(ဃ)-မိုဘိုင်းဖုန်းများ အဆက်အသွယ်ပြတ်တောက်ပါက မည်သည့်ဌာနသို့ အကြောင်းကြားရမည်ဆိုသည်ကို ပြည်သူများ ကြိုတင်သိရှိရန် ကြိုတင်အသိပေးနိုင်ခြင်းရှိ၊ မရှိနှင့်စပ်လျဉ်းသည့်မေးခွန်း
CDMA နှင့် GSM မိုဘိုင်းတယ်လီဖုန်းများ တစ်ခါတစ်ရံမှာ အဆက်အသွယ်များပြတ်တောက်လေ့ရှိပါတယ်။ ထိုကဲ့သို့ အဆက်အသွယ်များပြတ်တောက်ရာမှာ နာရီ ပိုင်း၊ မိနစ်ပိုင်းပြတ်တောက်ပါက ပြဿနာတစ်စုံတစ်ရာမရှိသော်လည်း တစ်ရက်၊ နှစ်ရက်ကြာ ပြတ်တောက်သည့်အခါ ပြည်သူများအနေဖြင့် မည်သည့်ဌာနကို အကြောင်းကြားရမည်ကို မသိရှိပါ သဖြင့် စိတ်အနှောင့်အယှက်ဖြစ်ရသလို သက်ဆိုင်ရာဌာနမှလည်း တယ်လီဖုန်းခေါ်ဆိုခများ လျော့နည်းသွားမှာဖြစ်ပါတယ်။ ကြံခင်းမြို့နယ်မှာ ၁၁-၉-၂၀၁၂ နေ့ နေ့လယ်ပိုင်းမှစပြီးတော့ ၁၃-၉-၂၀၁၂ ရက်နေ့ မနက် ၁၀ နာရီအထိ ဆက်သွယ်ရေးလိုင်းများပြတ်တောက်ခဲ့ပါတယ်။ သို့သော်လည်း မည်သည့်ဌာနသို့ အကြောင်းကြားရမည်ကို မသိရှိရပါသဖြင့် ဤမျှကြာမြင့်သွား သည်လို့ယူဆမိပါတယ်။ သို့ပါ၍ CDMA နှင့် GSM မိုဘိုင်းတယ်လီဖုန်းများ အဆက်အသွယ် ပြတ်တောက်ပါက မည်သည့်ဌာနသို့ အကြောင်းကြားရမည်ဆိုသည်ကို ပြည်သူများသိရှိရန် ကြိုတင် အသိပေးနိုင်ခြင်းရှိ၊ မရှိ သိရှိလိုပါကြောင်း မေးမြန်းပါသည်။