သုံးခွမြို့နယ်မှာ လွန်ခဲ့တဲ့ ၁၀ နှစ်ခန့်က တည်ဆောက်ခဲ့တဲ့ ရေငန်တားရေထိန်းတမံ ၃ ခုနဲ့ ပတ်သက်ပြီးတော့မှ ဒေသခံ ပြည်သူလူထုရဲ့ လိုလားချက်များကို မေးခွန်းဖြင့် တင်ပြတောင်းဆိုသွားမှာ ဖြစ်ပါတယ်။ ရန်ကုန်တိုင်းဒေသကြီး သုံးခွမြို့နယ်မှာ ပင်လယ်ရေငန်ရေတွေကို တားပြီးတော့မှ ရေချိုတွေကိုထိန်းပေးနိုင်ဖို့အတွက် ရေတံခါး ၃ ခု လွန်ခဲ့တဲ့ ၁၀ နှစ်ခန့်ကတည်ဆောက်ခဲ့ပါတယ်။ အဲဒီရေတံခါး ၃ ခုကတော့ သုံးခွရေထိန်းတံခါး၊ တစ်ကောရေထိန်းတံခါးနှင့် ကဒပ္ပနရေထိန်းတံခါးဖြစ်ပါတယ်။ အဲဒီရေထိန်းတံခါး ၃ ခုနဲ့ ဆက်စပ်နေတဲ့ ကျေးရွာဟာ ၃၇ ရွာရှိပါတယ်။ ရေထိန်းတံခါးတွေနဲ့ ပတ်သက်ပြီးတော့မှ ဒီနေ့မှာတော့ ပြည်သူလူထုဟာအခက်အခဲတွေနဲ့ တွေ့ကြုံပြီးတော့မှ ဒီရေထိန်းတံခါးတွေကို ဖြုတ်သိမ်းစေချင်တဲ့ ဆန္ဒတွေ အတော်လေးပြင်းပြနေတာကို မြေပြင်မှာသွားရောက်လေ့လာတဲ့အခါ မှာ သိရှိရပါတယ်။ အဓိကကတော့ ဒီရေထိန်းတံခါး ၃ ခုကို တည်ဆောက်တဲ့အခါမှာ ရေသွင်းရေထုတ် စနစ်ကို ခေတ်မီအောင်ဆောင်ရွက်ထားတာမရှိဘူး။ နောက်တစ်ချက်က အဓိကပိုကျတဲ့အချက် ကတော့ ဒေသခံပြည်သူလူထုတွေရဲ့ လူမှုစီးပွားရေးဘဝကို ထည့်သွင်းတွက်ချက်ပြီးတော့မှ တည်ဆောက်ထားတာ မဟုတ်ဘူးဆိုတာကို စိစစ်တွေ့ရှိရပါတယ်။ ဒီရေထိန်းတံခါးတွေမှာ တစ်ခုတစ်ခုကို ရေတံခါး ၂၁ ပေါက်စီပါပါတယ်။ ရေထိန်းတံခါးတစ်ပေါက် ဟာ ၈ ပေကျယ်ပြီးတော့မှ ၁၂ ပေမြင့်ပါတယ်။ ဒီ ရေတံခါးတွေကိုဖွင်‌့ဖို့ ပိတ်ဖို့ဆိုလို့ရှိရင် လူအားနဲ့ မတင်ရပါတယ်။ လူအားနဲ့ မတင်တဲ့အခါမှာ သဲတွေ နုန်းတွေ ကိုက်နေတဲ့အတွက် ရိုးရိုးမရဘဲနဲ့ Chain Block နဲ့ မတင်ရ ပါတယ်။ ဒီလို Chain Block နဲ့မတင်တဲ့အခါမှာ တစ်ပေအပေါ်မြင့်တက်ဖို့အတွက် ၁၆၅ ပတ်လှည့် ရပါတယ်။ အဲတော့ ရေထိန်းတံခါးပေါက်တစ်ခု လုံးလုံးပွင့်သွားဖို့ဟာ အပတ်ပေါင်း ၁၉၈၀ လှည့်မှ ရေထိန်းတံခါးပေါက်တစ်ခုဟာ လုံးဝပွင့်ပါတယ်။ အဲဒါမျိုး ရေထိန်းတံခါးပေါက် အပေါက်ပေါင်းဟာ ၂၁ ပေါက်ရှိပါတယ်။ နောက် မိုးရေရွာလို့ မိုးရွာလို့ မိုးရေချောင်းလုံးပြည့်လာရင် ပြည့်လျှံလာတဲ့ အချိန်မှာ ဖွင့်ဖို့လိုအပ်လို့ဖွင့်တဲ့အခါမှာ လေးငါးရက်ကြာမှ ဒီတံခါးအားလုံးက ဖွင့်လို့ရတဲ့အနေ အထားမျိုးကို ရောက်ပါတယ်။ တစ်ခါတစ်ရံကျတော့လည်း အဲဒီရေကြီးရေလျှံတဲ့အချိန်မှာ ငါးဖမ်းတဲ့ အဖွဲ့တွေကို ငဲ့ပြီးတော့မှမဖွင်‌့ဘဲထားတာတို့ ဘာတို့ရှိပါတယ်။ အဲဒီတော့ ဒီရေထိန်းတံခါးဟာ ရေကိုမထိန်းထားနိုင်တဲ့အတွက် ရေကြီးပြီးတော့မှ စိုက်ပျိုးထားတဲ့ စပါးစိုက်ဧကထောင်ချီ ပျက်စီး တယ်။ အကြိမ်ကြိမ် ပြန်စိုက်ရတဲ့အတွက် အကြိမ်ကြိမ်ကုန်ကျစရိတ်တွေများပြီးတော့မှ လယ်သမား တွေအတွက် အခက်အခဲတွေ ဖြစ်ရပါတယ်။ အရေးကြီးဆုံးတစ်ချက်ကတော့ သုံးခွမြို့နယ်ဟာ ကျန်တဲ့မြို့နယ်တွေလိုပဲ မြို့နဲ့ ရွာနဲ့ဆက်သွယ်ဖို့ဟာ မြေသားလမ်းတွေပဲ အများဆုံးရှိပါတယ်။ အဲဒီမြေသားလမ်းတွေဟာလည်း မိုးရာသီမှာ အသုံးပြုမရတဲ့အတွက် မိုးရာသီမှာ ရေကြောင်းလမ်းကိုပဲ အသုံးပြုပြီးတော့မှ သွားလာပြီးတော့ ကုန်စည်စီးဆင်းမှုတွေလုပ်ရတယ်။ လူနာတွေကိုပို့ဆောင်တာ တွေလုပ်ရတာ ဖြစ်ပါတယ်။ အခုဒီ ရေထိန်းတံခါးသုံးခု ဆောက်လိုက်တဲ့အတွက် ရေလမ်းကြောင်း ပြတ်တောက်သွားပြီးတော့မှ မိုးတွင်းမှာ မြို့နယ်တွေဟာ မြို့နဲ့ဆက်သွယ်ဖို့ဟာ ကုန်စည်စီးဆင်းမှုရော အခြားလူမှုရေးအရ လူမမာတွေကို ဆေးရုံပို့ဖို့ရောအစရှိတဲ့ အခက်အခဲတွေအများကြီး ဖြစ်ရပါတယ်။ နှစ်စဉ်မိုးတွင်းကာလရောက်တိုင်းမှာ ဒီ ရေထိန်းတံခါး ၃ ခုနဲ့ ဆက်စပ်နေတဲ့ ကျေးရွာက ရွာသူ ရွာသားတွေဟာ သူတို့တွေ့ကြုံခံစားနေရတဲ့အခက်အခဲတွေကို မဖြစ်မနေထိထိရောက်ရောက်ဖြေရှင်း ပေးဖို့ လိုအပ်လာပြီလို့ ကျွန်တော်တို့ကို တင်ပြပါတယ်။ ကျွန်တော်တို့ကိုယ်တိုင်လည်း သွားကြည့် တဲ့အခါမှာ ဒီရေထိန်းတံခါးတွေဟာ ဖွင်‌့တာပိတ်တာကို ပုံမှန်မလုပ်တဲ့အတွက် ချောင်းတွေဟာ ကောပြီးတော့မှ နုန်းတွေနဲ့ပြည့်နေတာကို မျက်မြင်ကိုယ်တွေ့တွေ့ခဲ့ရပါတယ်။ ဒါ့ကြောင့်မို့လို့ ဒေသခံပြည်သူလူထုရဲ့ အခက်အခဲကို