်များများ၌ အတိုးနှုန်းမြင့်မားစွာဖြင့် ငွေတိုးပေးစားသူများက အဆင်းရဲဆုံး ပြည်သူ များအပေါ် စာချုပ်အလွတ်ပေါ်တွင် လက်မှတ်ရေးထိုးခိုင်းခြင်း ပေးဆပ်နေရသည့်အတိုးကို လက်ခံရရှိကြောင်း အထောက်အထားမပေးခြင်း၊ အကြောင်းအမျိုးမျိုးပြပြီး ပြစ်မှုကြောင်းစွဲဆို၍ ထောင်ဒဏ်ကျခံစေခြင်း၊ တရားမကြောင်းစွဲ၍ အိမ်‌မြေများ သိမ်းယူခြင်းနဲ့ပတ်သက်၍ ခွင့်ပြုချက် မှတ်ပုံတင်မရှိဘဲ ငွေတိုးချေးစားသူများအပေါ် တိုင်ကြားခြင်းနှင့် ပတ်သက်၍ ဘဏ္ဍာရေးနှင့်အခွန် ဝန်ကြီးဌာနက မည်ကဲ့သို့ အရေးယူမှုများ ရှိပါသနည်း။
• တရားမဝင်ငွေတိုးချေးစားသူများ အကူအညီပေးနေသော ရပ်ကွက်အုပ်ချုပ်ရေးမှူးတချို့နှင့် ငွေရှင်များဘက်မှ ဘက်လိုက်ဆောင်ရွက် ပေးနေသော တရားသူကြီးအချို့နှင့် ပတ်သက်၍ အရေးယူရန် အစီအစဉ် ရှိ/မရှိ။
• အဆင်းရဲဆုံး ငွေချေးငှား အရင်းအနှီးစားသူများနှင့်ပတ်သက်၍ ဘဝပျက်သည်အထိ တွန်းပို့နေသော လိုင်စင်မဲ့ ငွေတိုးချေးစားသူများအား ထိရောက်စွာ အရေးယူနိုင်ရန် တည်ဆဲဥပဒေများကို ပြင်ဆင်ရန် အစီစဉ် ရှိ/မရှိ။
• အစီအစဉ် ရှိပါက မည်သည့် အချိန်တွင် အကောင်အထည်ဖော်ပေးမည်နည်းကို သိလိုကြောင်း မေးမြန်း ပါသည်။