ပြီးခဲ့တဲ့ ပထမ အကြိမ် ပြည်သူ့လွှတ်တော် စတုတ္ထပုံမှန်အစည်းအဝေးမှာ ယဉ်ကျေးမှုဝန်ကြီးဌာန ဒုတိယဝန်ကြီးက အမျိုးသားယဉ်ကျေးမှုဗဟိုကော်မတီကို ပြင်ဆင်တိုးချဲ့ဖွဲ့စည်းပြီးဖြစ်ကြောင်း ပြောကြား၍ သိရှိခဲ့ရပါ တယ်။ ကျွန်တော်တို့ ပြည်ထောင်စုမြန်မာနိုင်ငံတော်မှာ မှီတင်းနေထိုင်နေကြတဲ့ တိုင်းရင်းသား လူမျိုးစု အသီးသီးရှိတဲ့အထဲမှာ တိုင်းရင်းသားလူမျိုးစုများဖြစ်ကြတဲ့ ကရင်၊ ကချင်၊ ကယား၊ ချင်း၊ မွန်၊ ရခိုင်၊ ရှမ်းအစရှိတဲ့ တိုင်းရင်းသားလူမျိုးစုအသီးသီးတို့ဟာ မိမိတို့ရဲ့ မွန်မြတ်တန်ဖိုးထားအပ်သော ရိုးရာ ယဉ်ကျေးမှုများကို အများအားဖြင့် လေးစားမြတ်နိုးကြတာကို တွေ့ရှိရပါတယ်။ ဥပမာအားဖြင့် တင်ပြ ရရင် ကရင်တိုင်းရင်းသား အများစုဟာ မိမိတို့ရဲ့ ရိုးရာယဉ်ကျေးမှုဖြစ်တဲ့ ကရင်ဒုံးနှင့်တကွ ကရင် ယဉ်ကျေးမှုများကို ကရင်လူငယ်အများစုက ဘယ်လောက်ပဲ ခေတ်မီတယ်၊ ခေတ်ဆန်တယ် ပြောပြော တစ်ဖက်က မိမိတို့ရဲ့ ရိုးရာယဉ်ကျေးမှုကို လေးစားတာကို တွေ့ရပါတယ်။ ထိုနည်းလည်းကောင်းပဲ ရှမ်းတိုင်းရင်းသားလူမျိုးစုများဟာလည်း သူတို့ရဲ့ တိုးနယားအက၊ ကိန္နရီအက၊ ရှမ်းအိုးစည်    အစရှိတဲ့ သူတို့ရဲ့ ရိုးရာယဉ်ကျေးမှုတွေကို လေးစားမြတ်နိုးခုန်မင်ကြတာ တွေ့ရပါတယ်။ ထိုနည်းလည်းကောင်းပဲ ရခိုင်တိုင်းရင်းသားများမှာဆိုလို့ရှိရင်လည်း ရခိုင်ရိုးရာယဉ်ကျေးမှု သြင်္ကန်ကို ခမ်းခမ်းနားနား သိုက်သိုက်မြိုက်မြိုက်နှင့် ရိုးရာမပျက် ဆင်နွှဲလေ့ရှိကြပါတယ်။ ရခိုင်လူငယ်အများစု ဟာ ရခိုင်ရိုးရာသြင်္ကန်ကို ရန်ကုန်မြို့ သိမ်ဖြူကွင်းမှာ နှစ်စဉ်မပြတ်ကျင်းပကြတဲ့အခါမှာ လောင်းလှေ ကို ခလယ်မှာထားပြီးတော့ ရခိုင်လူငယ်များက တစ်ဖက်က အမျိုးသား၊ တစ်ဖက်က အမျိုးသမီးများနဲ့ ကျက်သရေရှိစွာ ယဉ်ကျေးမှုကို အားပေးကြတာကို တွေ့ရပါတယ်။ ဝမ်းနည်းစရာကောင်းတာကတော့ မြန်မာတိုင်းရင်းသားများထဲမှာ တစ်ခုအပါအဝင်ဖြစ်တဲ့ ဗမာလူမျိုးများမှာတော့ အများစုဟာ မိမိတို့ရဲ့ ထောင်ချီပြီးရှိတဲ့ ရိုးရာယဉ်ကျေးမှုထက် တိုင်းတစ်ပါးသရုပ်ပျက် ယဉ်ကျေးမှုတေးဂီတတွေ၊ သရုပ်ပျက် Dance အကများကို သရုပ်ပျက်ဝတ်စားဆင်ယင်မှုများကို မိမိတို့ရဲ့ ယဉ်ကျေးမှုထက်ပိုပြီးတော့ လေးစားမြတ်နိုးကြတာကို ဝမ်းနည်းစွာ တွေ့မြင်ရပါတယ်။ အမျိုးသားယဉ်ကျေးမှု ဗဟိုကော်မတီကို ဖွဲ့စည်းပြီးနောက်ပိုင်းမှာလည်းပဲ ဗမာလူငယ်အများစုဟာ သရုပ်ပျက်တေးဂီတများ၊ သရုပ်ပျက် Dance များ၊ သရုပ်ပျက်ဝတ်စားဆင်ယင်မှုများနှင့် ရိုင်းစိုင်းသော အမူအကျင့်များ တစ်နေ့တခြား တိုးပွားလာနေတာကို တွေ့ရပါတယ်။ အခုဆိုလို့ရှိရင် ရန်ကုန်မြို့လယ်ခေါင်မှာပင်လျှင် အုပ်စုဖွဲ့ပြီး ကားမောင်းပြိုင်ပွဲများလုပ်ပြီးတော့ အုပ်စုဖွဲ့ပြီးတော့ ရိုက်နှက်ကြတဲ့အထိ ရိုင်းစိုင်းတဲ့အပြုအမူများ တိုးပွားလာတာကို တွေ့ရှိရပါတယ်။ ဗမာလူမျိုးထဲက လူငယ်အများစုဟာ ဒီလိုလွှမ်းမိုးလာတာဟာ ရုပ်ရှင်၊ ဂီတ၊ သဘင်နယ်ပယ်နှင့် TV အစီအစဉ်တို့မှာ သရုပ်ပျက်ယဉ်ကျေးမှုများ တစ်နေ့တခြား ထိုးဖောက်လွှမ်းမိုးလာတဲ့ကိစ္စကိုလည်းပဲ ဂျာနယ်များ၊ သတင်းစာများနှင့် တခြားဝေဖန်ရေးသားမှုများ ပြုလုပ်ခဲ့ကြပြီး ဖြစ်ပါတယ်။ ခေတ်ရေစီးကြောင်းဖြစ်တယ်၊ ခေတ်နှင့်အညီဖြစ်တယ်၊ ခေတ်မီတယ် ဆိုပြီးတော့ စကားလုံးလှလှသုံးစွဲထားကြသော်လည်း ခေတ်ကိုဖျက်ဆီးပြီးတော့ အမျိုးသားယဉ်ကျေးမှု ကို ထိပါးပြီး နိုင်ငံနှင့်လူမျိုးတို့ရဲ့ ဂုဏ်သိက္ခာပိုမိုပြီးတော့ တစ်နေ့တခြားကျဆင်းလာလျက်ရှိသည်မှာ ဘယ်သူမှ မငြင်းနိုင်တဲ့ အချက်များ ဖြစ်ပါတယ်။ ကျွန်တော့်အနေနဲ့ ဒီနေ့ မေးချင်တဲ့မေးခွန်းကတော့ မြန်မာနိုင်ငံ အမျိုးသားယဉ်ကျေးမှုဗဟိုကော်မတီကို ပြင်ဆင်တိုးချဲ့ဖွဲ့စည်းဆောင်ရွက်ပြီးဖြစ်သော် လည်း သရုပ်ပျက်ဂီတ၊ သရုပ်ပျက် Dance များ၊ ဟိရိသြတ္တပ္ပနည်းသော ဝတ်စားဆင်ယင်မှုများ၊ ရိုင်းစိုင်းသော အမူအကျင့်များ လျော့ပါးသွားသည်မရှိဘဲနှင့် တစ်နေ့တခြားတိုး၍ တိုး၍ လွှမ်းမိုးလာ နေပြီး အပျက်အပျက်နှင့် နှာခေါင်းသွေးထွက်ဆိုသကဲ့သို့ ဗမာ့ရိုးရာယဉ်ကျေးမှုတဖြည်းဖြည်းမှေးမှိန် ပျောက်ကွယ်သွားနိုင်သည့် အမျိုးသားရေးအန္တရာယ်ကို မည်ကဲ့သို့ဟန့်တားစီမံဆောင်ရွက်သွားမည် ကိုသိရှိလိုပါကြောင်းနှင့် တိုးချဲ့ဖွဲ့စည်းပြီးဖြစ်သော အမျိုးသားယဉ်ကျေးမှုဗဟိုကော်မတီရဲ့ ရှေ့လုပ်ငန်းစဉ်များကို သိရှိလိုပါကြောင်း မေးမြန်းပါသည်။