ဧရာဝတီမြစ်၏ မြစ်ဖျားဒေသဖြစ်သော မြစ်ဆုံအတွင်းရှိ မြစ်ဆုံရွာအပါအဝင် ကျေးရွာတော်တော်များများသည် စီမံကိန်းအတွင်းမှာပါဝင်ခဲ့ပါ ကြောင်း၊ မြစ်ဆုံစီမံကိန်းသည် ဒေသခံများနှင့် မြန်မာနိုင်ငံတစ်ခုလုံးအတွက်လည်း အရေးကြီးကဏ္ဍအနေဖြင့် အလေးထားရသည့်ကိစ္စဖြစ်ပါသည့်အတွက် ၂၀၁၂ ခုနှစ်၊ အောက်တိုဘာလ ၁၈ ရက်နေ့ရက်စွဲနဲ့ မြစ်ဆုံစီမံကိန်းနဲ့ပတ်သက်သည့်မေးခွန်းကိုမေးခွန်းခဲ့ကြောင်း၊ ဖြေကြားချက်ကို ဆဋ္ဌမပုံမှန် အစည်းအဝေးစတင် ကျင်းပသည့် အချိန်တွင် စာဖြင့်ပေးပို့ခဲ့သည့်ကိုလက်ခံရရှိခဲ့ကြောင်း၊  စာဖြင့်ဖြေကြားချက် အကျဉ်းကတော့ မြစ်ဆုံရေအားလျှပ်စစ်ဆိုင်ရာ ကိစ္စရပ်များမှာ ချုပ်ဆိုထားသော စာချုပ်စာတမ်း ဥပဒေများနှင့်အညီ ဆောင်ရွက်ပေးရမည်ဖြစ်ပါ၍ မြစ်ဆုံဒေသခံ တိုင်းရင်းသားများကို မူလဒေသသို့ ပြန်လည် အခြေစိုက် နေထိုင်ခွင့်ပြုရန် လောလောဆယ်အစီအစဉ်မရှိပါကြောင်းလည်း ပြန်လည်ဖြေကြားခဲ့ပါကြောင်း၊ တစ်ဆက်တစ်စပ်တည်း သိလိုသည့်မေးခွန်းကိုလည်း စာဖြင့်ဖြေကြားသောကြောင့် မေးမြန်းခွင့်မရရှိခဲ့ပါကြောင်း၊ သိလိုသည့်မေးခွန်းကတော့ စာချုပ်စာတမ်းပါ အကြောင်းအရာများကို သိလိုပါကြောင်း၊ တဖန် ရှင်းလင်းချက်တွင်ပါသော ဒေသခံများအတွက် အစီအမံများသည် ယခင်ဆောင်ရွက်ပြီးသောကိစ္စရပ် များဖြစ်နေသည်ကို တွေ့ရှိရပါကြောင်းနှင့် ဒေသခံများသိလိုတဲ့ကိစ္စသည် အနာဂတ်အစီအမံများဖြစ်သည့် အတွက် ပြန်လည်မေးမြန်းရခြင်း ဖြစ်ကြောင်း  ဦးစွာတင်ပြပြီး၊ ယခုအခါ မလီဆိုတောင်ဘက်နဲ့ လက်ဖက်ရွာများကို အောင်မြင်သာစံပြကျေးရွာတွင် လည်းကောင်း၊ ဒေါင်းပန်နဲ့ အောင်ကြာယန်ကျေးရွာတို့ကို လိယန်ကျေးရွာတွင်လည်းကောင်း ပြောင်းရွှေ့ထားခဲ့ပြီး အဆိုပါ နေရာများသည် ၎င်းတို့၏မူလနေရာများနှင့်များစွာကွာခြားလှပါကြောင်း၊ တာဝန်ရှိသူတွေ၏ ဆောင်ရွက်ပေးထားမှုသည် ၎င်းတို့ဘဝအတွက် မည်သို့မျှအဆင်မပြေနိုင်ကြောင်း၊ ယခင်ကထက် များစွာဒုက္ခရောက်နေသည့် အတွက် ဒေသခံများ၏ တစ်ညီတစ်ညွတ်တည်းသောဆန္ဒသည် မူလဒေသသို့သာ ပြန်ချင်ကြောင်း၊ ၊ထို့ကြောင့် ဝန်ကြီးဌာနကို မေးခွန်းနှင့်အတူ ဒေသခံများ၏ အခက်အခဲ၊ဓာတ်ပုံမှတ်တမ်းများ၊ ဒေသခံတွေ၏ ရင်ဖွင့်သံတွေနှင့် အတူ ပြည့်ပြည့်စုံစုံ ပေးအပ်ခဲ့ပါကြောင်း၊ ၎င်းတို့နေထိုင်ရာဒေသရှိ ကျောက်တုံးကျောက်ခဲများ၊ မနှစ်ကမိုးတွင်း၌ ရေကြီးမှုများ ၊ နောက်ဆုံး သင်္ချိုင်းသွား သည့်နေရာ တွင်ပင် မိုးတွင်း ကာလတွင် ဒူးလောက်ရှိသော နေရာဖြတ်သွားမှ ထိုတောင်ကုန်းပေါ်သို့ ခက်ခက်ခဲခဲ တက်ရပါသည် ဟု ဒေသခံတွေက ပြောပြခဲ့ပါကြောင်း၊ယခုအခါ စီမံကိန်းဧရိယာအတွင်း မှ ပြောင်းရွှေ့ခံထားရသောရွာများနှင့် မပြောင်းရွှေ့သေး သောရွာများတွင် ကျောင်းများမရှိတော့သည့်အတွက် ၎င်းတို့၏သားသမီးများသည် ကျောင်းလုံးဝ မတက်ရတော့သည့် အနေအထားကိုလည်း တင်ပြလိုပါကြောင်း၊ထို့ကြောင့် အောက်ပါမေးခွန်းများ ကို မေးမြန်းလိုကြောင်း၊

(၁) မြစ်ဆုံစီမံကိန်းမှ ပြောင်းရွှေ့ခံထားရသော ဒေသခံလူထုအတွက် အနာဂတ်အစီအမံများကို သိလိုပါသည်။

(၂)မြစ်ဆုံရေအားလျှပ်စစ်စီမံကိန်းအတွက် ချုပ်ဆိုထားသော စာချုပ်စာတမ်းပါ အကြောင်းအရာအချက် အလက်များကို သိရှိနိုင်ရန်နှင့် လွှတ်တော်တွင် ရှင်းလင်း တင်ပြပေးနိုင်ရေးတို့ကို မေးမြန်းခဲ့ပါသည်။