မောင်တောမြို့နယ် အထွေထွေအုပ်ချုပ်ရေးဦးစီးဌာန၏ အမိန့်အမှတ် ၁/၂၀၁၁ အရ ခရီးသွားလာခွင့်ပုံစံ (၄) ရယူပြီးမှသာ ခရီးသွားလာကြရန်ဆိုသည့်  အဲဒီ အချက်မှာ ကျွန်တော်စောစောကတင်ပြသလို နိုင်ငံခြားသားအက်ဥပဒေ ပုဒ်မ၁၀ အရ နိုင်ငံခြားသားများ တစ်မြို့နယ်မှ တစ်မြို့နယ်သို့ အခွင့်အရာရှိ၏ လက်မှတ်ခွင့်ပြုချက်ဖြင့် ခရီးသွားလာရမည်ဟူသော နိုင်ငံခြားသားများနှင့်သက်ဆိုင်သော ဥပဒေဖြစ်ပြီး နိုင်ငံသားများနှင့် သက်ဆိုင်ခြင်းမရှိသည်မှာ ထင်ရှားပါသဖြင့် ယခုအခါ ၂၀၀၈ ခုနှစ်၊ ပြည်ထောင်စုသမ္မတမြန်မာနိုင်ငံတော်ဖွဲ့စည်းပုံအခြေခံ ဥပဒေသစ်နှင့်အညီ စည်းကမ်းပြည့်ဝသော ဒီမိုကရေစီနိုင်ငံတော်သစ်ဆီသို့ ချီတက်နေချိန်တွင် နိုင်ငံတော်၏ သာယာဖွံ့ဖြိုးတိုးတက်ရေးအတွက်လည်းကောင်း၊ ပြည်သူလူထု၏အကျိုးစီးပွားအတွက် လည်းကောင်း အဟန့်အတားတစ်ခုဖြစ်နေတယ်လို့ ကျွန်တော့်အနေနဲ့ ရှုမြင်သုံးသပ်အပ်ပါတယ်။

ထို့ကြောင့် ကျွန်တော် မေးမြန်းလိုတဲ့မေးခွန်းကတော့ မောင်တောခရိုင် အထွေထွေအုပ်ချုပ်ရေး ဦးစီးဌာန၏  ၂၀-၆-၂၀၁၁ ရက်စွဲပါစာအမှတ်၊ ၃/၂၁ -၁၀ဦး၁ (၈၃၄)အရမောင်တောခရိုင်အတွင်းရှိ ဘင်္ဂါလီလူမျိုးများ ခရီးသွားလာရာတွင် မြို့နယ်ကျော်၊ ပြည်နယ်ကျော်၊ တိုင်းကျော်သွားလာမှုကို ခရီးသွားလာခွင့်ပုံစံ(၄)ရယူပြီးမှ သွားလာကြရန်နှင့် ထိုပုံစံ (၄) မယူဘဲ သွားလာခြင်းပြုလုပ်ပါက ပြစ်မှုဆိုင်ရာဥပဒေ ၁၈၈ အရ ပြင်းထန်စွာအရေးယူခံရမည်ဖြစ်ကြောင်း မောင်တောမြို့နယ် အုပ်ချုပ်ရေးမှူးက ၂၂-၇-၂၀၁၁ ရက်စွဲဖြင့် အမိန့်အမှတ်၊ ၁/၂၀၁၁ ကိုထုတ်ပြန်ထားပါတယ်။ မောင်တောခရိုင်အတွင်းရှိ ပြည်ထောင်စုဖွားဒေသခံ မြန်မာ-မွတ်စလင်မဲဆန္ဒရှင်များသည် ရှေးမြန်မာ ဘုရင်အဆက်ဆက်က ၁၈၂၃ မတိုင်မီ ရှေးပဝေသနီကာလမှစ၍နေထိုင်ပြီး မိမိ၏ပင်ရင်းနိုင်ငံအဖြစ် စွဲကိုင်ဘိုးဘွားအစဉ်အဆက်နေထိုင်သူ မြန်မာနိုင်ငံသားများအပေါ် နိုင်ငံခြားသားများအတွက်သာ ပြဋ္ဌာန်းထားသော ဥပဒေကြောင်းအရ လဝကပုံစံ(၄)ဖြင့် အရေးယူအမိန့်ထုတ်ထားကြောင်းကို အစိုးရ အနေဖြင့်သိရှိပါသလား။ သိရှိပါလျှင် မည်သည့်အတွက်ကြောင့် ဤအမိန့်ထုတ်ထားပါသနည်း။ အကယ်၍ မသိရှိပါလျှင် မည်ကဲ့သို့ အရေးယူပါမည်ကို သိလိုပါကြောင်း မေးမြန်းပါသည်။