ရခိုင်ပြည်နယ်၊ မောင်တောခရိုင်ရှိ ဒေသခံ ပြည်ထောင်စုဖွား  မြန်မာ-မွတ်စလင် မဲဆန္ဒရှင်များသည် ၁၉၄၈ ခုနှစ်၊ မြန်မာနိုင်ငံသားဖြစ်မှု အက်ဥပဒေပုဒ်မ ၄ (၂)အရ၊ ဥပဒေအရ နိုင်ငံသား Statutory Citizen ဖြစ်ပြီး ၁၉၈၂ ခုနှစ်၊ မြန်မာနိုင်ငံသားဥပ‌ဒေ ပုဒ်မ ၆ အရ ဤဥပဒေအတည်ပြုသည့်နေ့တွင် နိုင်ငံသားဖြစ်ပြီးသူများသည် နိုင်ငံသားဖြစ်သည့်အတွက် ထိုမြန်မာ-မွတ်စလင်နိုင်ငံသားမဲဆန္ဒရှင်များသည် ၁၉၄၈ ခုနှစ်၊ ပြည်ထောင်စုမြန်မာနိုင်ငံသား ရွေးချယ်ရေး ဥပဒေပုဒ်မ ၃ နှင့်၁၉၄၈ ခု၊ ပြည်ထောင်စုမြန်မာနိုင်ငံသား ဖြစ်မှုအက်ဥပဒေပုဒ်မ ၆ (၁) နှင့် ၆(၂ )အရ Union Citizen Card (UCC) လက်မှတ်ကို လျှောက်ယူရန် တာဝန်မရှိချေ။ ၁၉၄၈ ခု၊ ပြည်ထောင်စု မြန်မာနိုင်ငံသားဖြစ်မှုအက်ဥပဒေပုဒ်မ ၄ (၂)တွင်အကျုံးဝင်သူများဖြစ်ပြီး Statutory Citizen ဥပဒေအရ နိုင်ငံသားဖြစ်ကြောင်းကို အောက်ပါ အမှုများတွင် တရားရုံးချုပ်မှ သုံးသပ်ဆုံးဖြတ်ခဲ့ပါတယ် -

(၁)     မြေယာမိုဟာမက်နှင့် ပြည်ထောင်စုမြန်မာနိုင်ငံ၊ ၁၉၆၅ခုနှစ်၊ မြန်မာနိုင်ငံစီရင်ထုံး တရားရုံးချုပ် စာမျက်နှာ ၅၁ မှာ ပါရှိပါတယ်၊

(၂)     ဟာဆန်အာလီနှင့် မြေယာအာလီတို့နှင့် လူဝင်မှုကြီးကြပ်ရေးနှင့် အမျိုးသား မှတ်ပုံတင်ရေးဝန်ကြီးဌာနအတွင်းဝန်ပါ-၂ အမှု၊ ၁၉၅၉ ခုနှစ်၊ မြန်မာနိုင်ငံစီရင်ထုံး တရားလွှတ်တော်ချုပ်စာမျက်နှာ ၁၈၇၊

(၃)     ဆာရက်အလန်(ခေါ်)ဦးဆာရက်ခါအာမတ်ပါ ၂၃ (၂) အတွင်းဝန်၊ လူဝင်မှုကြီးကြပ်ရေး ဌာနပါနှင့် ၁၉၆၀ ခုနှစ်၊ မြန်မာနိုင်ငံစီရင်ထုံးတရားလွှတ်တော်ချုပ် စာမျက်နှာ ၂၁၅၊

(၄)     ဗိုလ်လိုပါဟာနှင့် ပြည်ထောင်စုမြန်မာနိုင်ငံ ၁၉၆၅ ခုနှစ်၊ မြန်မာနိုင်ငံစီရင်ထုံး တရားရုံးချုပ်၊

(၅)     စွာမေနှင့် ပြည်ထောင်စုမြန်မာနိုင်ငံ၊ ၁၉၆၅ ခုနှစ်၊ မြန်မာနိုင်ငံစီရင်ထုံးတရားရုံးချုပ် စာမျက်နှာ  ၁၂၈ တရားရုံးချုပ်မှသုံးသပ်ဆုံးဖြတ်ခဲ့ပါတယ်။

