နိုင်ငံတော်အတွင်း မြို့နယ်အချို့မှာ လူငယ် ဖွံ့ဖြိုးရေး ပရဟိတဂေဟာများနှင့် ဘုန်းတော်ကြီးသင်ပညာရေးကျောင်းများဟာ ခိုကိုးရာမဲ့ လူငယ်များ အား ပြုစုပျိုးထောင်နိုင်ရေးအတွက် နည်းလမ်းများရှာဖွေကာ ကြိုးပမ်းလျက်ရှိကြောင်း သိရှိရပါတယ်။ အဆိုပါကျောင်းများမှ သတ်မှတ်ချက်များနှင့်ကိုက်ညီသော နိုင်ငံတော်အသိအမှတ်ပြု လူငယ် ဖွံ့ဖြိုးရေး ပရဟိတဂေဟာများတွင် မိမဲ့၊ ဘမဲ့၊ ခိုကိုးရာမဲ့ ကလေးသူငယ်များအား ကလေးစောင့်ရှောက် ထားရှိမှု အရေအတွက်ပေါ်မူတည်ပြီး ဂေဟာအဆင့်များသတ်မှတ်ကာ ဆန်နှင့်စားစရိတ်၊ ဝတ်စုံစရိတ် များ နိုင်ငံတော်က ထောက်ပံ့ပေးလျက်ရှိကြောင်း သိရှိရပါတယ်။ အချို့သော လူငယ်ဖွံ့ဖြိုးရေး ပရဟိတဂေဟာများနှင့် ဘုန်းတော်ကြီးသင် ပညာရေးကျောင်းများတွင် စေတနာ့ဝန်ထမ်း ဆရာ ဆရာမ များဟာ ကလေးသူငယ်များအား ပညာသင်ကြားရေးကိုပါ ဆောင်ရွက်ပေးလျက်ရှိပါတယ်။ အဆိုပါ ဆရာ ဆရာမများသည် လစာငွေ သို့မဟုတ် ထောက်ပံ့ကြေးငွေ အနည်းငယ်မျှနှင့်ပင် နှစ်ရှည်လများ အနစ်နာခံကာ မိဘမဲ့ကလေးများအား ပညာသင်ကြားပေးလျက်ရှိကြောင်း လေ့လာသိရှိရပါတယ်။ ဒါကြောင့် ကျွန်တော်မေးလိုတဲ့မေးခွန်းကတော့ နိုင်ငံတော်အသိအမှတ်ပြု လူငယ်ဖွံ့ဖြိုးရေး ပရဟိတ ဂေဟာများနှင့် ဘုန်းတော်ကြီးသင်ပညာရေးကျောင်းများရှိ ဆရာ ဆရာမများအား နိုင်ငံတော်မှ လစာ ပေးမည်‌့အစီအစဉ် ရှိ၊ မရှိ သိရှိလိုပါကြောင်းမေးမြန်းပါသည်။