ကြို့ပင်ကောက်မြို့နယ်အတွင်းမှာ ပြည်သူလူထုကျန်းမာရေးစောင့်ရှောက်မှုနှင့်ပတ်သက်တဲ့မေးခွန်း မေးမြန်းတင်ပြမှာဖြစ်ပါတယ်။ ကြို့ပင်ကောက်မြို့နယ် ပြည်သူ့ဆေးရုံဟာ ယခင်က ၂၅ ခုတင်ဆံ့ ဆေးရုံဖြစ်ပါတယ်။ ပထမအကြိမ် ပြည်သူ့လွှတ်တော် တတိယပုံမှန်အစည်းအဝေးမှာ ဒီဆေးရုံကို ခုတင် ၅၀ ဆံ့ဆေးရုံအဖြစ် အဆင့်တိုးမြှင့်ပေးဖို့ ကြယ်ပွင့်မပြမေးခွန်းနဲ့ မေးမြန်းတင်ပြခဲ့ပါတယ်။ ၂၀၁၃-၂၀၁၄ ဘဏ္ဍာနှစ်အတွင်း ဆောင်ရွက်ပေးမယ်ဆိုတဲ့ ဖြေကြားချက်နှင့်အညီဆောင်ရွက်ပေးနေပြီဖြစ်လို့ မြို့နယ်ပြည်သူများက ဝမ်းသာပီတိဖြစ်နေကြပါတယ်။ အခုဆိုရင် ခုတင် ၅၀ ဆံ့ဆေးရုံအဆင့်နဲ့ လျော်ညီတဲ့ နှစ်ထပ်လူနာဆောင်ကြီး ဆောက်လုပ်နေတာကို တွေ့မြင်ကြရတဲ့အတွက် နိုင်ငံတော်ကို အထူးပဲကျေးဇူးတင် ဝမ်းမြောက်လျက်ရှိကြပါတယ်။ ကြို့ပင်ကောက်မြို့နယ်အတွင်းမှာ နှစ်စဉ် တိုးတက်လာတဲ့ လူဦးရေနှင့်အညီ ကျန်းမာရေးစောင့်ရှောက်မှုလုပ်ငန်းများ တိုးမြှင့်ဆောင်ရွက်ပေးနိုင် ပါရန် အောက်ပါမေးခွန်းသုံးခုကို မေးမြန်းတင်ပြအပ်ပါတယ်။

(က) မြို့နယ်ပြည်သူ့ဆေးရုံကြီးတွင် လူနာတင်ယာဉ်အသစ်တစ်စီး ချမှတ်ပေးရန် အစီအစဉ် ရှိ/မရှိနှင့် မည်သည့်နှစ်တွင် ချမှတ်ပေးမည်။ (ခ) လယ်တီကျေးလက်ကျန်းမာရေးဌာနအား ၁၆ ခုတင် ဆံံ့တိုက်နယ်ဆေးရုံအဖြစ် အဆင့်တိုးမြှင့်ချမှတ်ပေးရန် အစီအစဉ်ရှိ/မရှိ။ (ဂ) ကြို့ပင်ကောက်မြို့နယ် အတွင်းရှိ ကျေးလက်ကျန်းမာရေးဌာနများ၊ ကျေးလက်ကျန်းမာရေးဌာနခွဲများအား ဒေသလိုအပ်ချက် အရ အဆင့်တိုးမြှင့်သတ်မှတ်ပေးရန် အစီအစဉ်ရှိ/မရှိနှင့် အစီအစဉ်ရှိပါက ဦးစားပေးအစီအစဉ် အလိုက် ဖြေကြားပေးပါရန် ပြည်သူလူထုကျန်းမာရေးစောင့်ရှောက်မှုလုပ်ငန်းများ ပိုမိုထိရောက် အောင်မြင် စေလိုတဲ့စေတနာနဲ့ ပြည်သူ့လွှတ်တော်ဥက္ကဋ္ဌကြီးမှတစ်ဆင့် မေးမြန်းပါသည်။