          ဥက္ကဋ္ဌကြီးခင်ဗျား။ ၁၉၄၈ ခု၊ ပြည်ထောင်စုမြန်မာနိုင်ငံသားရွေးချယ်ရေးဥပဒေနှင့် ၁၉၄၈ ခု၊ ပြည်ထောင်စုမြန်မာနိုင်ငံသားဖြစ်မှုအက်ဥပဒေများကို ၁၉၈၂ ခု၊ မြန်မာနိုင်ငံသားဥပဒေအရ ရုပ်သိမ်း ပြီးဖြစ်သော်လည်း မြန်မာနိုင်ငံသားဥပဒေပြဋ္ဌာန်းခဲ့သော ၁၉၈၂ ခု၊ အောက်တိုဘာ ၁၅ ရက် ဥပဒေ အတည်ပြုပြဋ္ဌာန်းခဲ့သောနေ့မတိုင်မီကပင် ၁၉၄၈ ခု၊ ပြည်ထောင်စုမြန်မာနိုင်ငံသား ဖြစ်မှုအက်ဥပဒေ ၄(၂)အရ လည်းကောင်း၊ မြန်မာနိုင်ငံ ဖွဲ့စည်းပုံအခြေခံဥပဒေအရ လည်းကောင်း၊ မောင်တောခရိုင်ရှိ ပြည်ထောင်စုဖွားဒေသခံ မြန်မာ-မွတ်စလင်များသည် ဥပဒေအရ နိုင်ငံသားများဖြစ်၍ ဥပဒေအရ နိုင်ငံသားဖြစ်ပြီးသူသည် နိုင်ငံသားဖြစ်သည့်အတွက် မြန်မာနိုင်ငံအစိုးရအဆင့်ဆင့် လက်ထက်တွင် ဆန္ဒမဲပေးပိုင်ခွင့်၊ ရွေးကောက်တင်မြှောက်ခံပိုင်ခွင့် ရရှိကြသူများ ဖြစ်ပါသည်။ အထောက်အထား အဖြစ် တင်ပြရလျှင်  -

(၁)     ၁၉၄၈ ခုနှစ်မှစ၍ ၁၉၆၂ ခုနှစ်အထိ ပါလီမန်ခေတ်တွင် ပါလီမန်အမတ်များ၊ ဝန်ကြီး၊ အတွင်းဝန်များ၊ အဆင့်မြင့်အစိုးရအရာထမ်း၊ အမှုထမ်းများ၊

(၂)     မြန်မာဆိုရှယ်လစ်လမ်းစဉ်ပါတီ အစိုးရလက်ထက်တွင် ပြည်သူ့လွှတ်တော်ကိုယ်စားလှယ် များ၊ ပြည်နယ်ပြည်သူ့ကောင်စီဝင်များ၊ မြို့နယ်ပြည်သူ့ကောင်စီ အလုပ်အမှုဆောင် အဖွဲ့ဝင်များ၊ မြို့နယ်တရားသူကြီးဥက္ကဋ္ဌနှင့်အဖွဲ့ဝင်များ၊ မြို့နယ်ကောင်စီဝင်များ၊ မြို့နယ်လုပ်ငန်းစစ်ဆေးရေး အစိုးရအရာထမ်း၊ အမှုထမ်းများပါဝင်ခဲ့ပါတယ်။

(၃)     ၁၉၉၀ ခုနှစ်၊ ရွေးကောက်ပွဲတွင် လွှတ်တော်ကိုယ်စားလှယ်များ ပါဝင်ခဲ့ပါတယ်။

(၄)     ၂၀၁၀ ခုနှစ်၊ ပါတီစုံဒီမိုကရေစီရွေးကောက်ပွဲတွင် ပြည်သူ့လွှတ်တော်ကိုယ်စားလှယ် များ၊ အမျိုးသားလွှတ်တော်ကိုယ်စားလှယ်၊ ပြည်နယ်လွှတ်တော်ကိုယ်စားလှယ်များကို ရွေးကောက် တင်မြှောက်ခံခဲ့ရပါတယ်။

နိုင်ငံတော်မှ ပေးအပ်သည့်တာဝန်များကိုလည်း သစ္စာရှိရှိဆောင်ရွက်သည်မှာ ယနေ့အထိ ဖြစ်ပါတယ်။

