ဦးဝင်းမြင့်(ပြည်မဲဆန္ဒနယ်)

          ပြည်ထောင်စုသမ္မတမြန်မာနိုင်ငံတော် အစိုးရကအသစ်ဖွဲ့စည်းခဲ့တဲ့ မြန်မာ့စက်မှုဖွံ့ဖြိုးရေးဝန်ကြီး ဌာနရဲ့ ပြည်ထောင်စုဝန်ကြီးက ၂၀၁၁ ခုနှစ်၊ စက်တင်ဘာလ ၁၄ ရက်နေ့မှာ ပြည်သူ့လွှတ်တော်သို့ ဝန်ကြီးဌာနက Source Industry ခေါ် Mother Industry များတည်ဆောက်ပြီးတော့ အမျိုးသားစက်မှုဖွံ့ဖြိုးရေး National  Industry  Development အခြေအနေများကို မည်သို့ဖန်တီးမည်။ National  Industry  Complex များ မည်သို့တည်ဆောက်မည်၊ အများပြည်သူများအတွက် စက်မှုဖွံ့ဖြိုးရန် မည်သို့ဆောင်ရွက်မည်။ နိုင်ငံပိုင်၊ ပုဂ္ဂလိကပိုင်ကဏ္ဍကိုမည်သို့ပါဝင်စေမည် စတဲ့လုပ်ငန်းစဉ်များကို အကျယ်တဝင့်ရှင်းလင်း ဖြေကြားသည်‌့အတွက် ပြည်သူများကိုယ်စား အားတက်အားရကျေနပ်မိကြောင်း ဦးစွာပထမပြောကြား လိုပါတယ်။ ဥက္ကဋ္ဌကြီး ခင်ဗျား။ National  Industry Complex များတည်ဆောက်ကြရာမှာ လူအား၊ ငွေအား၊ ရင်းနှီး စိုက်ထုတ်မှု၊ မြှုပ်နှံမှုများ များစွာလိုအပ်မှာဖြစ်ပါတယ်။ အခက်အခဲများ၊ စိန်ခေါ်မှုများကိုလည်း ကျော်လွှားကြရမှာဧကန်မလွဲဖြစ်ပါတယ်။ ဥပမာ - လေယာဉ်ထုတ်လုပ်မယ်ဆိုရင် အင်ဒိုနီးရှားနိုင်ငံရဲ့ လေယာဉ်ထုတ်လုပ်ပြီး တွေ့ကြုံနေရတဲ့ပြဿနာများအပေါ်မှာ လေ့လာသင့်ကြောင်း ထင်မြင်မိပါတယ်။ အဲဒီလို အခက်အခဲစိန်ခေါ်မှုများထဲက အောက်ပါမေးခွန်းသုံးခုကို မေးလိုပါတယ် ခင်ဗျား။

          ပထမမေးခွန်းက‌ေတော့ National  Industry  Complex များက ထုတ်လုပ်မယ့် ကုန်ပစ္စည်းများရဲ့ ဈေးကွက်အခြေအနေနဲ့ ရောင်းချရမယ့်အနေအထားကို မည်ကဲ့သို့စဉ်းစားထား ကြောင်းသိလိုပါတယ်။ ဒုတိယမေးခွန်းကတော့ ဈေးကွက်စီးပွားရေးရဲ့ သဘောတရားများအရ နိုင်ငံတော်ပိုင်စက်ရုံကြီးများ State Own Enterprise (SOE) ကိုလျှော့ချနေတဲ့ အခြေအနေမှာ ယင်းမဟာဗျူဟာနဲ့ ကိုက်ညီမှု ရှိ၊ မရှိကို သိလိုပါတယ်။ တတိယမေးခွန်းကတော့  National  Aviation and Aerospace Industry  Complex များက ထုတ်လုပ်မယ့်လေယာဉ်၊ ရဟတ်ယာဉ် များကဲ့သို့သော ယာဉ်များအတွက် Certification ကို မည်ကဲ့သို့ စဉ်းစားထားကြောင်း သိလိုပါကြောင်းမေးမြန်းပါသည်။