ယခုအခါ မြန်မာနိုင်ငံမှာ ကမ္ဘာမှာရှိတဲ့ ကင်ဆာ ရောဂါအဖြစ်ဆုံး ၁၁ နိုင်ငံအနက်ကနေပြီးတော့ ရေတွက်မယ်ဆိုလို့ရှိရင် မြန်မာနိုင်ငံဟာ ဒုတိယထိပ် ဆုံးကနေပြီးတော့ ကင်ဆာရောဂါ ဒုတိယအဖြစ်ဆုံးနိုင်ငံအဖြစ်ရပ်တည်လျက်ရှိတာကို ကြားသိရပါ တယ်။ မြန်မာနိုင်ငံမှာ ကင်ဆာရောဂါဖြစ်ပြီးဆိုရင်လည်း အားလုံးသိတဲ့အတိုင်းပဲ Chemotherapy ဆိုတဲ့ ဆေးသွင်းပြီးကုသမယ်ဆိုလို့ရှိရင်လည်း စရိတ်စက အင်မတန်ကြီးမားပါတယ်။ Radiotherapy ခေါ်တဲ့ ဓာတ်ရောင်ခြည်နှင့်ကုမယ်ဆိုလို့ရှိရင်လည်း ဓာတ်ရောင်ခြည်သုံးတဲ့စက်တွေဟာ မြန်မာနိုင်ငံ မှာ မလုံလောက်တဲ့အတွက် ကင်ဆာရောဂါဝေဒနာရှင်များအနေနဲ့ များစွာအခက်အခဲများ ဖြစ်ပေါ် လျက် ရှိနေပါတယ်။

ကျွန်တော်တို့မြန်မာနိုင်ငံမှာ ပြည်သူများနေ့စဉ် မဖြစ်မနေပတ်သက်သုံးစွဲ နေရတဲ့ အစားအစာများ၊ ဆေးဝါးများမှာဆိုလို့ရှိရင် ကျန်းမာရေးကို ဆိုးရွားစွာထိခိုက်စေနိုင်တဲ့ ဓာတု ဗေဒပစ္စည်းများ၊ ဓာတုဆိုးဆေးများ ပါဝင်နေတဲ့အတွက် မျိုးရိုးဗီဇကို ထိခိုက်စေနိုင်ခြင်း၊ အစာအိမ် အူလမ်းကြောင်းရောဂါများဖြစ်ပွားစေနိုင်ခြင်း၊ ဦးနှောက်အာရုံကြောထိုင်းမိုင်းခြင်းနှင့် ရေရှည်စားသုံး ပါက အသဲနှင့်ကျောက်ကပ်ပျက်စီးခြင်း၊ ကင်ဆာရောဂါများဖြစ်ခြင်းစတဲ့ ဆိုးကျိုးများ ဖြစ်နိုင်တာကို တွေ့ရပါတယ်။ တားမြစ်ထားတဲ့ ဆိုးဆေးများပါဝင်တဲ့ အစားအသောက်များ၊ ငရုတ်သီးမှုန့်၊ နနွင်းမှုန့်၊ ဟင်းသီးဟင်းရွက်များ၊ နယ်စပ်မှတရားမဝင်ဝင်ရောက်လာတဲ့ စံချိန်မမီဆေးဝါးများ၊ မြောင်းဆီ အစရှိတဲ့ စားသုံးဆီများ၊ အသင့်စားသုံးနိုင်တဲ့ သရေစာများ ဥပမာ ကော်ဖီမစ်၊ တီးမစ်၊ ခေါက်ဆွဲထုပ်၊ ကြာဇံထုပ်၊ ဇီးထုပ်များ၊ ကြာရှည်ခံရန်ပြုလုပ်ထားတဲ့ အစားအစာများ၊ သန့်ရှင်းမှုမရှိတဲ့ ရေများ စသည်တို့ဟာ အထက်ဖော်ပြပါဆိုးကျိုးများကို ဖြစ်ပေါ်စေတဲ့အကြောင်းတရားများဖြစ်ပါတယ်။ ကျွန်တော်မေးမယ့်မေးခွန်းကတော့ အမျိုးသားအစားအသောက် ဥပဒေပုဒ်မ ၂၈(က)ကို ပြဋ္ဌာန်း ထား၍ မြန်မာနိုင်ငံအစားအသောက်နှင့် ဆေးဝါးကွပ်ကဲရေးဌာနက ကြီးကြပ်မှုများ၊ အရေးယူမှုများ၊ သတင်းထုတ်ပြန်မှုများရှိသော်လည်း ထိရောက်မှုနည်းပါး၍ အန္တရာယ်ဖြစ်စေသည့်အရာများ လျော့နည်းပပျောက်မှုမရှိသည့်အပြင် တဖြည်းဖြည်းပိုမိုများပြားလာနေသည့်အတွက် ဤအမျိုးသား အန္တရာယ်ကို သက်ဆိုင်ရာကမည်ကဲ့သို့ အရှိန်အဟုန်မြှင့် ဆောင်ရွက်ပေးနိုင်မည်ကို သိရှိလိုပါကြောင်း မေးမြန်းပါသည်။