ဥက္ကဋ္ဌကြီးခင်ဗျား။ လွှတ်တော်ကိုယ်စားလှယ်များအနေဖြင့် လွှတ်တော်ဆိုင်ရာဥပဒေအခန်း (၄) အပိုဒ် ၉ အရ  ဖွဲ့စည်းပုံအခြေခံဥပဒေနှင့်အညီ တည်ဆဲဥပဒေများကို ကာကွယ်စောင့်ရှောက်တဲ့ နိုင်ငံသားများ၏  မူလအခွင့်အရေးများ ရရှိခံစားနိုင်ရေးကို ရှေးရှုဆောင်ရွက်ခြင်းတို့မှာ ကျွန်တော်တို့ ၏တာဝန်ဖြစ်သည့််အတိုင်း ဥပဒေအရနိုင်ငံသားများက  နိုင်ငံသားစိစစ်ရေးကတ်ပြားများရရှိမှသာ လွတ်လပ်စွာ ခရီးသွားလာခွင့်၊ အသက်မွေးဝမ်းကျောင်းပညာသင်ကြားခွင့်၊ ပြည်ထောင်စု၏ အခြားဒေသရှိ တိုင်းရင်းသားညီအစ်ကိုမောင်နှစ်မများနှင့် ချစ်ခင်ရင်းနှီးစွာနွေးထွေးပြီးစစ်မှန်သော ပြည်ထောင်စုစိတ်ဓာတ်များ၊ တိုင်းရင်းသားစည်းလုံးညီညွတ်မှုစိတ်ဓာတ်များ ပေါ်ပေါက်ပြီး၊ ယဉ်ကျေးမှုများ ဖလှယ်နိုင်အောင် စိတ်ဓာတ်မွေးထုတ်နိုင်ခြင်း၊ ဆင်းရဲနွမ်းပါးမှု လျှော့ချနိုင်ပြီး စည်းကမ်းပြည့်ဝသော ဒီမိုကရေစီနိုင်ငံတော်သစ်ဆီသို့ ချီတက်ချိန်တွင် နိုင်ငံတော်၏ သာယာဖွံ့ဖြိုး ရေးအတွက်လည်းကောင်း၊ ပြည်သူလူထုရဲ့အကျိုးစီးပွားအတွက်လည်းကောင်း မရှိမဖြစ်လိုအပ်ချက် တစ်ခုအဖြစ် တွေ့မြင်နေပါ၍ မေးမြန်းရခြင်း ဖြစ်ပါတယ်။ ကျွန်တော် မေးမြန်းလိုသည့်မေးခွန်းမှာ ရခိုင်ပြည်နယ်၊ မောင်တောခရိုင်ရှိ ဒေသခံပြည်ထောင်စုဖွား မြန်မာ-မွတ်စလင်မဲဆန္ဒရှင်များသည် ဘိုးဘွားအစဉ်အဆက်မှစ၍ မိမိတို့၏ပင်ရင်းတိုင်းပြည်အဖြစ် မျိုးဆက်မပြတ် ထာဝစဉ်အခြေစိုက် နေထိုင်လာရခြင်းကြောင့်   ၁၉၄၇ ခုနှစ်၊ ၁၉၇၄ ခုနှစ်၊ ၂၀၀၈ ခုနှစ်၊ ပြည်ထောင်စုမြန်မာနိုင်ငံတော် ဖွဲ့စည်းပုံအခြေခံဥပဒေများ အရလည်းကောင်း၊ ၁၉၄၈ ခုနှစ်၊ မြန်မာနိုင်ငံသားဖြစ်မှုအက်ဥပဒေပုဒ်မ ၄(၂) နှင့် ၁၉၈၂ ခုနှစ်၊ မြန်မာနိုင်ငံသားဥပဒေ ၆ အရလည်းကောင်း နိုင်ငံသားအရည်အချင်းပြည့်မီသူ ပြည်ထောင်စုဖွား မွေးရာပါဥပဒေအရ  နိုင်ငံသားများဖြစ်ကြပါသည်။ ထိုမွေးရာပါ ပြည်ထောင်စုဖွား မြန်မာနိုင်ငံသား မဲဆန္ဒရှင်များအား နိုင်ငံတော်အစိုးရမှ မည်သည့်အခါ ယာယီနိုင်ငံသား သက်သေခံ ကတ်ပြား(အဖြူရောင်ကတ်)များနှင့်နိုင်ငံသားစစ်ဆေးရေးကတ်ပြား(ပန်းရောင်ကတ်)များဖြင့် လဲလှယ် ထုတ်ပေးမည်ကို သိလိုပါကြောင်း တင်ပြအပ်ပါတယ် ခင်ဗျား။ အားလုံးကို ကျေးဇူးတင်ပါတယ်။