ဘားအံ-ကော့ကရိတ်- မြဝတီကားလမ်းဟာ နယ်စပ်နှင့် ပြည်တွင်းကို ဆက်သွယ်ရာမှာ အတိုဆုံးကားလမ်းဖြစ်ပြီးတော့ နေ့စဉ် ကုန်တင်ကားစီးရေ ၂၁၀ ကျော်ခန့်သွားလာနေသော မြန်မာနိုင်ငံနယ်စပ်ကုန်သွယ်မှု ဒုတိယ အများဆုံး လမ်းကြောင်းဖြစ်ပါတယ်။ ကားလမ်းအရှည်ကတော့ ၁၁၀ မိုင် ၂ ဖာလုံရှိပါတယ်။ ဒီကား လမ်းကို AK ကုမ္ပဏီကို BOT စနစ်ဖြင့် ဆောင်ရွက်ဖို့ ၂၀၀၉ ခုနှစ်၊ စက်တင်ဘာလ ၂၃ ရက်နေ့ စတင်ဆောင်ရွက်ခွင့်ပြုခဲ့တဲ့အချိန်ကနေစပြီးတော့ ကုမ္ပဏီအနေနဲ့ ကားလမ်းကို အကြောင်းပြုပြီးတော့  စက်ယန္တရားကြီးတွေ၊ မော်တော်ယာဉ်တွေတင်သွင်းခြင်းကို ကုန်သွယ်လုပ်ငန်းခွန်ကင်းလွတ်ခွင့်နှင့် ဆောင်ရွက်ခဲ့သော်လည်း လမ်းအသုံးပြုခကောက်ခံခြင်းကိုသာ ဦးစားပေးဆောင်ရွက်နေပြီးတော့ လမ်းပြုပြင်ခြင်းကို လုပ်ငန်းကျွမ်းကျင်မှုမရှိခြင်း၊ မနိုင်မနင်းဆောင်ရွက်နေခြင်းများကြောင့် အရင် BOT စနစ် မဆောင်ရွက်မီက အခြေအနေထက် များစွာ ဆိုးရွားနေတဲ့အတွက်ကြောင့် ဒေသခံ ပြည်သူ များ စိတ်မချမ်းမသာဖြစ်ကြရပါတယ်။ ဒီလမ်းကြောင်းအခြေအနေ ဆိုးရွားခြင်းကိုလည်း ကရင်ပြည်နယ် ပြည်သူ့လွှတ်တော်ကိုယ်စားလှယ်တွေဖြစ်တဲ့ ဘားအံမဲဆန္ဒနယ်က ဒေါ်နန်းစေအွာ၊ မြဝတီမဲဆန္ဒနယ်က ဦးသန်းဦး၊ အမျိုးသားလွှတ်တော်ကိုယ်စားလှယ် ဦးစောအေးနိုင်တို့က အသီးသီး မေးမြန်းခဲ့ကြပါတယ်။ ထိုစဉ်က ဆောက်လုပ်ရေးဝန်ကြီးဌာနမှ ဖြေကြားခဲ့ရာမှာ AK ကုမ္ပဏီဟာ စက်ယန္တရားအင်အား၊ အင်ဂျင်နီယာအင်အား၊ လုပ်သားအင်အား တောင့်တင်းပြီးတော့ လုပ်ကိုင်နိုင် သူများဖြစ်တယ်။ ဆောက်လုပ်ရေးဝန်ကြီးဌာနအနေနဲ့လည်း BOT လုပ်ငန်းရှင်တွေကို လမ်းအင်္ဂါရပ် တွေ ပြည့်စုံနိုင်ရေး၊ စံချိန်စံညွှန်းနှင့်အညီဆောင်ရွက်နိုင်ရေးတို့အတွက် အဖွဲ့များခွဲပြီးတော့ ကြပ်မတ် လျက်ရှိပါတယ်။ မြဝတီ-ဘားအံလမ်းအပိုင်းကိုလည်း ကုမ္ပဏီအနေနဲ့ လမ်းအသုံးပြုခ ကောက်ခံခြင်း မပြုဘဲနှင့် လမ်းတံတားလုပ်ငန်းများ ပြင်ဆင်ထိန်းသိမ်းခြင်းနှင့် အဆင့်မြှင့်တင်ခြင်းများကို ဆောင်ရွက် နေပြီဖြစ်ကြောင်း ၂၀၁၁ ခုနှစ်၊ အောက်တိုဘာလ ၇ ရက်နေ့က ဖြေကြားခဲ့ပါတယ်။ အဲဒီလို ဖြေကြားပြီး တစ်နှစ်ကျော်ကြာသော်လည်း လမ်းအခြေအနေက မထူးခြားဘဲ အပေါက်တွေကို ပုံတွေနဲ့ တင်ပြထားပါတယ်။ လမ်းဘေးက