ရန်ကုန်-မန္တလေး အမြန်လမ်းမကြီး အောင်မြင်စွာဖောက်လုပ်နိုင်ခြင်းဟာ ကျွန်တော်တို့ နိုင်ငံတော်ရဲ့ ဂုဏ်ယူဖွယ်ရာ အောင်မြင်မှုတစ်ခုဖြစ်သလို ခရီးသွားလာမှုနဲ့ ကုန်စည်စီးဆင်းမှုအတွက်လည်း အလွန် အကျိုးရှိတဲ့လုပ်ငန်းတစ်ခုပဲဖြစ်ပါတယ်။ ထို့အတူ ဆောက်လုပ်ရေးဝန်ကြီးဌာနရဲ့ ဂုဏ်ယူဖွယ်ရာ သမိုင်းမှတ်တိုင်ကြီးတစ်ခုအဖြစ်တည်ရှိနေမှာဖြစ်ပါတယ်။ ယခု ကျွန်တော်တင်ပြလိုတဲ့ကိစ္စကတော့ ရန်ကုန်-မန္တလေး အမြန်လမ်းမကြီးတစ်လျှောက် လမ်းဘေးဝဲယာရှိကျေးရွာများမှာ နေထိုင်တဲ့ ဒေသခံပြည်သူတွေနဲ့ပတ်သက်တဲ့ကိစ္စဖြစ်ပါတယ်။ ရန်ကုန်-မန္တလေးအမြန်လမ်းမကြီးရဲ့ ဘေးဝဲယာမှာ ရှိတဲ့ကျေးလက်ဒေသများဟာ နဂိုမိမိတို့ ကျေးလက်ဒေသနဲ့ မြို့ပြဆက်သွယ်ရေးလမ်းများ ကျေးလက်ဒေသချင်းဆက်သွယ်ရေး လမ်းကြောင်းများရှိပြီးဖြစ်ပါတယ်။ သို့သော် အမြန်လမ်းမကြီး ဖောက်လုပ်လိုက်တဲ့အခါမှာ အဲ့ဒီလမ်းကြောင်းတချို့ဟာ ပိတ်ဆို့လိုက်သလိုဖြစ်သွားတဲ့အနေအထား ရှိပါတယ်။ နောက်ကျွန်တော်တို့ ရန်ကုန်-မန္တလေး အမြန်လမ်းမကြီးကိုဖြတ်ဖို့ဟာလည်း သတ်မှတ်ထား တဲ့ Under Pass များကသာ ဖြတ်သန်းရတာဖြစ်ပါတယ်။ လက်ရှိအနေအထားအရ သတ်မှတ်ထားတဲ့ Under Pass များနဲ့ နဂိုမူလလမ်းဟောင်းများကို ဆက်သွယ်ထားတဲ့ လမ်းများမရှိခြင်းကြောင့် ကျွန်တော်တို့ ဒေသခံပြည်သူတွေဟာ ကျန်းမာရေး၊ စီးပွားရေး၊ လူမှုရေး၊ ပညာရေးကိစ္စများအတွက် ဖြတ်သန်းရာမှာလည်းကောင်း၊ အချို့ကျေးရွာများမှာဆိုရင် နာရေးကိစ္စများဆောင်ရွက်ရတာတောင်မှ အတော်အခက်အခဲရှိနေတဲ့အနေအထားရှိပါတယ်။ အဲ့ဒါကြောင့် ကျွန်တော် မေးမြန်းလိုတဲ့မေးခွန်း ကတော့  မူလဆက်သွယ်ရေးလမ်းဟောင်းများနဲ့ လမ်းဖြတ်တံတား Under Pass တို့ဆက်သွယ်သည့် လမ်းကြောင်းများဖောက်ပေးနိုင်ခြင်း ရှိ၊ မရှိ။ နောက်ကျွန်တော်တို့ သက်ဆိုင်ရာကျေးရွာများ၌ Under Pass များသို့ဆက်သွယ်တဲ့ လမ်းများဖောက်ပေးနိုင်ခြင်း ရှိ၊ မရှိနဲ့ အစီအစဉ်ရှိပါက မည်သည့် အချိန်တွင်ဖောက်လုပ်ပေးမည်၊ အစီအစဉ်မရှိပါက အခြားဒေသခံများသွားလာရေးလွယ်ကူ အဆင်ပြေ ချောမွေ့စေရန်အတွက် မည်သို့အစီအမံများရှိမည်ကိုသိရှိလိုကြောင်း မေးမြန်းပါသည်။