(က)-ကာလအလိုက်၊ ဒေသအလိုက်၊ သီးနှံအမျိုးအစားအလိုက် အချိန်ကာလသတ်မှတ်၍ အနိမ့်ဆုံးဈေးနှုန်း အာမခံမှု (Minimum Purchase Guarantee Price )ကို ဈေးကွက်စီးပွားရေး မူဘောင်အတွင်းမှ နိုင်ငံတော် အစိုးရ၏ ကြီးကြပ်မှုဖြင့် ကြိုတင်သတ်မှတ် ဆောင်ရွက်ပေးနိုင်ရေး နှင့်စပ်လျဉ်းသည့် မေးခွန်း။

ကျွန်တော် ဒီနေ့ တင်သွင်းမယ့် မေးခွန်းဟာ မဲဆန္ဒနယ် တစ်ခု၊ နှစ်ခုအတွက်သာမကဘဲ တစ်နိုင်ငံလုံးလွှမ်းခြုံစေမယ့် မေးခွန်းဖြစ်ပါတယ်။ တစ်နိုင်ငံလုံး လူဦးရေရဲ့ ၇၀ ရာခိုင်နှုန်းလူဦးရေရဲ့ ကိစ္စဖြစ်တဲ့အတွက်ကြောင့် ဒီမေးခွန်းပေါ်ပေါက်ရတဲ့ အကြောင်းအရင်းကို အတိုချုပ်နှစ်ချက်လောက် တင်ပြခွင့်ပြုပါခင်ဗျား။ ဥက္ကဋ္ဌကြီးခင်ဗျား။ စာပေ ကျမ်းဂန်လာအဆိုအရ ကမ္ဘာဦးလူတို့စတင်ရာမှာ မိမိခြေထောက်အောက်က မြေဆီကို အသင်‌့စားသုံး နိုင်သည်လို့ ဆိုပါတယ်။ အဲဒီနောက် ပဒေသာပင်ကို အဆင်သင်‌့စာသုံးနိုင်သည်လို့ ဆိုပါတယ်။ ဒီနောက်မှာ လူသားတို့ရဲ့အတ္တ၊ မာန်မာန၊ ကိလေသာကြီးထွားလာမှုကြောင့်  နောက်ပိုင်းမှာတော့ မိမိတို့ရဲ့ရိက္ခာကို ခက်ခက်ခဲခဲပင်ပင်ပန်းပန်း စိုက်ပျိုးကြိတ်ခွဲချက်ပြုတ်ပြီးမှသာ စားသောက်လို့ ရတယ်လို့ အဆိုရှိပါတယ်။ အဲ့ဒီနေရာတွေမှာ ဒီရိက္ခာတွေကို ဖြည့်တင်းပေးတဲ့ သူတွေဟာ ကမ္ဘာဦးကတည်းက ကျေးဇူးရှင်နေရာအဖြစ်ကို ရောက်ရှိလာတာဖြစ်ပါတယ်။ ဒါကြောင့်မို့လို့ ဒီနေ့မှာ ဒီလို ကျေးဇူးရှိတဲ့သူတွေဟာ ကျန်တဲ့လူသားအားလုံးနဲ့ ကံဇာတာ လိပ်ပြာမြင့်တယ်လို့ ဆိုကြပါတယ်။ ဒီလို ကံဇာတာလိပ်ပြာမြင့်တဲ့ လူပုဂ္ဂိုလ်အဖွဲ့အစည်းတွေကို အားပေးအားမြှောက် ပြုနေတဲ့နိုင်ငံတွေ ဟာလည်း ဒီနေ့ ကြီးပွားချမ်းသာနေကြတယ်လို့ အဆိုရှိပါတယ်။ အရှေ့ဖျားက ပစိဖိတ်ဒေသက နိုင်ငံတချို့ဆိုရင် ဆန်မစားတာတောင်မှ ဆန်စိုက်တာ သူတို့အကြောင်းပြချက်ကတော့ အရေး အကြောင်းကျရင် သူတို့လူသားတွေဟာ သူတို့တိုင်းပြည်က လူတွေဟာ ဆန်မစိုက်တတ်တော့မှာစိုးလို့ ကို အစိုးရက စိုက်ထုတ်ပြီးတော့ စိုက်ခိုင်းတယ်လို့ပဲ ကျွန်တော်တို့ မှတ်သားမိပါတယ်။ ဒါက ပထမတစ်ချက်ဖြစ်ပါတယ်။ ဒုတိယတစ်ချက်ကတော့ ကျွန်တော်တို့ ပထမအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ၂၀၁၁ ခုနှစ်၊ စက်တင်ဘာလ ၂၇ ရက်နေ့မှာ ဧရာဝတီတိုင်းဒေသကြီး၊ ဇလွန်မဲဆန္ဒနယ်က ပြည်သူ့လွှတ်တော်ကိုယ်စားလှယ် ဦးတင်ထွတ်ရဲ့ အဆိုတစ်ခုဟာ အတည်ပြုပြီး တော့ အောင်ခဲ့ပါတယ်။ အဆိုကတော့ ကာလအလိုက်၊ ဒေသအလိုက်၊ သီးနှံအမျိုးအစားအလိုက် အချိန် ကာလသတ်မှတ်၍ အနိမ့်ဆုံးဈေးနှုန်းအာမခံမှု (Minimum Purchase Guarantee Price)ကို ဈေးကွက်စီးပွားရေးမူဘောင်အတွင်းမှ နိုင်ငံတော်အစိုးရ၏ ကြီးကြပ်မှုဖြင့် ကြိုတင်သတ်မှတ် ဆောင်ရွက်ပေးနိုင်ရေးအဆိုဟာ အတည်ပြုအဆိုဖြစ်ခဲ့ပါတယ်။ အထက်ပါအဆိုကို မပြီးပြတ်သေးသော လွှတ်တော်ဆိုင်ရာလုပ်ငန်းအဖြစ် ပြည်သူ့လွှတ်တော်အစိုးရ၏ အာခံချက်များ၊ ကတိများနှင့် တာဝန်ခံချက်များစိစစ်ရေးကော်မတီက စိစစ်ချက်အရ စီးပွားရေးနဲ့ကူးသန်း ရောင်းဝယ်ရေးဝန်ကြီးဌာနက နိုင်ငံတော်အရန်ဆန်ထားရှိရေး ကော်မတီနှင့်ညှိနှိုင်းချက် တင်ဒါ စနစ်ဖြင့် အောက်ပါအတိုင်းဝယ်ယူရန် တင်ဒါအောင်မြင်ကြောင်း ပြန်ကြားချက်ရရှိပါတယ်။ ဒီပြန်ကြားချက်ကိုလည်း ယခု ဆဋ္ဌမပုံမှန်အစည်းအဝေးမှာ ကော်မတီရဲ့အစီရင်ခံစာတင်သွင်းပြီး ဖြစ်ပါတယ်။ အစီရင်ခံစာပြန်ကြားချက်အရ (၁) ၂၀၁၂ ခုနှစ် နိုဝင်ဘာလအတွက် ရန်ကုန်တိုင်း ဒေသကြီးတွင် ဆန်တန်ချိန် ၆၈၀၀၊ (၂) ၂၀၁၂ ခုနှစ် နိုဝင်ဘာလအတွင်းမှာပဲ ဧရာဝတီတိုင်း ဒေသကြီးမှာ ဆန်တန်ချိန် ၂၈၀၀၊ ၂၀၁၂ ခုနှစ် ဒီဇင်ဘာလအတွက် တန်ချိန် ၂၀၀၀၀၊ ၂၀၁၃ ခုနှစ် ယခု ဇန်နဝါရီလအတွက် တန်ချိန် ၁၀၀၀၀ တို့ကို ရန်ကုန်၊ ဧရာဝတီ၊ ပဲခူး၊ မန္တလေးနှင့် စစ်ကိုင်း တိုင်းဒေသကြီးတို့မှာ တင်ဒါခေါ်ယူပေးရန် စီစဉ်ထားကြောင်း ပြန်ကြားချက်တွေ့ရှိရပါတယ်။ သို့သော်လည်းပဲ အဆိုအတည်ဖြစ်ခဲ့တဲ့ အဓိကအကြောင်းအရာဖြစ်တဲ့ ကာလဒေသအလိုက်၊ သီးနှံ အမျိုးအစားအလိုက်၊  အနိမ့်ဆုံးဈေးနှုန်းအ‌ွခေခံအာမခံမှုနှင့်ပတ်သက်လို့ ထိရောက်တဲ့ အကောင် အထည်ဖော်မှုကို မတွေ့ရတဲ့အတွက် ဒီနေ့ မေးခွန်းကို တင်ပြအပ်ပါတယ်။ သို့ဖြစ်ပါ၍ ကျွန်တော် မေးမြန်းလိုသည့် ကြယ်ပွင့်ပြမေးခွန်းမှာ ပထမအကြိမ် ပြည်သူ့လွှတ်တော် ဒုတိယပုံမှန်အစည်းအဝေး ၂၇-၉-၂၀၁၁ ရက်နေ့၌ အတည်ဖြစ်ခဲ့သော ဇလွန်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးတင်ထွတ်၏ ကာလအလိုက်၊ ဒေသအလိုက်၊ သီးနှံအမျိုးအစားအလိုက် အချိန်ကာလသတ်မှတ်၍ အနိမ့်ဆုံးဈေးနှုန်းအာမခံမှု (Minimum Purchase Guarantee Price) တစ်နည်းအားဖြင့် (Basic Guarantee Price)ကို ဈေးကွက်စီးပွားရေးမူဘောင်အတွင်းမှ နိုင်ငံတော်အစိုးရ၏ ကြီးကြပ်မှုဖြင့် ကြိုတင်သတ်မှတ် ဆောင်ရွက်ပေးနိုင်ရေးအဆိုနှင့် စပ်လျဉ်း၍ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက လက်ရှိမည်သို့ အကောင်အထည်ဖော်ဆောင်ရွက်နေသည်ကို သိရှိလိုသည့်အတွက် မေးမြန်းပါသည်။