ကျွန်တော်တို့နိုင်ငံဟာ  ကမ္ဘာ့သင်္ဘောသားဈေးကွက်မှာ သင်္ဘောသားများ ပို့ဆောင် ပေးနေတဲ့နိုင်ငံများမှာပါဝင်တဲ့ နိုင်ငံတစ်နိုင်ငံဖြစ်ပါတယ်။ မြန်မာနိုင်ငံမှ သင်္ဘောသားများဟာ အရည် အချင်း ကောင်းမွန်ခြင်း၊ စည်းကမ်းလိုက်နာ၍ အလုပ်ကြိုးစားခြင်းတို့ကြောင့် သင်္ဘောသားဈေးကွက် မှာ နေရာရလျက်ရှိနေပါတယ်။ ရေကြောင်းပို့ဆောင်ရေးညွှန်ကြားမှုဦးစီးဌာနမှာ မှတ်ပုံတင်ထားတဲ့ အရာရှိ သင်္ဘောသားအရေအတွက်ဟာ ၇၅၀၀၀ ကျော်ရှိကြောင်းနဲ့ လက်ရှိတာဝန်ထမ်းဆောင်နေတဲ့ အရာရှိ သင်္ဘောသားအရေအတွက်ဟာ ၁၃၀၀၀ ကျော်ရှိကြောင်းသိရှိရပါတယ်။ အဆိုပါသင်္ဘောသား များဟာ နိုင်ငံတော်အတွက် နိုင်ငံခြားဝင်ငွေကို တစ်ဖက်တစ်လမ်းမှရှာဖွေပေးနေတဲ့ လူ့စွမ်းအား အရင်းအမြစ်များဖြစ်ကြပါတယ်။ လေးစားအပ်ပါသောဥက္ကဋ္ဌကြီးခင်ဗျား။ သင်္ဘောသားအရာရှိများ၊ သင်္ဘောသားများဟာ သတ်မှတ်တဲ့အရည်အချင်းကျွမ်းကျင်မှုနဲ့ လုပ်သက်များပြည့်မီလာတဲ့အခါမှာ အဆင့်မြင့်ရာထူးတာဝန်ထမ်းဆောင်ခွင့်ရရှိရန်အတွက် ရေကြောင်းဘက်ဆိုင်ရာ စာမေးပွဲများကိုဝင် ရောက်ဖြေဆိုလျက်ရှိကြပါတယ်။ လက်ရှိအခြေအနေမှာ ရေကြောင်းပို့ဆောင်ရေးညွှန်ကြားမှုဦးစီးဌာန ကစစ်ဆေးလျက်ရှိတဲ့ရေကြောင်းဘက်ဆိုင်ရာစာမေးပွဲများအနက်မှ နိုင်ငံခြားသားသင်္ဘောရေယာဉ်မှူး ပထမအရာရှိ၊ ဒုတိယအရာရှိစာမေးပွဲနဲ့ အိမ်နီးချင်းနိုင်ငံသား သင်္ဘောရေယာဉ်မှူး ပထမအရာရှိ စာမေးပွဲများကို တစ်နှစ်ကိုနှစ်ကြိမ်စီသာ စစ်ပေးနိုင်ကြောင်းတွေ့ရပါတယ်။ အောင်မြင်မှုရာခိုင်နှုန်း ဟာလည်းပဲ ၃၆ ရာခိုင်နှုန်းမှ ၅၆ ရာခိုင်နှုန်းအထိသာရှိကြောင်းသိရှိရပါတယ်။ အဆိုပါစာမေးပွဲများ ဟာ ကျွမ်းကျင်မှုဆိုင်ရာစစ်ဆေးရတဲ့ စာမေးပွဲများဖြစ်ပါတယ်။ ပတ်ဝန်းကျင်နိုင်ငံများမှာ အလားတူ စာမေးပွဲများ၌ အောင်မြင်မှုရာခိုင်နှုန်းဟာ ၈၀ ရာခိုင်နှုန်းကနေပြီးတော့ ၉၀ ရာခိုင်နှုန်းကျော်အထိ ရှိကြောင်းလည်းပဲ လေ့လာသိရှိရပါတယ်။ ထို့အတူပဲ ရေကြောင်းဘက်ဆိုင်ရာ အင်ဂျင်နီယာစာမေးပွဲ ငါးခုကိုလည်းပဲ တစ်နှစ်လျှင်လေးကြိမ်စီ စစ်ဆေးပေးနိုင်ကြောင်းနဲ့စာမေးပွဲ အောင်မြင်မှုရာခိုင်နှုန်း ဟာလည်း ဒေသတွင်းမှာရှိတဲ့အခြားနိုင်ငံများနဲ့ နှိုင်းယှဉ်ပါကနည်းနေတာကို လေ့လာတွေ့ရှိရပါ တယ်ခင်ဗျား။ လေးစားအပ်ပါသော ဥက္ကဋ္ဌကြီးခင်ဗျား။ စာမေးပွဲစစ်ဆေးတဲ့ အကြိမ်အရေအတွက် နည်းပါးတဲ့အတွက် စာမေးပွဲဖြေဆိုရန် အချိန်ကြာမြင့်စွာစောင့်ဆိုင်းရခြင်းကြောင့် နိုင်ငံတော်ဝင်ငွေ၊ မိသားစုဝင်ငွေများနဲ့လုပ်အားများ နစ်နာဆုံးရှုံးနေပါတယ်။ လက်ရှိကျင့်သုံးနေတဲ့စနစ်ဟာ လိုအပ် သည်ထက်တင်းကြပ်မှုများ၊ ကန့်သတ်မှုများရှိတာကြောင့် စာမေးပွဲအောင်မြင်မှုရာခိုင်နှုန်းနည်းပါးတဲ့ အတွက် နိုင်ငံတော်ရဲ့လူသားအရင်းအမြစ်များ နစ်နာဆုံးရှုံးလျက်ရှိပါတယ်။ အရည်အချင်း ပြည့်ဝတဲ့ သင်္ဘောသားများ လေ့ကျင့်မွေးထုတ်ပေးရန်လိုအပ်တဲ့အပြင် အရေအတွက်အရလည်းပဲပိုမို မွေးထုတ် ပေးရန်လိုအပ်ပါတယ်။ စာမေးပွဲစစ်ဆေးတဲ့အကြိမ်တိုးပေးခြင်း၊ ဖြေလျော့နိုင်တဲ့ကိစ္စများဖြေလျော့ခြင်း၊ ထင်သာမြင်သာရှိခြင်း၊ ဆွေးနွေးလွယ်ကူခြင်းစတဲ့ လိုအပ်တဲ့အခြေအနေများကို လိုအပ်သလိုပြုပြင် ပြောင်းလဲသွားသင့်ပါတယ်။ သို့ဖြစ်ပါ၍ ရေကြောင်းပို့ဆောင်ရေးဝန်ကြီးဌာနက စစ်ဆေးလျက်ရှိတဲ့ ရေကြောင်းဘက်ဆိုင်ရာစာမေးပွဲစစ်ဆေးမှုများဟာ စာမေးပွဲကျင်းပသည့်အကြိမ်အရေအတွက်တိုးမြှင့် ပေးရန်အစီအစဉ် ရှိ၊ မရှိ၊ စစ်မေးတဲ့နည်းလမ်းများပြုပြင်ပြောင်းလဲရန် အစီအစဉ် ရှိ၊ မရှိနဲ့ စာမေးပွဲ အောင်မြင်တဲ့ရာခိုင်နှုန်းတိုးတက်လာရေးအတွက် ပြုပြင်ပြောင်းလဲပေးရန်အစီအစဉ် ရှိ၊ မရှိ ဖြေကြား ပေးပါရန် မေးမြန်းပါသည်။