မြေကြီးနှင့်ဖာခြင်း၊ ကျောက်အနည်းငယ်၊ ကတ္တရာအနည်းငယ်တို့နဲ့ ဖာခြင်းတို့ကိုသာ ဆောင်ရွက်လျက်ရှိကြောင်းတွေ့ရှိရပါတယ်။ ကော့ကရိတ်နှင့် သင်္ဃန်းညီနောင်ကြား တောင်ပေါ်လမ်းအခြေအနေကတော့ ဒီထက်ပိုပြီးအခြေအနေဆိုးတယ်လို့ သိရှိရပါတယ်။ ကားတွေ တန်ပိုတင်လို့ လမ်းပျက်ရတယ်ဆိုရင်လည်း အဲဒီကုမ္ပဏီဟာ တန်ပိုကြေးတွေကောက်ခံလျက်ရှိ ကြောင်းသိရှိရပါတယ်။ ဒီလမ်းကိုသုံးတဲ့ ကားတွေပဲ အတက်အဆင်းမှာ သံလွင်မြစ်ကူးတံတား (ဘားအံ)ကနေပြီး ပဲခူးဘုရားကြီးအထိ ရွှေသံလွင်ကုမ္ပဏီ BOT ယူထားတဲ့လမ်းကို ဆက်စပ်သွား လာကြရပါတယ်။ ရွှေသံလွင်လမ်းကတော့ သွားရလာရတာ အဆင်ပြေချောမွေ့ပြီးတော့ သွားလာတဲ့ ကားတိုင်းမှ ဒီ BOT လမ်းနှစ်ခုကို အမြဲနှိုင်းယှဉ်ပြီးတော့ ပြောနေကြပါတယ်။ ဆောက်လုပ်ရေးဝန်ကြီး ဌာနက ပြည်ထောင်စုဝန်ကြီး၊ ဒုတိယဝန်ကြီးများလည်း လမ်းကြောင်းကိုဆင်းပြီး စစ်ဆေးပေးစေလိုပါ တယ်။ လုံခြုံရေးအခြေအနေကောင်းနေပါပြီ။ ငြိမ်းချမ်းနေပါတယ်။ နောက်ဆုံးကြားသိရတာကတော့ ကရင်ပြည်နယ် အစိုးရအဖွဲ့နှင့် ညှိနှိုင်းချက်အရ ၂၀၁၂ ခုနှစ်၊ စက်တင်ဘာလ ၁၅ ရက်နေ့က စပြီး AK ကို BOT စနစ်ဖြင့် ဘားအံနှင့် ကော့ကရိတ်လမ်းပိုင်းကိုပဲ ဆက်လက်ပြီးတော့ တာဝန်ယူစေပြီးတော့ ကော့ကရိတ်-မြဝတီလမ်းပိုင်းကိုတော့ ဆောက်လုပ်ရေးဝန်ကြီးဌာန ပြည်သူ့ဆောက်လုပ်ရေးလုပ်ငန်း မှ တာဝန်ယူဆောင်ရွက်မယ်လိုသိရှိရပါတယ်။ ဆောက်လုပ်ရေးက တာဝန်ယူဆောင်ရွက်တာ လူထု တွေ အားလုံးကြိုဆိုပါတယ်။ ဒါကြောင့် ကျွန်တော်သိရှိလိုတဲ့ မေးခွန်းကတော့ (၁) ဘားအံ- ကော့ကရိတ်-မြဝတီလမ်းပိုင်းရဲ့ နောက်ဆုံးအခြေအနေကို သိရှိလိုပါတယ်။ (၂) ထိုင်းနိုင်ငံအကူအညီ နဲ့ လက်ရှိ မြဝတီ-ကော့ကရိတ်-ဒေါနတောင်ကို ကျော်ပြီးတော့ သွားတဲ့လမ်းအစား တောင်တက်မှာ ကားလမ်းကြောင်းအသစ် ဖောက်လုပ်ရန်ရှိနေတယ်လို့လည်း သိရှိရပါတယ်။ ဒါကြောင့်လည်း ဒီတောင်ပေါ်လမ်းကို နောက်မှာ သုံးတော့မှာ မဟုတ်တဲ့အတွက် ကုမ္ပဏီက မဆောင်ရွက်လိုတော့ဘဲ ပြန်အပ်ခြင်းဖြစ်တယ်လို့ ဒေသခံပြည်သူတွေကပြောဆိုခြင်းဖြစ်ပါတယ်။ ဒါကြောင့် ထိုင်းနိုင်ငံရဲ့ အကူအညီနဲ့ ဖောက်လုပ်မယ့်လမ်းကြောင်း ဆောင်ရွက်မှုအခြေအနေနဲ့ ပြီးစီးနိုင်မည်‌့ ခုနှစ်စသည်တို့ ကို သိလိုကြောင်း မေးမြန်းပါသည်။