ထိထိရောက်ရောက်မဖြစ်မနေ ဖြေရှင်းဆောင်ရွက်ပေးမယ်လို့ မျှော်လင့်ပြီးတော့မှ ပြည်သူလူထုရဲ့ လိုလားချက်များကို မေးခွန်းအဖြစ် အောက်ပါအတိုင်း မေးမြန်း လိုပါတယ်။ မေးခွန်းနံပါတ် (၁) ရေထိန်းတံခါးများကို လျှပ်စစ်မော်တာဖြင့် ခလုတ်နှိပ်ပြီးတော့မှ ရေထွက်ပေါက် ၂၁ ပေါက်စလုံး ၁၂ ပေအထိ ချက်ခြင်းမြှင့်တင်ပြီး ပိုလျှံရေများကို နာရီပိုင်းအတွင်း အကုန်အစင် စီးဆင်းသွားအောင်လို့ ယန္တရားတွေ တပ်ဆင်ဆောင်ရွက်ပေးနိုင်ခြင်း ရှိ၊ မရှိ သိလို ပါတယ်။ ‌မေးခွန်းနံပါတ် (၂) မိုးတွင်းကာလမှာ ရေယာဉ်တွေ ဖြတ်သန်းသွားနိုင်ဖို့အတွက် တင်ပြပါ ရေထိန်းတံခါးသုံးခုကို ဖြတ်သန်းပြီးတော့သွားနိုင်အောင်လို့ ရေကြောင်းလမ်းကြောင်းတစ်ခု ဖန်တီး ဆောင်ရွက်ပေးနိုင်ခြင်းရှိ၊ မရှိ မေးခွန်းနံပါတ် (၃) ရေထိန်းတံခါးများကို ဒေသခံလူထုအကျိုးအတွက် အချိန်နှင့်တပြေးညီ ဖွင့်ပိတ်ခြင်း ဆောင်ရွက်နိုင်ဖို့အတွက် ပြည်သူ့ကိုယ်စားလှယ်တွေ ရပ်မိရပ်ဖတွေ ပါဝင်ဖွဲ့စည်းထားတဲ့ အဖွဲ့ကနေပြီးတော့မှ ပါဝင်ဆောင်ရွက်နိုင်ဖို့အတွက် ပြည်ထောင်စုအစိုးရအနေနဲ့ ကြီးကြပ်ပြီးတော့မှ စီမံဆောင်ရွက်ပေးနိုင်ခြင်းရှိ၊ မရှိ။ မေးခွန်းနံပါတ် (၄) နိုင်ငံတော်ရဲ့ ရည်မှန်းချက်နဲ့ လက်တွေ့ဖြစ်ပေါ်နေမှုကို ဆန့်ကျင်ပြီးတော့မှ ဆယ်စုနှစ်တစ်ခုကျော်တဲ့အထိ ရေထိန်းတံခါးအတွင်း မှာ ရေထိန်းတံခါးရဲ့အပြင်မှာ ရေငန်များသာ ဖြစ်ပေါ်နေပြီး မူလရည်မှန်းချက်အတိုင်း ရေချို သိုလှောင်နိုင်မှုမရှိခြင်း၊ တောင်သူလယ်သမားများရဲ့ စိုက်ပျိုးရေး၊ ကုန်စည်စီးဆင်းရေးတို့အတွက် အနှောင့်အယှက်သဖွယ်ဖြစ်နေတဲ့ ဒီရေထိန်းတံခါး ၃ ခုကို အထက်တင်ပြတဲ့အချက် ၃ ချက် ဆောင်ရွက်ပေးနိုင်မှု မရှိဘူးဆိုလို့ရှိရင် ပြန်လည်ဖြုတ်သိမ်းပေးဖို့ နယ်မြေခံလူထုက  လိုလားနေတဲ့ အတွက် ပြည်သူလူထုရဲ့ လိုလားချက်နဲ့အညီ ဒီရေထိန်းတံခါး ၃ ခုကို ပြန်လည်ဖျက်သိမ်း ဖြုတ်သိမ်း ပေးရန် အစီအစဉ် ရှိ၊ မရှိကို သိလိုသည့်အတွက် မေးမြန်းပါသည်။