ကျွန်တော်တို့နိုင်ငံမှာ ဆေးဝါးနှင့် အစားအစာ များ၊ စားသုံးဆီ၊ အဖျော်ယမကာစသည့်တို့နှင့်ပတ်သက်၍ ပစ္စည်းစစ်မှန်မှုမရှိခြင်း၊ အရည်အသွေး မပြည့်မီခြင်း၊ အန္တရာယ်ရှိသောပစ္စည်းများ၊ ဆိုးဆေးများ၊ ကူးစက်ရောဂါဖြစ်စေနိုင်သော ပိုးမွှားများ ပါဝင်နေခြင်း၊ သန့်ရှင်းစင်ကြယ်စွာစီမံပြုလုပ်ရောင်းချသိုလှောင်ခြင်း မရှိခြင်းတို့ကြောင့် ကျန်းမာရေး ဆိုင်ရာ ရေတိုရေရှည်ပြဿနာများ၊ ရောဂါများ၊ ဘေးအန္တရာယ်များကို ပြည်သူလူထုတို့ ကြုံတွေ့ခံစား နေရသည်မှာ ကာလကြာရှည်လှပြီဖြစ်ပါတယ်ခင်ဗျား။ ဥက္ကဋ္ဌကြီးခင်ဗျား။ ဒီဆေးဝါးများ၊ အစား အသောက်များစသည်တို့ကို ပြည်တွင်းမှထုတ်လုပ်ရောင်းချနေပြီဖြစ်သလို ပြည်ပမှလည်း တရားဝင် တင်သွင်းရောင်းချနေသည်များလည်း ရှိပါတယ်။ တဖန် တရားမဝင်ပြည်ပနည်းလမ်းအမျိုးမျိုးမှ မိမိတို့ ဈေးကွက်အတွင်းသို့ ထိုးဖောက်ရောက်ရှိလာပြီး ဝင်ရောက်ရောင်းချနေတာမျိုးတွေလည်း ရှိပါတယ် ခင်ဗျား။ ဒီကိစ္စများနဲ့ပတ်သက်ပြီး ဝေဖန်သုံးသပ်မှုများ၊ အကြံပြုမှုများ၊ ဆွေးနွေးမှုများ ပေါ်ပေါက်ခဲ့ ပါတယ်။ မကြာခင်မှာလည်း ဒေသတွင်းနိုင်ငံများနဲ့ ဒီထက်ပိုပြီးတော့ ရင်းရင်းနှီးနှီးပူးပေါင်း ဆောင်ရွက်စရာတွေရှိနေတဲ့အတွက်ကြောင့် ကျွန်တော်တို့၏ လုပ်ကိုင်ဆောင်ရွက်ပုံ၊ ဖွဲ့စည်းပုံ၊ စီမံခန့်ခွဲပုံတို့ဟာ ပိုပြီးတော့ မြင်သာထင်သာဖြစ်လာမှာသေချာပါတယ်။ ပေါ်ပေါ်လွင်လွင်ထင်ထင် ရှားရှားလည်းဖြစ်လာမှာသေချာပါတယ်။ ဒီကိစ္စများနဲ့ပတ်သက်လို့ပြောရလို့ရှိရင် ထုတ်လုပ်သူ၊ ရောင်းချသူ၊ ဖြန့်ဖြူးသူ၊ ဝယ်ယူစားသုံးသူများနဲ့ အစိုးရအဖွဲ့အစည်းမှ လုပ်ငန်းသဘောအရ သက်ဆိုင်ရာတာဝန်ရှိဌာနများအားလုံးနဲ့ သက်ဆိုင်ပါတယ်။ အထူးသဖြင့်တော့ ကျန်းမာရေးဝန်ကြီး ဌာန၏ အစားအသောက်နှင့်ဆေးဝါးကွပ်ကဲရေးဌာနမှာ အဓိက ဒီဌာနက တာဝန်ယူလုပ်ဆောင်လျက် ရှိပါတယ်။ သို့ပေမယ့်လို့ နှီးနွယ်ဌာနများ၊ စီးပွားရေးနှင့်ကူသန်းရောင်းဝယ်ရေးဝန်ကြီးဌာန၊ မြို့တော် စည်ပင်သာယာရေးကော်မတီစသည်ဖြင့် ဒီနှီးနွယ်ဌာနတွေကလည်းပဲ အရေးကြီးတဲ့ကဏ္ဍကနေ ပြီးတော့ ပါဝင်ဆောင်ရွက်လျက်ရှိတာကို ကျွန်တော်တို့တွေ့ရှိရပါတယ်။ လွန်ခဲ့တဲ့ နှစ်နှစ်၊ သုံးနှစ် လောက်ကအတွင်းဆိုရင် ကျန်းမာရေးဝန်ကြီးဌာနဟာ ဤကိစ္စနဲ့ပတ်သက်လို့ အရှိန်အဟုန်တိုးမြှင့် ပြီးတော့ တော်တော်လေး အားရဝမ်းသာစရာဆောင်ရွက်ခဲ့တာကို ကျွန်တော်တို့ တွေ့ရှိရပါတယ်။ ဒီလုပ်ငန်းဟာ တကယ်တော့ ပြည်သူလူထု၏ ကျန်းမာရေး၊ စီးပွားရေးနှင့်သက်ဆိုင်ပါတယ်။ ကျန်းမာရေးလို့ ပြောပေမယ့် တကယ့်တကယ် တိတိကျကျ လက်တွေ့ကျကျ ရင့်ရင့်သီးသီးပြောရရင် သေရေးရှင်ရေးနဲ့ဆိုင်ပါတယ်။ ပြည်သူလူထု၏ ကျန်းမာရေး၊ စီးပွားရေး ဒီလိုသက်ဆိုင်ပြီးတဲ့နောက်မှာ ဒီလုပ်ငန်းဟာ ကြီးမားသော အတိုင်းအတာလည်းရှိပါတယ်။ ကျယ်ပြန့်သော အတိုင်းအတာလည်း ရှိပါတယ်။ နိုင်ငံတစ်ခု၏ Image စွမ်းဆောင်နိုင်မှု၊ တာဝန်ယူနိုင်မှု၊ အသိစိတ်ဓာတ်တို့နဲ့လည်း သက်ဆိုင်ပါတယ်။ မိမိတို့မှာ ဝန်နဲ့အား မမျှပါဘဲနဲ့ ပညာရှင်ကွပ်ကဲကြီးကြပ်ဝန်ထမ်းစစ်ဆေးရေး ဝန်ထမ်းများ စက်ပစ္စည်း၊ ဓာတုပစ္စည်း၊ နည်းပညာ Technology စသည်ဖြင့် အားနည်းမှုများ များစွာရှိနေတဲ့ကြားထဲက မိမိတတ်နိုင်သလောက် လုပ်နိုင်သလောက် အကောင်းဆုံးကြိုးစားပြီးတော့ အစွမ်းကုန်လုပ်ဆောင်နိုင် နေတာကို ကျွန်တော်တို့တွေ့ရပါတယ်။ သိုပေမယ့် ဒီကိစ္စဟာ ခုနက ကျွန်တော်ပြောသလို နိုင်ငံတစ်နိုင်ငံ ဖွံ့ဖြိုးတိုးတက်လာတာနဲ့အမျှ ကြီးမားထွန်းကားလာတာနဲ့အမျှ ဒီလုပ်ငန်းဟာလည်း ပို၍ပို၍ ကျယ်ပြန့်လာမှာဖြစ်သလို တာဝန်ယူပြီး လုပ်ဆောင်ပေးရသည့်ဌာန တွေရဲ့ တာဝန်သည်လည်း ပို၍ပို၍ ကြီးမားလာမှာဖြစ်ပါတယ်။ Limitation တွေအများကြီးထဲက လုပ်ကိုင်ဆောင်ရွက်နေရပါတယ်။ ပညာပေးတဲ့အပိုင်းဟာ ဒီလုပ်ငန်းတွေနဲ့ပတ်သက်လို့ အင်မတန်မှ အရေးကြီးပါတယ်။ သို့ပေမယ့် ပညာပေးနေရုံတစ်ခုတည်းနဲ့မရပါဘူး။ ဥပဒေနှင့်ထိန်းချုပ်ခြင်း၊ အရေးယူခြင်း၊ ကြပ်မတ်ဆောင်ရွက်ခြင်းတွေဟာ ကျွန်တော်တို့လို နိုင်ငံမျိုးမဆိုထားပေမယ့် အင်မတန် ကြီးမားတဲ့နိုင်ငံများမှာတောင်မှ ဒီလိုပဲ ဥပဒေနဲ့ထိထိရောက်ရောက် ထိန်းချုပ်တဲ့သဘောမျိုး ကြပ်မတ် တဲ့သဘောမျိုးတွေရှိနေရပါတယ်။ ဒါကြောင့် စစ်မှန်သော အရည်အသွေးပြည့်မီသော ဆေးဝါးများ၊ သန့်ရှင်း၍ အန္တရာယ်ကင်းသော စားသုံးဆီနှင့်အစားအစာများ အများပြည်သူတို့ ယုံကြည်စိတ်ချစွာ စားသုံးနိုင်ရေးအတွက် သက်ဆိုင်ရာဌာနများက လုပ်ငန်းအလိုက် မည်သို့ဆောင်ရွက်မည်ကို သိရှိလိုသည့်အတွက် မေးမြန်းရခြင်း ဖြစ်ပါသည်။