ယနေ့နိုင်ငံတော်ဟာ လက်မှုလယ်ယာစိုက်ပျိုးရေးကနေ စက်မှု လယ်ယာစိုက်ပျိုးရေးသို့ တဖြည်းဖြည်းတိုးတက်ပြောင်းလဲလာနေပြီဖြစ်ပါတယ်။ ကျေးလက်နေ ပြည်သူများဟာလည်း စက်များ၊ ယာဉ်များကို ပိုမိုအသုံးပြုလာကြပြီဖြစ်ပါတယ်။ ကျေးလက်ဒေသ များရဲ့ စိုက်ပျိုးရေး၊ မွေးမြူရေး၊ သယ်ယူပို့ဆောင်ရေးနဲ့ ဒေသဖွံ့ဖြိုးရေးလုပ်ငန်းတွေမှာ ထော်လာဂျီယာဉ်များကိုလည်း ကျယ်ပြန့်စွာသုံးစွဲလာကြပြီဖြစ်တဲ့အတွက် ဒေသအတွင်းမှာလုပ်ငန်း ဆောင်တာများ ပိုမိုတိုးတက်အဆင်ပြေမြန်ဆန်လာကြပြီဖြစ်ပါတယ်။ အလားတူ အဲဒီယာဉ်များကို ရှမ်းပြည်နယ်မှာလည်းသုံးစွဲလျက်ရှိနေတာမှာ ၂၀၁၁ ခုနှစ်၊ မေလအတွင်းက ရှမ်းပြည်တောင်ပိုင်း၊ လွိုင်လင်မြို့နယ်မှဒေသခံများဟာ ထော်လာဂျီ(ထုံကုန်းလေးလုံးထိုး)ယာဉ်များကို တရားဝင်သုံးစွဲနိုင် ရေးအတွက်အခွန်ပေးဆောင်ပြီး ယာဉ်မှတ်ပုံတင်ခွင့်ရရှိရေးဆောင်ရွက်ရာမှာ အဲဒီယာဉ်များဟာ အခွန်ဆောင်ခွင့်မရရှိတဲ့အပြင် အကောက်ခွန်ဥပဒေပုဒ်မ ၁၆၇(ဂ) အရ ပြည်သူ့ဘဏ္ဍာအဖြစ် အပြီးတိုင် သိမ်းဆည်းခြင်းခံရမယ်လို့သိရပါတယ်။ ဒါ့အပြင် သွင်းကုန်ထုတ်ကုန် ဥပဒေပုဒ်မ ၅(၁)၊ ၅(၃)အရ ယာဉ်ပိုင်ရှင်နဲ့ ယာဉ်မောင်းများဟာလည်း အရေးယူခံရမယ့်အခြေအနေမျိုးကိုရောက်ရှိ နေပါတယ်။ သို့ပါသော်လည်း အလားတူထော်လာဂျီ(ထုံကုန်းလေးလုံးထိုး)ယာဉ်များဟာ ရန်ကုန်မြို့နဲ့ အခြားမြို့ကြီးများမှာ ကုမ္ပဏီများအနေနဲ့ တရားဝင်ကြော်ငြာ၍လည်းကောင်း၊ အရောင်းပြခန်းများ ဖွင့်လှစ်၍လည်းကောင်း အများပြည်သူသုံးစွဲနိုင်ဖို့ရောင်းချပေးလျက်ရှိတာကိုတွေ့ရပါတယ်။ သို့ပါ၍ အဆိုပါထော်လာဂျီ(ထုံကုန်းလေးလုံးထိုး)ယာဉ်များမှတ်ပုံတင်ခွင့်ရရှိရေးတွင် မည့်သို့သောအကြောင်း အချက်များကြောင့် ထိုသို့ကွဲလွဲချက်များရှိနေသည်ကို သိရှိလိုပါကြောင်းမေးမြန်းပါသည်။