တည်ဆဲ ရာဇသတ်ကြီးဥပဒေပုဒ်မ ၃၇၆ တွင် အသက် ၁၆ နှစ်အောက်ကို အသက်မပြည့်ဟု သတ်မှတ်ထားသော်လည်း သက်ငယ်မုဒိမ်းအတွက် ကျူးလွန်သူများကို သီးခြား ထိရောက် ဟန့်တားလောက်သော ပြစ်ဒဏ်မပါဝင်ပါကြောင်း၊ သက်ဆိုင်ရာဝန်ကြီးဌာနမှ ထောင်ဒဏ် အနှစ် ၂၀ ချမှတ်ရန်ညွှန်ကြားထားသော်လည်း အဆိုပါသက်ငယ်မုဒိမ်းဖြစ်ပွား မှုများမှာ လျော့ပါး သွားခြင်းမရှိပါကြောင်း၊ အကျူးလွန်ခံရသည့် အပြစ်မဲ့ကလေးသူငယ်များ၏ ဘဝများသည် စိတ်ဒဏ်ရာအမျိုးမျိုးဖြင့် အနာဂတ်ရှေ့ခရီးလမ်းအတွက် ယုံကြည်မှုများ ကွယ်ပျောက်သွားခြင်း၊ အရွယ်နှင့်မမျှအောင် အကျူးလွန်ခံရခြင်းကြောင့် ထိခိုက်ဒဏ်ရာ အနာတရဖြစ်ကြရင်းနှင့် အသက်ပါဆုံးရှုံးရသည့်အထိ ဖြစ်ပေါ်နေပါကြောင်း၊

ကျူးလွန်သူအချို့ကို မိအောင်မဖမ်းနိုင်ခြင်း၊ နောင်ကျူးလွန်မည့်သူများ ထပ်မံမကျူးလွန်ရဲအောင် ကြီးလေးသည့်ပြစ်ဒဏ်များမပေးခြင်းများကြောင့် သက်ငယ်မုဒိမ်းများ ပပျောက်သွားခြင်းမရှိတာဟု လူဘောင်အသိုင်းအဝိုင်းက ထင်မြင်ယူဆနေကြပါကြောင်း၊ ထို့ပြင် မုဒိမ်းမှုဟူသည် လူမှုကျင့်ဝတ် သိက္ခာနှင့်လည်းဆိုင်နေသည်ဖြစ်ရာ ကျူးလွန်သူကို သနားခွင့်လွှတ် နိုင်ဖွယ်မရှိနိုင်သည့်အပြင် မုဒိမ်းကောင်များသည် ကလေးသူငယ်တွေကို ကျူးလွန်ပြီးနောက် ပြန်မပြောနိုင်အောင် သတ်ပစ်သည်အထိ ရက်စက် ယုတ်မာမှုများကို ကမ်းကုန်အောင် ပြုကျင့်ကြပါကြောင်း၊

အာဏာရှိပုဂ္ဂိုလ်များက သက်ငယ်မုဒိမ်း အကျူးလွန်ခံရသည့်မိသားစုကို ငွေကြေးဖြင့် ဖြား ယောင်းပြီး တရား မစွဲဆိုနိုင်ရန် ဆောင်ရွက်ပေးသူများကိုလည်း ဥပဒေနှင့်အညီ အရေးယူ ဆောင်ရွက်သင့်သလို ပြုကျင့်ခံရသူမိသားစုအသိုင်းအဝိုင်းမှာ အားငယ်စိတ်ပျက်လာစေရန်နှင့် အမှုအား မတိုင်ကြားရန်၊ အမှုကိုလည်း ပေါ့လျော့ရန် တရားစွဲအဖွဲ့များ၏ ဆောင်ရွက်ချက်များကို တင်းတင်းကြပ်ကြပ်လမ်းညွှန်မှုများပေးရန် လိုအပ်နေပါကြောင်း၊ ထို့အပြင် မှုခင်းဖြစ်ပွားပါက မှန်ကန်တိကျသည့် စိစစ် မှတ်တမ်းမှုတွေကိုလည်း အမှန်ဆုံးရရှိအောင် သက်ဆိုင်ရာတာဝန်ရှိ သူများက ဆောင်ရွက်ပေးသင့်ပါကြောင်း၊ နစ်နာခဲ့ရသည့် ကလေးငယ်နှင့် မိသားစုတွေအတွက် ကောင်းမွန်သည့် အနာဂတ်ဖန်တီး ပေးရန်လည်း အမှန်တကယ်လိုအပ်ပြီး ပတ်ဝန်းကျင် အသိုင်းအဝိုင်းတို့ကလည်း စိတ်ဒဏ်ရာများ ထပ်မပေးရန် လွန်စွာအရေးကြီးပါကြောင်း၊

 ပြစ်မှုကျူးလွန်ရန် အားပေးအားမြှောက်ဖြစ်စေသည့် WY အပါ အဝင် စိတ်ကြွဆေးများကို ထိထိရောက်ရောက်နှိမ်နင်းခြင်းများ၊ ညစ်ညမ်းဓာတ်ပုံများ၊ ညစ်ညမ်းစာပေများ၊ ဗွီဒီယိုဖိုင်များနှင့် ရုပ်ရှင်များကိုလည်း ပညာပေးအစီအစဉ်များဖြင့် ပြန်လည်ထိန်းကျောင်းခြင်းများ၊ ကလေး သူငယ် များ မိမိကိုယ်ကို ထိန်းကျောင်းနိုင်မှုရှိရန်အတွက် အသိပညာဗဟုသုတများ ဝေငှပေးရန်နှင့် တရားရုံးများတွင် ပြစ်မှုနှင့်ကိုက်ညီသည့် ပြစ်ဒဏ်ကို ထိထိရောက်ရောက်၊ မြန်မြန်ဆန်ဆန်ချမှတ် နိုင်စေရန် အစီအစဉ် ရှိ/မရှိ သိလိုပါကြောင်း မေးမြန်းပါသည်။