ပြည်ထောင်စုတရားစီရင်ရေး ဥပဒေ၊ တရားစီရင်ရေးမူမှာ ပုဒ်မ ၃ (ခ)မှာ ဥပဒေကန့်သတ်ချက်မှအပ အများပြည်သူရှေ့မှောက်မှာ တရားစီရင်ရမယ်လို့ ပြဋ္ဌာန်းထားပါတယ်။ ဒီလိုပါပဲ ပုဒ်မခွဲ (ဂ)မှာ ဥပဒေအရ ခုခံချေပပိုင်ခွင့် ပေးထား ပါတယ်။ အဲ့ဒီအပြင် အပြစ်ပေးတဲ့အခါမှာ (ဆ)အရ အကျင့်စာရိတ္တပြုပြင်ဖို့ကိုသာ အပြစ်ပေးရမယ်လို့ ပြဋ္ဌာန်းထားပါတယ်။ ပြီးတော့ ကျွန်တော်တို့နိုင်ငံလွတ်လပ်ရေးရပြီးကာစကတည်းက လက်မှတ် ရေးထိုးခဲ့တဲ့ အပြည်ပြည်ဆိုင်ရာ လူ့အခွင့်အရေးကြေညာစာတမ်း အပိုဒ် ၆ မှာ လူပုဂ္ဂိုလ်ကို ဥပဒေ အခန်းကဏ္ဍကို အသိအမှတ်ပြုသလို လူ့အခွင့်အရေးကြေညာစာတမ်း အပိုဒ် ၇ မှာတော့ ဥပဒေအရ တူညီရမည့်အပြင် ဥပဒေရဲ့အကာအကွယ်ကို ခြားနားမှုမရှိဘဲ မခံစေရလို့ ပြဋ္ဌာန်းခဲ့ပါတယ်။ သို့သော် ကျွန်တော်တို့နိုင်ငံရဲ့ သင်ခန်းစာယူရမယ့်ပြီးခဲ့တဲ့ သမိုင်းဖြတ်သန်းမှုအရ ဘာပြောပြော ကျွန်တော်တို့ စစ်ခုံရုံးတို့၊ သီးသန့်ခုံရုံးတို့နဲ့ နိုင်ငံသူနိုင်ငံသားများကို တရားစီရင်ခဲ့တာရှိပါတယ်။ အဲ့ဒါနှင့်ဆက်စပ် ပြီးတော့ ဥက္ကဋ္ဌကြီးမှတစ်ဆင့် ကျွန်တော် မေးမြန်းလိုတဲ့မေးခွန်းကတော့ ပြည်ထောင်စုသမ္မတမြန်မာ နိုင်ငံတော် ဖွဲ့စည်းပုံအခြေခံဥပဒေ ပုဒ်မ ၃၄၇ တွင် နိုင်ငံတော်သည် မည်သူ့ကိုမဆို ဥပဒေအရာတွင် တန်းတူညီမျှအခွင့်အရေးရရှိစေရမည်။ ထို့အပြင် ဥပဒေ၏ အကာအကွယ်ကိုလည်း တန်းတူညီမျှစွာ ရယူပိုင်ခွင့်ပေးရမည်ဟု ပြဋ္ဌာန်းထားသည်ဖြစ်ရာ ယခင်အစိုးရလက်ထက်က စစ်ခုံရုံးဖြင့် စစ်ဆေးစီရင် ပြစ်ဒဏ်ချမှတ်ခဲ့သည့်ကိစ္စရပ်များတွင် အများပြည်သူရှေ့မှောက်၌ မဟုတ်ဘဲ အကျဉ်းထောင်များ၌ ဖွင့်လှစ်စီရင်ခဲ့သည့် အဆိုပါစစ်ခုံရုံးများနှင့် အထူးရုံးများတွင် ရှေ့နေရှေ့ရပ် ငှားရမ်းခွင့်မရှိဘဲ ချမှတ်ခဲ့သည့်အမိန့်များ မည်၍မည်မျှရှိပါသနည်း။ ပြည်ထောင်စုအစိုးရက အမည်ပျက်စာရင်း (Blacklist) ကြေညာခံရမည့် စီးပွားရေးကုမ္ပဏီများ၊ စီးပွားရေးလုပ်ငန်းရှင်များ၊ ပြည်ပရောက် အဖွဲ့အစည်းများနှင့် လူပုဂ္ဂိုလ်အချို့အား ယနေ့ကာလတွင် အမည်ပျက်စာရင်းမှ ပယ်ဖျက်ခဲ့သလို စစ်ခုံရုံးနှင့် အကျဉ်းထောင်အထူးရုံးများက ပြစ်ဒဏ်ချမှတ်ခဲ့သော ကိစ္စရပ်များအပေါ် ဥပဒေနှင့်အညီ ပြန်လည်သုံးသပ်ပြီး နစ်နာဆုံးရှုံးခဲ့ရသော နိုင်ငံသားများ၏ အခွင့်အရေးကို မည်သို့ရရှိခံစားခွင့် ပေးနိုင်ရေး အစီအစဉ်ရှိ၊ မရှိ သိလိုပါကြောင်း မေးမြန်းပါသည်။