(ဃ)-ဧရာဝတီမြစ်ရေ တိုက်စားမှုကြောင့် ကမ်းပါးပြိုမှုတားဆီးပေးရန် နှင့် ကမ်းပါးပြို၍ ဖျက်သိမ်း ထားသော အိမ်ထောင်စုများအတွက် မြေနေရာချထားပေးရန် နှင့်စပ်လျဉ်းသည့် မေးခွန်း
ပန်းတောင်းမြို့၊ စည်သာရပ်ကွက်မှာ ဧရာဝတီမြစ်ရေဟာ ၂၀၁၂ ခုနှစ်၊ မတ်၊ ဧပြီလမှာ ရေတိုက်စားခဲ့ပါတယ်။ ရေတိုက်စားတဲ့အတွက်ကြောင့်မို့လို့ ပန်းတောင်း-တောင်ငူလမ်းမကြီး မိုင်တိုင် အမှတ် ၁၁/၆ အနီးမှာ ကမ်းပါးပြိုပြီးတော့ ပန်းတောင်း-တောင်ငူလမ်းမကြီးဘေး ပေ ၁၂၀ ခန့် အကွာအထိ ရောက်ရှိနေပြီဖြစ်ပါတယ်။ အဲ့လို ကမ်းပါးပြိုတဲ့အတွက်ကြောင့်မို့လည်း စည်သာရပ်ကွက် ကလူနေအိမ်ခြေ ၈၀ ခန့် ဖျက်သိမ်းပြီးတော့ ထားရတဲ့အနေအထားမှာ ရှိပါတယ်။ ဆက်လက်ပြီးတော့ ရေတိုက်စားပါက လမ်းမကြီးနှင့်ပြည်သူ့ဆောက်လုပ်ရေးလုပ်ငန်းပိုင် စည်သာတံတားပါ ပျက်စီးနိုင်တဲ့ အနေအထားမှာ ရှိပါတယ်။ ဒါကြောင့်မို့လို့ ပြည်သူများက တင်ပြချက်အရ ရေကြောင်းပြောင်းလဲ တိုက်စားမှုကို ထိန်းသိမ်းကာကွယ်ပေးစေလိုတဲ့ ဆန္ဒရှိပါတယ်။ နောက် ဖျက်သိမ်းထားရတဲ့အိမ်များ အတွက်လည်း မြေနေရာချထားပေးစေလိုတဲ့ ဆန္ဒများရှိ၍ တင်ပြလာခြင်း ဖြစ်ပါတယ်။ သို့ဖြစ်ပါ၍ ကျွန်တော့်အနေဖြင့် မေးမြန်းလိုသောမေးခွန်းမှာ (က) အဆိုပါနေရာအား ကမ်းပြိုမှုတားဆီးပေးရန် အစီအစဉ် ရှိ၊ မရှိ (ခ) ကမ်းပါးပြို၍ ဖျက်သိမ်းထားရသော အိမ်ထောင်စုများအတွက် မြေနေရာချထား ပေးရန်အစီအစဉ်ရှိ၊မရှိ ဖြေကြားပေးပါရန် မေးမြန်းပါသည်။